1 Timoti 2

Gotɨyarɨ wɨjavwinesɨ yuyaraavɨna.

1Sɨnnawɨnya' dahaa' yagaala mudɨ'nanya' gɨthɨde' daresɨ. Gotɨyarɨ wɨdaana! “Pwaraavɨ wɨgainɨvanɨka,” dawaajɨ yɨdanganaana! Yuyaraavɨna wɨdaana! “Gotɨyai wɨgaimwagana!” dawaajɨ marewɨdaana! Yuyaraavɨna “Su!” wɨdaana! 2Sara yadaa yɨ Kingɨyara maremwaaidɨvɨsaraavɨnajɨ a'mwe naangeraavɨnajɨ ke'munyaraavɨnajɨ wɨdaana! “Nemɨ kwaamu'na mwaidaa kave mwaidaa Gotɨyare yɨda'maraangebwi mɨdɨnaana! Yaasɨwa'na namwalaadɨka!” dawaajɨ sahwaraavɨna wɨdaana! 3Pwaraavɨna Gotɨyarɨ wɨja'nebwi tewaanaangebulyɨ. Nabaai Gotɨyai nevadaihasamaa'dei tɨnna yawɨrangadelyɨ “Tewaanyabulyɨ. Sabwi yɨlaaya nyɨgaidevulyɨ.” 4Sarei “A'mwe yuyaraavɨ wɨvadaihasamaarɨma! Sahwara yagaala nebulya' yuna yawɨrangadɨvɨ' nyɨlɨmwabɨ'dere,” yawɨ'delyɨ. Sara yawɨ'da sarevɨ wɨvu'najanna. 5Sare' dare'nesɨ. Yagaala nebula sa' dara dɨnɨkesɨ. Yuyainaavɨne Gotɨyai gave pwainanyai mwaalɨke'nanyɨ. Nabaai yuyainaavɨne tɨnnabanya gave pwainanyai Gotɨyarɨ a'mweinaavɨ nemariraku'manɨkei mwaalɨke'nanyɨ. Dazahwai Kɨraazɨtɨyai Jizaazai a'mwelyɨra. 6Dazahwai yawɨ'na “Kayaa'nanyabwina yuyara nabaibɨthɨka! Nɨmɨ balɨdeinyɨ.” Sarei gamɨre tawe yuyaraavɨna mubakelyɨ. Gotɨyai dahɨlakakegaa' sara balakevɨdaa'nyɨ jalɨkurakɨnɨkesɨ. Gotɨyai “Yuyaraavɨ wɨvadaihasamaarɨma!” wɨvu'najanna! 7Sare'na Gotɨyai gamɨre wɨja'neinyɨ Nyɨdaasadeinyɨ nyakakeinyɨ. Nebulya'na dɨvanɨge. Kwaasɨ majɨvanɨge. Nyakakeinyɨ ajɨmya yuyangɨyara Naangerɨ lɨmwabɨ'de'najɨ yagaala nebulya' yawɨrangabɨ'de'najɨ wɨjɨwaakadɨnyainyɨ.

Gotɨyarɨ yɨlaaya ya'negaa' a'mwerajɨ a'mwejɨ ya'neburɨnesɨ.

8Sarevɨdaa'nyɨ dara nyɨvu'najainyɨ. Gotɨyarɨ yɨlaaya ya'negaa' a'mwera yuya angebanyara Naangerɨ wɨdɨpɨka! Kunnya asɨra Gotɨyarɨ makibɨza asɨrajɨ kayaa'nanyanna myadɨvɨsara wɨdɨpɨka! Sahwara sɨnna tɨka mudayara, Gotɨyarɨ sɨmunyangɨ nayaa lɨmwadɨvɨsara Gotɨyarɨ wɨdɨpɨka! 9Nabaai sareinyɨ dara nyɨvu'najainyɨ. Sabaaibɨ' a'mwe kannya tewaanya' kunnya yunebaainanya yɨra'nɨpɨka! Baazɨ'ma'nya mubya naangejɨ mabaazɨ'ma'nɨpɨnera! “A'mwera nyawɨrangabɨka!” dapi mɨjasangɨ yɨwaala miwannɨpɨnera! Kɨlaakejɨkaavɨ nɨgwɨlalaaka dala pɨnɨnna pɨnɨnnanyajɨ paida paide yɨ'dejɨ miwannɨpɨnera! 10Aawa. Kumɨre nɨgwɨlalaaka da'daresɨ. Wɨgaimwange'na nawɨ'nya dala pɨnɨnna pɨnɨnnanya nayaa yɨpɨnengɨra. A'mwe “Gotɨyarɨ lɨmwadaanyannera,” yawɨ'dɨvɨtabaaibɨ' sara yɨpɨnengɨra. Tewaanyasɨ. Dazabwi kumɨre yɨwaala nawɨ'nyabulyɨ. 11A'mwe' kave mwaalɨna yada Gotɨyare yagaala kadɨka nayaa wɨ'nadesɨ. Yagaala madanna! “Kwaakewɨ mwaalɨma! Nayaa yɨwɨrinɨma!” dada nayaa wɨ'nadesɨ. 12Davwi gɨthɨde' manyɨvu'nyajavulyɨ. A'mwe' a'mweraavɨ wɨjɨwaakajavwi. A'mwe' a'mweraavɨ maremwaalajavwi. Sabwi aawano! A'mwe' maanga bɨpaina yada kadɨka wɨ'nyɨna yannesɨ. 13Sare' dare'nesɨ. Aayagaa' Gotɨyai Ataamɨmɨ yavɨkarina yɨna yaka, dɨvidaa'nyɨ Yɨvavɨ yavɨkarina. Sarevɨdaa'nyɨ a'mwe a'mweraavɨ kwaakewɨ mwaaihasangɨra. Sarevɨdaa'nyɨ maanga bɨpaina yɨpɨka! 14Pɨrɨ' darevɨdaa'nyasɨ. Ataamɨ Saataanɨmɨre kwaasɨ yagaalya' “Yayo,” wɨjaakei mɨ'. A'mwe' kwaasɨ yagaalya' “Yayo,” wɨdake'na Gotɨyai wɨjaakevɨne yɨwetawakyaakesɨ. Sarevɨdaa'nyɨ maanga bɨpaina yɨpɨka! 15A'mwe sare' kɨrɨ' a'mwe kaimɨraaya maapɨ'devɨ Gotɨyare wawɨnya' nayaa yɨpɨ'dengɨ. Sahwai nayaa wɨvadaihasamaaradelyɨ. Gotɨyarɨ kuna lɨmwadɨvɨ' kale wiade Gotɨyare kaimɨraaya tewaanna mwaaidɨvɨ' “Maalɨkennera,” yawɨpɨja Gotɨyare wawɨnya kumɨnyɨne' yɨpɨ'dengɨra.

Currently Selected:

1 Timoti 2: byr

Highlight

Copy

Compare