MIKA 3
3
Mononsol i Mika ra ngaangai' tingganai ru Israil
1Rongog kano, panguasa' ru Israil kau ngai'! Akau musiti' no mampalio ra katimpakan, 2kaa' masisang kau ra kaansayan am masaga' ra kalaatan. Ngaangai' bansa' Kuno iningkulitan min, am bininsang kual nilo intor ra bungul. 3Tinolon min ngaangai' bansa' Kuno. Iningkulitan min ilo am pinandak min bungul nilo. Kual nilo tinotok min koson ra akau monotok ra kual ondo' ansakon ralalom ru pagangan ru tana'. 4Nasaboi noyo paat ra akau mampiau ra Tuhan, kaa' kalo tumaam Io. Kalo mangiou Io ra pakiasian min, sabap nambaal kau noyo ra kalaatan.
5Ulun Kuno rinuung ru nabi-nabi ondo' nambantu' ra kaansayan ra ulun ondo' nangani' risilo ra ruit, kaa' nompololob am nakimantula' ra ulun ondo' kalo nangani' ra atan-atan. Indagu Tuhan ra nabi-nabi no, 6“Nabi kau ngai', pupus ru kaayagan min mamaar noyo. Orou masauk molondom ramuyun. Ginio sabap ra akau nampalayau ra ulun Kuno, kalo makaapu kau ra pinaintalang kapoam pakitanan. Kalo boo makapanala' kau ra atan-atan ayuk.” 7Ulun ondo' nanala' ra orou rumatong tinauyu' sabap nanala' ilo ra kalo motopot. Ngaangai' ilo asabin sabap i Aki Kapuuno' kalo tumaam risilo.
8Kaa' ra aku, Tuhan nanikop raki' ra kuasa' am Ambiluo Nano. Nangani' Io raki' ra arati' ru katimpakan, am niayuk kinabaani koson mambala' ra ulun ru Israil intor ra tula nilo. 9Rongogo' noyo ragu-ragu kutu, panguasa' ru Israil kau ngai', akau ondo' masisang ra katimpakan am mangulau ra katapatan masauk ra kasalaan. 10Akau nambaal ra Jirusalim, bandar ri Aki Kapuuno', mimpuun ra pamatayan am kolondo' katimpakan. 11Ilo panguasa' ru bandar nampaugar ra pamarintaan koson makaalap ra rasua, ngaangai' imam mambala' ra arati' ru Ukum koson makaalap ra gaji', am nabi-nabi niayuk nambala' ra pinaintalang koson makaalap ra ruit; kaa' mindagu ilo ngaangai' ra Tuhan mabaya' risilo. Konilo, “Kalo malumpa' takau ru karaat, sabap Tuhan mabaya' ritakau.”
12 Sabap ra kalaatan min, Sion raduon koson ra tana', Jirusalim pasaukon ra tuntur ru nalunsai, am bulur intok Baloi ru Tuhan masauk ra kataunan.
Currently Selected:
MIKA 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.