1 Timoti 3
3
Naangereraavɨ maremwaaidɨvɨsaraavɨnesɨ.
1Yagaala datha' lɨmwagaathe' gɨthɨde' nebulyasɨ. A'mwe pwai kwai “Naangereraavɨ maremwaaidɨnyainyɨ mwaalɨma!” yawɨrajai wawɨnya nawɨ'nya'na wɨvu'nadelyɨ. 2Wawɨnya nawɨ'nya' warɨkevɨdaa'nyɨ a'mwe naangeraavɨna dara yawɨ'na. Naangereraavɨ maremwaaidei nawɨ'nyabwi yadelyɨra. Nayaa yɨda'na mwaaiderɨ a'mwera gamɨre yɨwetawakya pɨnɨngɨ mwanganyadɨvɨ' bɨrala wɨdɨpɨ'dei mɨka. Sai a'mwe gave pɨrɨvɨna mwaaidelyɨ. Sɨmunya nayaa yavada'galayawɨ'delyɨ. Sai sɨmunya nawɨ'nyabwi mɨdɨdelyɨ. A'mwera dara wangadɨvɨsalyɨ “Sahwai tewaanyalyɨ.” Pɨwɨdaa'nyaraavɨ wapaaya wɨmaarina, se warya'nebajɨ wɨjaavɨna yadelyɨ. Nayaa wɨjɨwaakadelyɨ. 3Biyaaya nada yɨmaka mulannelyɨ. Sai sɨmɨlɨka yarai mudayada mala yaasɨwa' maramamaryadelyɨ. Aawa. Sai a'mweraavɨ kave yadelyɨ. Kumɨre munyɨkaavɨ yɨrɨla wɨdɨwadelyɨ. Sai nɨgwianna sɨmunya kwalaalya myawɨryadelyɨ. 4Sai gannya jɨlɨkaimɨraayamɨlɨkaavɨ nayaa maremwaaidelyɨ. Kaimɨraayamɨlɨka gamɨre yagaalya' mɨdɨbɨ'delyɨ. Gamɨnyɨna “Nɨmwai naangelyɨ,” yawɨpɨnelyɨ. 5A'mwei gannya jɨlɨkaimɨraayamɨlɨkaavɨ nayaa mamaremwaalyɨ yadei daaka! Sai sara yaja'na Gotɨyare kusɨlaanyavɨyaraavɨna gara yojɨ maremwaalannelaka! 6Gotɨyarɨ gaai lɨmwade mudɨkei maremwaalyarɨ namwaaihɨpɨka! Mudɨkei a'mwe naangei mwaalajai “Pwara nɨmɨbɨtara mɨka!” yawɨrajai Gotɨyarɨna yagaainakei nyɨma'nadɨka! Kamaalyai sara yawɨryaakei Gotɨyarɨna yagaainakei yɨma'nakabaai nyɨma'nadɨka! 7Maremwaalajarɨna Gotɨyarɨ malɨmwagyadɨvɨsara mwasɨlaanyara “Sarei a'mwe tewaanyalyɨra,” jalɨkurakɨpɨnelyɨ. Nayaa yɨda'na mamwaalyajarɨ yɨwetawakya pɨnɨngɨ wanganapɨjɨ bɨrala nyɨpɨdɨka!
Sara yajai Kamaalyare naanyavɨ nalɨvavwaradɨka! Sara yajai maremwaalyai mima'nannelyɨ.
Gotɨyare kusɨlaanyavɨyaraavɨne wɨgaimwangeraavɨnesɨ.
8Sasarebaaibɨ', Naangereraavɨ wɨgaimwadɨvɨsara nayaa yɨda'na mwaaidɨvɨsarera. Yagaala pɨrɨwaai gɨra'mwagadadɨvɨsara mamwaaibɨna! Waainɨya yɨmakaalya kwalaalya manyadɨvɨsare. “A'mweraavɨre nɨgwia gɨlyɨvɨsa sazangɨ maa'muneinyɨ,” majadɨvɨsare. 9Sɨmunyai tewaanyai wɨvadaihɨrakadelyɨyara sahwara Gotɨyai nebulya' yoimavajalɨkurakya' lɨmwadɨvɨsara wɨgaimwangera yɨma'nɨpɨ'derera. 10Aayagaa' “Gamɨrebwi tewaanyabwi daaka? Nayaa yadei daaka?” yɨbwakɨnapɨjɨ “Yo, sarei tewaanyalyɨ. Yuyara sara yawɨrangadɨvɨsalyɨ,” dɨnɨpɨjaraavɨ wɨgaimwangeraavɨ wɨmwaaihɨpɨ'dere. 11Sasarebaaibɨ' kumɨre a'mwe nayaa yɨda'na mwaaidɨvɨsangɨra. Bulayagaala madɨpɨnengɨ. Aawa, sahɨnɨ sɨmunya nayaa yawɨpɨnengɨra. Yuyagaa' kumɨre wawɨnyanna tewaanna lɨmwabɨnengɨra. 12Naangereraavɨne wɨgaimwangera a'mwe gave pɨrɨvɨnannera mwaaidɨvɨsare. Kunnya jɨlɨkaimɨraayamɨlɨkaavɨjɨ kumɨre angengɨ mwaaihasamɨlɨkaavɨjɨ nayaa maremwaaidɨvɨsare. 13Sare' dare'nesɨ. Wɨgaimwangera nayaa wɨdaayɨpɨjaraavɨ a'mwera tɨnna wanganapɨjɨ “Sai a'mwe naangelyɨ. Tewaanyalyɨ,” dɨnɨpɨ'de'nanyɨ. Wɨgaimwangera nayaa yadɨvɨta sarera lɨka myadɨvɨ' lɨmwangebwina Kɨraazɨtɨyai Jizaazarɨ lɨmwangebwina dɨragɨnna kujɨwaakapɨjɨ nayaa wɨ'nɨpɨ'de'nanyɨ.
Gotɨyare yagaala aaya kaavɨlyabwinesɨ.
14“Maalɨkegaa' gɨmɨnyawɨnna wɨdeinyɨ,” dɨwe kɨrɨ' yagaala daza' pɨkarya githawasɨvanaabɨhe. 15Gɨmɨnyawɨnna yarai mabi'mayɨ yɨwɨjahaa' “Gotɨyarera gamɨre angevɨyaraavɨne yabwina yawɨranganɨma!” da'gɨzɨ yagaala daza' dangade'nanyɨ. Gamɨre angevɨyara Gotɨyai yuyagaa' mwaaidere kusɨlaanyarera. Kusɨlaanya' Gotɨyare angevaakɨra. Nabaai sɨmyai ange' yɨlarya'nei dɨragɨnna wɨdaakunɨkabaaibɨ' “Gotɨyare yagaalya' nebulyasɨ,” dɨragɨnna wɨdadɨvɨsavaakɨra. Nebulyavɨ pesavaakɨra. 16Nebula sa' Gotɨyare sabwina yagaala aaya kaavɨlya' naangaangesɨ. Nebula sa' Gotɨyai yoimavajalɨkurakyasɨ. Naangerɨna aaya kaavɨlyarɨna yoimavajalɨkurakya'na naangaangesɨ. Sa' daresɨ.
Sai a'mwei kɨlaa'nakei yɨma'naabɨwakerɨnera.
Kurya Tewaanyai neyɨbwarɨdaakuwakerɨnera
“Sahwai tewaanyalyɨ. Yɨda'maraangelyɨ.”
Sarɨ ejelɨyara tɨnna yawɨrangamwaasarɨnera.
Ajɨmya yuyangɨyaraayawɨnna sarɨna dɨwɨwaasalyɨ.
A'mwe Kwaakevakɨyara dɨragɨnna lɨmwamwaasalyɨ.
Gotɨyai byaanna dɨragɨnyavɨ makimwaawɨkerɨnera.
Currently Selected:
1 Timoti 3: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
