1 KORINTUS 2

Tanou ru pinatayan ri Kristus ra salip

1Pabukat kau ngaangai', paat ra aku minatong ramuyun am nampatanou ra katapatan ri Aki Kapuuno' ondo' kalo igondo' pinabala', kalo nampatanou aku ra ragu ondo' kalo naratian min am kalo binaya' ku kapintaran ru tana' ti. 2Sabap ra buoi ku soroi ramuyun, kolondo' rinagu ku ra bokon, ondo' ak am tanou ri Jisus Kristus am sauk ru pinatayan Nano ra salip. 3#Rin. 18:9Gili boo ra aku soroi ramuyun, malawo guang kuno am nalaa' aku toojo saboi nonontol. 4Tanou am pangilaan ondo' pinasaboi kuli ramuyun, kalo minaya' ra kapintaran ru ulun ondo' makabunduk ra guang, kaa' pinainono' ku ati kulaan kuasa' ru Ambiluo ri Aki Kapuuno'.#Ambiluo ri Aki Kapuuno'; Harfiah: Ambiluo Matulai. 5Kinooi ku raginio, koson pangintapatan min ri Kristus kalo inimpuun ra kapintaran ru ulun, kaa' inimpuun niayuk ra kuasa' ri Aki Kapuuno'.

Kapintaran ri Aki Kapuuno'

6Kabalu' pana koson raginio, koson ra ulun ondo' nakaintutun noyo toojo ra kaayagan Kristian, motopot mindagu aku risilo ra kapintaran. Kaa' kapintaran ti sala' ka intor ra tana' ti kapoam intor ra mangunguasa' ondo' mamarinta ra tana' ti, sabap ra pamarintaan koson raginio mapuso. 7Kapintaran ra rinagu kuli io no kapintaran intor ri Aki Kapuuno', ondo' kalo igondo' pinabala'. Ginio nga ra kalo poyo biningkal tana' ti, pinongo noyo ri Aki Kapuuno' kapintaran Nano koson itakau pana katulayon. 8Kolondo' sangulun intor ra mangunguasa' ru tana' ti nakarati' ra kapintaran raginio. Amon ru nakarati' ilo, maaru' kalo masalip nilo Tuhan ondo' matulai kaga' i. 9#Jis. 64:4Kaa' koson tinulisan ra Buuk Kitab,

“Atan ondo' kalo igondo' kakito am korongog ru ulun,

ondo' kalo igondo' karaa' ru ulun ra mabaal,

ginio inatang ri Aki Kapuuno' ra ulun ondo' motogom Riso.”

10Kaa'#Kaa'; Kukula' naskhah nakalair: Sabap ra. ondo' kalo igondo' pinabala' raginio pinabala' noyo ri Aki Kapuuno' ritakau ralalom ru Ambiluo Nano. Ngaangai' imumuyin toojo ru Ambiluo ri Aki Kapuuno', suku' ra kasagaan ru guang ri Aki Kapuuno' ondo' nabuni toojo no pana. 11Koson ra guang ru sasangulun, io galama' ayuk makapandai ra guangon nano. Nogondo' niayuk ri Aki Kapuuno', Ambiluo Nano galama' ayuk makapandai ra ngaangai' ru guangon Nano. 12Itakau kalo nokoowot ra kapintaran ru tana' ti, kaa' ondo' ayuk noowot takau, io no Ambiluo ri Aki Kapuuno'. Maa' raginio makarati' takau ra ngaangai' ondo' pataakon ritakau ri Aki Kapuuno'.

13Ginio nga ra sasanggilan ayuk akai mambala' ra katapatan ri Aki Kapuuno' risilo ondo' nokoowot noyo ra Ambiluo ri Aki Kapuuno',#risilo ondo' nokoowot noyo ra Ambiluo ri Aki Kapuuno'; kapoam: mabaya' ra ragu ondo' tinaakan ru Ambiluo Matulai. kalo mindagu akai sumugut ra kapintaran ru ulun, kaa' sumugut ra pangilaan ru Ambiluo Nano. 14Ulun ondo' kalo nokoowot ra Ambiluo ri Aki Kapuuno', io kalo makaapu ra taak intor ra Ambiluo no. Totopot kalo makarati' io ra taak no. Pangkaraan no, ginio sasambungon ayuk. Sabap ra kalo makarati' io amon ru kalo indanganon ru Ambiluo ri Aki Kapuuno' no. 15Ulun ondo' nokoowot ra Ambiluo ri Aki Kapuuno' makaimumui ra ngaangai' no, kaa' kolondo' sangulun pana makaimumui ra ulun no. 16#Jis. 40:13Koson tinulisan ra Buuk Kitab,

“Osoi kia makatutun ra guang ri Aki Kapuuno'?

Osoi kia makapangila' Riso?”

Kaa' pangkaraan takati mogondo' ri Kristus.

Currently Selected:

1 KORINTUS 2: TMT

Highlight

Copy

Compare