1 KORINTUS 1

1-2 # Rin. 18:1 Pabukat kau ngaangai', ulun Kristian ru bandar Korintus. Surat ti intor raki', i Paulus am niayuk i Sostinus.

Akau piniau noyo ri Aki Kapuuno' koson masauk ra ulun Nano, sabap ra akau longgom ri Jisus Kristus, nogondo' ra ngaangai' ulun ra ati ayuk intok ondo' sumamba ra Tuhan takau i Jisus Kristus, ioginio Tuhan nilo am niayuk Tuhan takau. Tinulisan ku surat ti ramuyun koson ra aku rasul ri Jisus Kristus, ondo' pinili' ri Aki Kapuuno' galama' maya' ra kasagaan Nano.

3Gama' ru i Aki Kapuuno', Ama' takau, am i Jisus Kristus manaak ramuyun ra barakat am pabansayan.

Barakat intor ri Aki Kapuuno' ralalom inggalan ri Jisus Kristus

4Masalok aku maringkuanang ri Aki Kapuuno' koson ramuyun, sabap ra nakaapu kano ra asi' Nano ralalom inggalan ri Jisus Kristus. 5Sabap ra masuang boo katutunan min ralalom ngaangai' baal, niayuk ondo' raguon am kapandayan min. 6Ginio mampakito ra tanou intor ri Kristus i siminoroi toojo ra guang min, 7saboi kalo matatakan kau ra atan ayuk pana taak intor ri Aki Kapuuno', buoi min maginaa ra ratangan saguli' ru Tuhan takau, i Jisus Kristus. 8Io noyo galama' mampaikang ramuyun saboi ra orou pupus, maa' raginio akau kalo mauwan ra makasala ra orou ratangan Nano. 9I Aki Kapuuno' no kalansanin toojo. Io no ondo' nampiau ramuyun koson masimpung ra Anak Nano, i Jisus Kristus, Tuhan takau.

Pantutuliaran ru rondo' pasimpungan ulun Kristian

10Pabukat kau ngaangai'. Ralalom inggalan ru Tuhan#ralalom inggalan ru Tuhan; kapoam Ra kuasa' ru Tuhan. takau, i Jisus Kristus, kitaakon ku toojo ra pakarati' kano ra rondo' am bokon, maa' raginio kalo mantutuliar kau. Pogogondoo' min noyo guang am niayuk kasagaan min. 11Sabap ra mokoondo' kukula' ngaulun pabukat ri Koloi nambala' raki' ra nansasangor kau. 12#Rin. 18:24Kon kutu ra sigagama' kau mindagu ra, “Maya' aku ri Paulus,” am kon ru bokon, “Maya' aku ri Apolos,” kon poyo ru bokon, “Maya' aku ri Pitrus,” am mokoondo' niayuk mindagu ra, “Maya' aku ri Kristus.” 13Kaa' ilo ondo' mangintopot ri Kristus kalo maalap katatayar. Pai' ru aku minatoi sinalip koson ra kaatangan min. Akau pana pai' ru riniu' koson masauk ra maamaya' kuno.

14 # Rin. 18:8; 19:29; Rm. 16:23 Maringkuanang aku ri Aki Kapuuno' ra kalo nampariu' aku ramuyun, ondo' ayuk riniu' kuno, am i Krispus am i Gayus. 15Ginio ra kalo sangulun pana makaindagu ra, “Riniu' no aku koson masauk ra maamaya' ri Paulus.” (16#1 Kor. 16:15O iou, i Stipanus sambaloi tupo riniu' kuli; kaa' bokon intor raginio, guang ku kolondo' boo riniu' kuno.) 17Sinusub aku ri Kristus sala' ka mampariu' ra ulun, kaa' mampabala' ra Tanou Moonsoi; am ginio pana musiti' ku baalon, kaa' kalo maya' ra kapintaran ru ulun ayuk toojo, maa' raginio pinatayan ri Kristus ra salip kalo mairuan ra kuasa'.

Kuasa' am kapintaran ri Aki Kapuuno' soroi ri Kristus

18Tanou ru pinatayan ri Kristus ra salip i koson ayuk ra ragu sasambungon ra ulun makalayau, kaa' ritakau ondo' bayagon, ioginio mampakito ra kuasa' ri Aki Kapuuno'. 19#Jis. 29:14Sabap ra tinulisan noyo ra Buuk Kitab:

“Kon ri Aki Kapuuno', ‘Pusoon Ku kapintaran ru ulun mapintar,

am liomon Ku pangaratian ru ulun mapandai.’ ”

20 # Ayp. 12:17; Jis. 19:12; 33:18; 44:25 Intor raginio, atan onong ru ulun mapintar? Atan onong ru ulun mapandai? Am atan poyo onong ru ulun ru tana' ti ondo' mapandai tumaam? Sabap ra i Aki Kapuuno' nampakito noyo ra kapintaran ru ulun ru tana' ti sotopot no sasambungon.

21Sumugut ra kapintaran Nano, nangaru' i Aki Kapuuno' ra osoi ayuk kalo makaulig Riso maya' ra kapintaran nano galama'. Kaa' Io no mamayag risilo ondo' mangintopot Riso minumbaya' ra tanou ondo' posoboyon maino, ondo' karaan ru ulun ru tana' ti ra ragu sasambungon. 22Ulun Jaudi kumakikito ra kaimuagan koson inono' nilo, am ulun ru Junani mangkara' ayuk ra kapintaran ru tana' ti. 23Kaa' itakau ti mampatanou ayuk ra tanou ri Kristus ondo' minatoi ra sinalip. Tanou raginio mampakaruol ra guang ru ulun ru Jaudi am poyo karaan ru ulun sala' ka Jaudi ragu sasambungon. 24Tanou raginio ralan ri Aki Kapuuno' mampakito ra kuasa' am kapintaran Nano risilo ondo' mangintopot Riso – iou pana ulun ru Jaudi kapoam sala' ka Jaudi. 25Sabap ra ondo' karaan ayuk koson ra sambung ri Aki Kapuuno', sotopot no mapintar toojo ka kapintaran ru ulun; am pinatayan ri Kristus ondo' ilain ayuk ra kalawaan ri Aki Kapuuno', sotopot no maikang toojo ka ikang ru ulun.

Kuasa' ri Aki Kapuuno' am kalawaan ru ulun

26Pabukat kau ngaangai', karaa' min ati kulaan baal min paat ra akau piniau ri Aki Kapuuno'. Maya' ra pagilangan ru ulun, kalo masuang intor ramuyun mapintar, makakuasa' kapoam makapangkat. 27Siningon ri Aki Kapuuno' nampili' ra ondo' kinara' ra sasambungon ru ulun ru tana' ti, koson mampakauyu' ra ulun-ulun mapintar no. I Aki Kapuuno' niayuk nampili' ra ondo' kinara' ra malawo ru ulun ru tana' ti, koson mampakauyu' ra ulun-ulun maikang no. 28Pinili' No ondo' karaan ru ulun ru tana' ti koson kolondo' pangkat, kalo maatang am kolondo' onong. Maa' raginio maliom boo ri Aki Kapuuno' ondo' karaan ru ulun ru tana' ti maatang. 29Intor raginio, kolondo' sangulun pana lumimbau ra saang ri Aki Kapuuno'. 30Kaa' i Aki Kapuuno' noyo ondo' nampasimpung ramuyun ri Jisus Kristus. Am ralalom ri Kristus, i Aki Kapuuno' nangani' ritakau ra kapintaran Nano. Ralalom inggalan Nano niayuk, pinobonsoi am pinalabus takano ri Aki Kapuuno'#pinobonsoi am pinalabus takano ri Aki Kapuuno'; Harfiah: nangiou. masauk ra ulun Nano ondo' mangandoi ayuk Riso. 31#Jir. 9:24Ginio ra tinulisan ra Buuk Kitab, “Osoi ayuk masaga' lumimbau, moonsoi io no mongompor ra atan ondo' binaal ru Tuhan.”

Currently Selected:

1 KORINTUS 1: TMT

Highlight

Copy

Compare