MIKA 4
4
Namarinta Tuhan ra tana' ti ra kaansayan
(Jis. 2:2-4)
1Paat ra orou rumatong
gunung intok Baloi ru Tuhan
masauk ra gunung ondo' masawat kaga',
masawat poyo kaga' intor ra gunung-gunung am bulur-bulur.
Ngaangai' bansa' guguluyur mongoi ra giu' no,
2am konilo,
“Ibok no magaloi takau ra bulur ru Tuhan,
mongoi ra Baloi ru Tuhan, i Aki Kapuuno' ru Israil.
Mangila' Io ra kasagaan Nano ondo' musiti' baalon takau;
maya' takau ra ralan ondo' pinili' Nano,
sabap ra pangilaan ru Tuhan i minatong intor ra Jirusalim;
intor ra Sion minindagu Io ra ngaangai' ulun Nano.”
3 Manalasai Io ra pansangaran ra gino ngai' ru bansa'-bansa',
ra gino ngai' ru kuasa'-kuasa' maayo ondo' mamaar am ondo' maalur.
Mampalarom ilo ra ilang-ilang nilo masauk ra radu',
am tutura' nilo masauk ra pais pamutul.
Bansa'-bansa' kalo boo makapangayou,
am kalo boo tumampos ra mangayou.
4 Ngaangai' ulun maayag ra kaansayan
giu' ra umo ru anggur am umo ru ara nilo;
kolondo' sangulun pana mampakalalaa' risilo.
Ginio noyo baal ondo' binantu' ru Tuhan Ondo' Maayo Kaga' Kuasa'.
5Moonong bansa' sumamba am gumagaya' ra dewa nilo galama', kaa' itakau sumamba am gumagaya' ra Tuhan, i Aki Kapuuno' takau ra sabuoi-buoi no.
Muli' Israil intor ra pamatiran
6Mindagu Tuhan, “Makasuku' paat ra Aku manimung ra ulun ondo' ukumin Kuno, ilo ondo' naimbolo' ralalom pamatiran. 7Ilo kalo makalulu' am maalur intor ra baloi, kaa' mangani' Aku ra kaluagan bagu risilo ondo' lakat poyo maayag, am masauk ilo ra rondo' bansa' ondo' maayo. Mamarinta Aku risilo intor ra Bulur Sion suku' ra sabuoi-buoi no.”
8Okou Jirusalim, intok ri Aki Kapuuno' mantamung ra ulun Nano koson sangulun magagalung, sumaguli' ra pusor bandar ru pamarintaan muno koson ragili. 9Kua najanjayan tangi' muno? Kua marualan kou koson ra ruandu' ondo' maganak? Sabap nati nua' okou kolondo' raja', am ulun-ulun mambilin muli minatoi noyo? 10Mamagun ru Jirusalim kau ngai', pambilor am pampalaa kano koson ra ruandu' ondo' tatanga' maganak, sabap raino mangiruan kau kalalaat ra bandar ti am mayan giu' ra padang. Mongoi kau kalalaat ra Babil, kaa' giu' no Tuhan mamayag ramuyun intor ra pantula'. 11Masuang noyo bansa' timinimung koson mamulunsar ramuyun. Konilo, “Jirusalim musiti' pusoon! Magilong akai ra bandar no masauk ra malunsai!” 12Kaa' bansa'-bansa' no kalo makapandai ra atan inatangan ru Tuhan. Kalo malimanan nilo ra ilo pinatimung koson ukumin, nogondo' koson ra gandum umungon koson agikon.
13Indagu Tuhan, “Mamagun ru Jirusalim kau ngai', ongoyo' ukumi' pantula' min! Mampasauk Aku ramuyun maikang koson ra sapi' ungkuyon ondo' makasangau basi' am makasalindu ra tambaga'. Masuang bansa' pinuso min, am kalangkayaan nilo ondo' naalap ralalom ru kalaatan masauk ra pataakon min Raki', Tuhan ru limbowon am tana' ti.”
14Mamagun ru Jirusalim kau ngai', timungo' noyo saujor min! Inawangan takau! Mamulunsar ilo ra tingganai ru Israil!
Currently Selected:
MIKA 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.