AGAI 1
1
Susuban ru Tuhan koson mambaal saguli' ra Baloi ru Tuhan
1 Paat ra bilor karuo ra pamarintaan ri Darius koson raja' ru Pirsia, paat ra orou kasaa' ra sila' koonom, mindagu Tuhan ondo' pinasaboi galing ra Nabi Agai. Tanou ru Tuhan no posoboyon ri Jirubabil anak ri Sialtiil, gabenor ru Jiuda, am niayuk ra Tingganai Maayo Imam Josua anak ri Jojadak.
2Minindagu Tuhan Ondo' Maayo Kaga' Kuasa' ri Agai, “Minindagu bansa' ragitio ra kalo poyo masaboi paat nano koson mambaal saguli' ra Baloi Kuno.” 3Kopongo raginio pinabala' galing ra Nabi Agai, minindagu Tuhan ra ulun Nano, 4“Akau ulun Kuno, kua ayan kau giu' ra ralalom ru baloi moonsoi, kaa' Baloi Kuno lakat poyo nalunsai? 5Ilai' noyo atan ondo' nasauk ramuyun! 6Masuang pinatias min ra sampug, kaa' nangkumos kau ra kalo kukula'. Makaakanon kau, kaa' kalo maukop koson mampabasug ramuyun. Makaruu' ru anggur kau kaa' kalo majala', makabayang kau kaa' kalo maukop koson mampalasu' ra inan. Gaji' ondo' inapu ru ulun mangandoi kalo maukop koson ra pakuan ru kaayagan nilo. 7Kalo kia nakaliman kau kua kasauk ngaangai' baal raginio? 8Raino, pagaloi no ra bulur-bulur koson mangalap ra tataun balak, am baalo' sagulio' Baloi Kuno. Aku pana mansayan ramuyun, am sambaan Aku poyo ra ralan ondo' sotopot no.
9Malansan kau ra masuang kumoson, kaa' ondo' naalap min totopot kalo kukula'. Paat ra akau magibit muli' kinumos no, sampuyon Ku ginio saboi makai' siabin ru angin. Kua baalo' Ku ginio? Baalon Ku ginio sabap ra Baloi Kuno lakat poyo nalunsai, kaa' akau ngaangai' bambal ayuk mambaal ra baloi ru sigagama'. 10Ginio sabap no ra rasam kalo rumatu' saboi kolondo' tinanom ondo' tumuu'. 11Naparatong Aku noyo ra tampio ra pagun ti saboi bulur, umo ru gandum, umo ru anggur, umo ru jaitun am ngaangai' tutuu' ra pagun ti mangapua'. Ulun, bibiag am ngaangai' tinanom min malumpa' ru tampio.”
Gumagaya' ulun ru Israil ra susuban ru Tuhan
12Kopongo raginio i Jirubabil am i Josua am niayuk ngaangai' ulun ru Israil ondo' siminaguli' noyo intor ra namatiran giu' ra Babilonia, giminagaya' ra ragu-ragu ri Nabi Agai, ulun sinusub ru Tuhan no. Nambaal ilo ra atan ondo' sinusub ru Tuhan risilo, sabap ra malaa' ilo ra Tuhan. 13Kopongo raginio nampasaboi i Agai ra ragu ru Tuhan risilo ra binantu' noyo ru Tuhan mabaya' risilo. 14Koson raginio noyo Tuhan nanugog ra guang ri Jirubabil, gabenor ru Jiuda no, Tingganai Maayo Imam i Josua, am ngaangai' ulun ondo' siminaguli' noyo intor ra pamatiran maa' raginio mambaal ra Baloi ru Tuhan Ondo' Maayo Kaga' Kuasa', i Aki Kapuuno' nilo. 15Napatalimpuun ilo ra kandoi gili ra orou karuo ngoopor am apat ra sila' koonom ra bilor karuo ru pamarintaan ri Raja' Darius.
Currently Selected:
AGAI 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.