2 TIMOTIUS 3
3
Orou pupus
1Karaan mu gitio! Mokoondo' masuang kapaganan masauk paat ra orou pupus no. 2Mokoondo' masuang ulun mangkara' ayuk boo ra kasingkatan nilo galama', maringkumaa' ra kalangkayaan, masumbung am lumimbau. Magasab ilo ra ulun, manggal ra matuo nilai, kolondo' paliso nilo ra paringkuanangan am kalo mangurumat ra ugama. 3Kalo motogom kapoam mangampun ilo ra ulun bokon am masaga' ayuk manimbaal ra ragu. Am poyo mataki' ilo malasu' guang, malaat ilo am masisang poyo ra kaansayan. 4Ilo mapandai mamparuung, jajajou am masumbung ayuk. Ilo maansayan ayuk ra katasuan ru kaayagan nilo galama', intor monogom ri Aki Kapuuno'. 5Kabalu' ra ilain ra sumugut ilo niayuk ra kaulayan ru ugama, kaa' marara' ilo ra kuasa' ru Tuhan ralalom kaayagan nilai. Moonsoi ru minggalur kou ra ulun koson raginio. 6Mokoondo' intor risilo ti mongoi ra baloi-kabaloi koson mamunduk ra guang ru ruandu' ondo' masuang tula am ondo' kinuasa' ru nansalinut kalaayan ru guang. 7Ruandu' ra gitilo magail ayuk makiila', kaa' kalo noyo makarati' ilo toojo ra katapatan no. 8 Mogondo' ra i Janis am i Jambris minanggal ilo ri Musa ra galing i, koson niayuk ulun raginio manggal ilo ra pangilaan motopot. Kalo matanda' pangkaraan nilo am pangintapatan nilo pana kolondo' onong. 9Kaa' kalo makasauk ilo ra atan ayuk pana, sabap ra makasalula' niayuk boo ra ulun masuang ra kolondo' noyo toojo katandaan nilo. Gitio mogondo' ra atan ondo' nasauk ri Janis am i Jambris ragili.
Pambilinan ra pupus
10Kaa' okou nakaintutun noyo ra ati kulaan pangilaan kuno, paliso kuno am kiralan ru kaayagan kuno. Am poyo nakaintutun kou ra togom kuno, pangintapatan kuno am guang mataan kuno am kaaratan kuno pana. 11 Okou nakakito noyo ra ati kulaan ru kaimbalaan am kapaganan kuli. Nakaintutun kou no ra ngaangai' atan ondo' nasauk giu' ra Antiokia, giu' ra Ikonium, giu' ra Listra am ngaangai' ru kaimbalaan kuli. Kaa' binayag aku ru Tuhan intor ra ngaangai' raginio. 12Sotopot no, ngaangai' ulun ondo' masaga' gumagaya' am sumimpung ri Jisus Kristus, makatuum niayuk ra kaimbalaan. 13Kaa' ulun ondo' mangalaat am mamparuung no, gumaai poyo kinalaat nilai no. Ilo mamparuung ra ulun ra bokon, kaa' ilo pana galama' maruung niayuk. 14Kaa' okou Timotius, guuto' noyo toojo atan ondo' inila' i noyo rirun am ondo' inintopot muno. Nakaintutun kou no ra osoi nangila' rirun i 15am nakaulig kou ra Buuk Kitab intor ra okou boborok ayuk poyo. Ginio makapangani' rirun ra kapintaran koson mokoowot ra pamayagan sabap ra pangintapatan mu ri Jisus Kristus. 16Ngaangai' ondo' tinulisan ra Buuk Kitab inimpuun ri Aki Kapuuno' am mokoonong toojo, ioginio mangila' ra atan ondo' motopot, koson mansawai am mampatanda' ondo' sala, am manulu' ra ulun koson makaaya' toojo ra kasagaan ri Aki Kapuuno'. 17Maa' raginio osoi ayuk mangangandoi ri Aki Kapuuno' makatampos toojo mampaugar ra atan ayuk kandoi moonsoi.
Currently Selected:
2 TIMOTIUS 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.