Isaya 34
34
Jehova mbwazoobeteka bamasi
1Amuswene kufwaafwi nubamasi, mumvwe. Amuswiilile numisyobo yabantu. Nyika imvwe azyoonse zili mumo. Luwa luswiilile azyoonse zizwa mulindulo. 2Nkaambo Jehova wakalalila masi oonse, wanyemena makamu makamu aabo oonse. Wabanyonyoona, wabaabila bujayi. 3Bajayidwe babo bayoosoowegwa, nkabela mitunta yabo iyoonunka nu. Zilundu ziyooenzunuka kubulowa bwabo. 4#Int 102:26; Ezk 32:7; Joel 2:31; 2 Pet 3:10; Mt 24:29; Mk 13:25; Lk 21:26; Ciy 6:13-14Makamu oonse aakujulu ayooenzunuka; majulu oonse ayoovungailwa mbuli ibbuku, amakamu aao oonse ayoopusama mbubonya mbuli matu aamisaansa mbwaapusama, ambuli mikuyu mbwiipusama. 5#Mal 1:4; Is 63:1-6; Jer 49:7-22; Ezk 25:12-14; 35:1-15; Am 1:11-12Nkaambo ipanga lyangu lyanywa bulowa cakukolwa kujulu. Lino liyooseluka abantu ba-Edomu abantu bamatusi aangu kuti babetekwe. 6#Is 63:1; Zef 1:7Ipanga lya-Jehova lilizwide bulowa, lyaneneesegwa mafuta, bulowa bwambelele abwampongo, amafuta aansa zyabagutu, nkaambo Jehova ulijisi cipaizyo mu-Bozira abujayi bupati munyika ya-Edomu. 7Nkabela basefu bayoowisigwa abo, basune abacende boonse. Nyika yabo iyookolwa bulowa, abulongo bwabo buyooneneesegwa mafuta. 8Nkaambo Jehova ulijisi buzuba bwakuliya nkoto, mwaka wakubweedezya milandu yazibi izyakacitilwa Zioni. 9Tulonga twacisi ca-Edomu tuyoosanduka kuba bunzuka, abulongo bwaco buyooba sulufa, anyika yaco yoonse iyooba bunzuka butentesya. 10#Ciy 14:11; 19:3Tacikooyoozima abuniini isikati na masiku. Busi bwaco buyoosuntumuka lyoonse mane kukabe kutamani, Kuzwa kuzyalani limwi kusikila kuzyalani limwi ciyooba matongo, Takukooyooba bantu bainda nkuko mazuba oonse mane kukabe kutamani. 11Sifundwe anungu mbebayoocivuba, tumba acikwangala mbebayookala nkuko. Uyoovungulula alincico ceelesyo calupilingano azipimyo zyalupilingano. 12Basilutwe baco, taakwe uucili nkuko bwami nibwaambwa, abapati baco boonse tabacibonwi limbi. 13#Is 32:13; Hos 9:6Mamvwa ayoomena atala lyamaanda aaco aabwami. Lweemya amikoka ziyoomena mumaanda aaco aakulwisya. Ciyooba cikalilo cabamwaba alubuwa lwampoo. 14Banyama bamusokwe bayooswanana abaumpe, abalo bagutu bayoolila umwi aumwi kukwiita mweenzinyina. Muzimu wamasiku uyookala-kalamulincico akulijanina cilyokezezyo. 15Mulala uyooyaka citeente cakwe nkuko, uyoozyala mai, uyookonkola akubunganya bana bakwe muceenzule cakwe. Abalo babimbe bayoobungana nkukonya, umwi aumwi uli amweenzinyina. 16#Int 56:8; Dan 7:10; Mal 3:16Amuyandaule makani mubbuku lya-Jehova, mwaabale. Akati kabaabo takukooyooba umwi uubulika. Takukooyooba mwanakazi uubula mweenze wakwe, Nkaambo mulomo wangu nguwakalailila obo, amuuya wangu nguwakababunganya. 17#Int 78:55; Tus 16:33Ngonguwe uwakabawaalila cisolo, ajanza lyakwe ndelyakaceelesya akubaabila. Bayoocivuba lyoonse, bayookala mumonya mazuba oonse amuya mazyalani amazyalani.
Currently Selected:
Isaya 34: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
