AGAI 2
2
Kinaindon ru Baloi ru Tuhan ondo' bagu
1Paat ra orou karuo ngoopor am rondo' ra sila' katulu' ra bilor raginio niayuk, minindagu poyo Tuhan ondo' pinasaboi galing ra Nabi Agai. 2Nanusub Tuhan ri Agai mampasaboi ra tanou ragitio ri Jirubabil, gabenor ru Jiuda no, Tingganai Maayo Imam Josua, am mamagun, 3 “Mokoondo' kia osoi intor ramuyun ondo' lakat poyo makakara' ra mapara' indon ru Baloi Kuno ragili? Raino ati kulaan baal nano, sumugut ra pamaguangan min? Maaru' lair ilain totopot kalo maindon. 4Kaa' pai' sangulun pana malawo guang! Rayuso' min kandoi no, sabap ra mabaya' Aku ramuyun. 5 Paat ra akau miningkual intor ra Misir, binantu' Ku noyo koson masalok mabaya' ramuyun. Raino pana lakat poyo mabaya' Aku ramuyun. Ginio ra kalo pana malaa' kau.
6 Kalo boo mabuoi uyogon Ku limbowon am tana' ti, lantur am raat. 7Luiron Ku ngaangai' pamarintaan am ngaangai' rapu' nilo ibiton ra giti, saboi Baloi Kuno mososok ra kalangkayaan. 8Ngaangai' mas am pirok ra tana' ti longgom Kuno. 9Baloi Kuno ondo' bagu maindon poyo intor ragili, am giu' no panganian Ku ra ulun Kuno ra kalangkayaan am kaansayan.” Ginio noyo ragu ru Tuhan Ondo' Maayo Kaga' Kuasa'.
Nansusunur Nabi Agai ra imam-imam
10Paat ra orou karuo ngoopor am apat ra sila' kasiam ralalom bilor karuo ra pamarintaan ri Raja' Darius, mindagu poyo Tuhan ra Nabi Agai. 11Mindagu Tuhan, “Pakitaak ra pamatasan ru imam-imam intor ra pangkuatan ragitio: 12Amon ru mokoondo' sangulun ondo' nangalap ra sangkinis kual intor ra taak simbalui ondo' pinataak ra Tuhan, am inibit no minuli' ralalom ru liningkom ra sukub nano, kalupus raginio sukub nano nakakambong ra ruti' kapoam rorondo' inansak, kapoam wain, kapoam umau jaitun, kapoam akanon ra atan ayuk, ngaangai' no kia masauk ra matulai niayuk?”
Paat i Agai nampasaboi ra pangkuatan no, taam imam-imam no, “Kalo.”
13 Kopongo raginio pangkuot poyo i Agai, “Amon ru mokoondo' ulun ondo' majamol sabap ra nangambong io ra baangkai, kalupus raginio nangambong rondo' intor ra akanon no, majamol kia poyo akanon no?”
Taam imam-imam no, “Iou.”
14I Agai pana mindagu boo, “Minindagu Tuhan ra aturan raginio masauk niayuk ra ulun ru Israil ra pagun ti am ra ngaangai' no ondo' ampos binaal nilo. Ginio ra atan ondo' pataakon nilo ra rasawat ru altar ti, masauk ra majamol.”
Nambantu' Tuhan ra barakat Nano
15Indagu Tuhan, “Ilai' noyo atan ondo' nasauk noyo ra kalo poyo orou raiti', paat ra Baloi Kuno kalo poyo pinuna'? Ati kulaan kia baal min paat ragili? 16Minongoi kau ilong ra tinuntur ra gandum am nangkara' ra makaalap 200 ngakilogram gandum, kaa' sotopot no mokoondo' 100 ngakilogram ayuk. Minongoi kau suuk ra 100 ngalito wain intor ra tuung ru wain, kaa' ondo' soroi 40 ngalito ayuk. 17Pinaratong Ku noyo angin malasu' am namparatu' ra rasam batu koson manutuk ra ngaangai' ampos ru umo min, kaa' lakat poyo marara' kau sumaguli' Raki'. 18Paat ra orou raiti', orou karuo ngoopor am apat ra sila' kasiam, batu maatang ra Baloi Kuno nopongo pinabanta'. Ilai' noyo atan ondo' masauk intor raino. 19Kabalu' pana kolondo' boo gandum ra natatang, am puun ru anggur, puun ru ara, puun ru dalima', am niayuk puun ru jaitun kalo poyo nangkawa', kaa' tumalimpuun raino barakaton Takamin!”
Bantu' ru Tuhan ri Jirubabil
20Paat orou raginio niayuk, orou karuo ngoopor am apat sila' kasiam, nangani' Tuhan ra tanou ondo' karuo ri Agai, 21koson posoboyon ri Jirubabil, gabenor ru Jiuda. Indagu Tuhan, “Kalo boo mabuoi uyogon Ku limbowon am tana' ti, 22mamparatu' ra pamarintaan, am manutuk ra kuasa' nilo. Palapiaton Ku kurita'-kurita' kuda am ulun nampaugar no; ngaangai' kuda matoi am ulun-ulun nangura' no mampatoi ra rondo' am bokon. 23Paat orou raginio, okou Jirubabil, ulipon Kuno, pasaukon Tokou koson mamarinta ralalom ru inggalan Kuno, sabap okou noyo ondo' pinili' Kuno.” Ginio noyo ragu ru Tuhan Ondo' Maayo Kaga' Kuasa'.
Currently Selected:
AGAI 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.