2 TIMOTIUS 2
2
Saujor ri Kristus ondo' gumagaya' Riso
1Timotius ondo' tagamin kuno, mikang kou toojo ra kataawan ondo' moowot takau sabap ra pasimpungan takau ri Jisus Kristus. 2Pangilaan kuli ondo' naining mu noyo ra saang ru masuang sasi', ilaan mu gitio ra ulun ondo' malansanan am ondo' matasik mangila' poyo ra bokon.
3Musiti' kou maya' maimbolo' koson sangulun saujor ri Kristus ondo' gumagaya' Riso. 4Sangulun saujor kalo sumiang io mambaal ra kaatangan nano galama' paat ra lakat poyo mangandoi ra saujor, sabap ra masaga' io mapabansuk ra tingganai nano. 5Sangulun masisimbul kalo mokoowot ra kamanangan amon ru kalo maya' io ra aturan no. 6Sangulun mantatanom ondo' mingkotog toojo mangandoi, io noyo toojo magulu makaalap ra tayar ru ampos ru tatanom nano. 7Guango' noyo pagabigan kuni, sabap ra Tuhan mangindangan rirun makarati' ra ngaangai' raginio.
8Karaa' noyo i Jisus Kristus, anak ru raja' Daut ondo' binayag noyo saguli' intor ra kapatayan. Ginio inila' ku ra Tanou Moonsoi ondo' pinasaboi kuli. 9Sabap ra pampasabayan kuno ra Tanou Moonsoi i noyo aku naimbolo', saboi ra aku binangkil koson ayuk ra sangulun malaat. Kaa' bala' ri Aki Kapuuno' ti kalo noyo maalap kabangkil. 10Ginio sabap ra tumaan aku ra ngaangai' ti koson ra kaatangan ru ilo ondo' pinili' noyo ri Aki Kapuuno', maa' raginio ilo pana mokoowot ra pamayagan ondo' taakin ralalom inggalan ri Jisus Kristus am ondo' mabaya' ra urumat mantilayun. 11Motopot toojo ragu ragitio:
“Amon ru matoi takau mabaya' Riso,
maayag takau niayuk mabaya' Riso.
12 Amon ru tumaan takau,
makapamarinta takau niayuk mabaya' Riso.
Amon ru magali' takau Riso,
Io pana magali' ritakau.
13Kabalu' pana kalo mampagagaya' takau Riso,
intopoton No bantu' Nali ritakau,
sabap ra kalo noyo maungga' bantu' Nano.”
Mangangandoi ondo' moompor
14Ngaangai' baal ragitio pakaraan mu ra pasimpungan ulun Kristian am pinsonon mu ilo ra saang ri Aki Kapuuno' ra kalo boo mantataam ra arati' ru rorondo' ragu. Kolondo' toojo onong ru gitio, ondo' ak am mampakajajou ayuk ra ulun ondo' mangkirongog no. 15Singkotog no toojo ra iowon kou ri Aki Kapuuno' koson sangulun mangangandoi ondo' kalo mauyu' ra baal ru kondoyon nano, kaa' makapangila' toojo ra katapatan intor ri Aki Kapuuno'. 16Inggaluri' noyo pantaaman ra kolondo' onong no am ondo' magasab ri Aki Kapuuno'. Raragu koson ragitio mampainggalur ayuk risilo intor ri Aki Kapuuno'. 17Pangilaan ru ulun-ulun raginio rumalat ra ulun ka ulun koson ra kinso gumaai ra inan. I Iminius am i Pilitus noyo ruo ngaulun intor risilo ti. 18Ilo kalo boo minaya' ra pangilaan ondo' motopot am mampakalayau ilo boo ra santayaran ru ulun ondo' mangintopot. Konilo, kaayagan saguli' intor ra kapatayan nasauk noyo. 19 Kaa' ondo' binaal ri Aki Kapuuno' no ra guang ru ulun Nano kalo maalap kauyog. Am minindagu Io noyo, “Tuhan makaulig ra osoi ulun Nano,” am poyo ra, “Osoi ayuk mangiou ra io ulun ru Tuhan, musiti' io tumalikur intor ra kasalaan nano.”
20Ralalom ru baloi ru ulun langkaya' nansalinut kakamot. Mokoondo' binaal intor ra pirok am mas, am niayuk ondo' binaal intor ra tataun kapoam tana' labu'. Masuai niayuk ondo' masalok pakayon am ondo' pakayon paat ra tambuluyon. 21Koson ra osoi ayuk ondo' mangandoi ra Tuhan, amon ru tumalikur intor ra ngaangai' kalaatan, saukon io boo mambaal ra maatang. Pilion io sabap ra mokoonong ra pagilangan ru tuan nano. Nakatampos io noyo pongondoyon ra atan ayuk baal moonsoi.
22Inggaluri' noyo kalaayan ru guang ru mamulok. Singkotog no sumauk ra ulun mabanis guang, ulun mangintopot ra Tuhan, motogom am mobonsoi risilo ondo' masalok makiindangan ra Tuhan mabaya' ra guang mapasau. 23Pai' noyo baya' ra pantataaman ondo' kolondo' onong. Nakatutun kou noyo ra ngaangai' ti mampasalula' ayuk ra pansasangaran. 24Kalo noyo moonsoi ulipon ru Tuhan no makapaliso makimansangor. Kaa' sotopot no moonsoi masamba io ayuk ra ngaangai' ulun, am sumauk ra mangingila' ra moonsoi ondo' mataan guang. 25Musiti' molomoi ragu nano ra io mampakatanda' ra ulun ondo' maanggal-anggal riso. Sabap ra maaru' lair i Aki Kapuuno' mangani' risilo ra kaluagan tumalikur intor ra tula nilo am makaulig boo ra katapatan. 26Koson raginio boo makatutun am makalabus ilo intor ra kuasa' ru tingganai ru riwato no, ondo' namparakop am nampajajal risilo mambaal ra kasagaan nano.
Currently Selected:
2 TIMOTIUS 2: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.