Isaya 33
33
Bantu ba-Leza mbubazoojana bulemu
1 #
Hab 2:8; Ciy 13:10 Maawe kulinduwe, webo owakasaala bamwi pele tonasaalidwe omwini, owakacitila bamwi bumpele pele tabana kukucitila bumpele yebo. Wamana kusaala uyoosaalwa omwini, waleka kucita bumpele uyoocitilwa bumpele ayebo. 2O Jehova, kotufwida luzyalo, nkaambo twali kululangila. Koba kuboko kwesu zifumo zyoonse alufutuko lwesu kuciindi camapenzi. 3Lupyopyongano mbulwamvwigwa bamasi bacija. Mbowalibusya bantu bamwaika. 4Elyo imbono zilasaalwa mbubasaala bacamusokonya; bantu balasotoka alinzizyo mbuzisotoka zisozi. 5#Int 97:9Jehova ulisumpwidwe, nkaambo ulakala kujulu. Ulazuzya Zioni lubeta abululami. 6#Tus 1:7; Mt 6:33Uyooba kusyomeka kwaziindi zyako. Lufutuko abusongo aluzibo, zyoonse ziyoovula. Kulemeka Jehova nee cintu cakwe ciyandisi.
7 #
2 Bam 18:18
Amuswiilile basilumamba babo mbubalila anze! Batumwa baluumuno balalila loko. 8#Bab 5:6; 2 Bam 18:14Migwagwa yabula bantu, basilweendo tababoneki limbi. Wajaya cizuminano, wasampaula minzi, talemeki bantu. 9Nyika ilalila, ilanyana. Lebano wafwa insoni, wapusama. Saroni waba inkanda buyo. Ku-Basana aku-Karimeli misamu yoonse yatikinizigwa. 10#Dt 32:36,43; Int 12:5; Is 42:13,14; Zef 3:8Lino Jehova wati, Ndabuka, nkasumpulwe, nkalemekwe. 11Muyoominta buungu, muyoozyala zisikosiko buyo. Luyooyo lwanu luyooba mulilo wakumutenta, 12Bantu bayooba mbuli kutentwa kwamulambo, mbuli mamvwa aagonkedwe aatentwa mumulilo.
13Inywe nemuli kule, amuswiilile ncindacita. Anywebo nemuli kufwaafwi, amuzibe inguzu zyangu mbuzibede. 14Basizibi bamu-Zioni balayoowa, basimasampu bajatwa kukankama. Nguni akati kesu uuti kale amulilo uutentesya? Nguni akati kesu uuti kale akutentwa kutamani? 15Oyo uuenda mubululami, uuamba zintu ziluleme, uusampaula impindu iizwa kukupenzya bantu, uukaka kutambula masinkamulomo, uusinka matwi aakwe kuti atamvwi makani aabulowa, akufwinya meso aakwe kuti atalangi bubi, 16ngonguwe uuti kale kujulu. Macijilo aakwe ayooba mampangala aasyomeka aamumandomba, Cilyo cakwe uyoocipegwa, amaanzi aakwe akunywa taakooyoobulika. 17Meso aako ayoobona mwami mubweebesi bwakwe, ayoobona cisi cakwe citandabede kule. 18#1 Kor 1:20Moyo wako nuuyeeya bantu ibakayoosya, uyoolibuzya kuti, Ino uli kuli mabbalani? Uli kuli oyo iwakali kupimya mali aamutelo? Uli kuli oyo iwakali kubala maanda malamfu? 19#Jer 5:15Tokooyoobona limbi bantu bakali, bantu abo baamba mwaambo muyumu ngotamvwi, mulaka mweenzu ngotakonzyi kuswiililisya. 20Pe! Langa Zioni munzi wamapobwe esu. Meso aako ayoobona Jerusalemu, cikalilo cakuliiba, itente litatuntuliki litanonkwedwa abuniini manembe aalyo, azyalo intambo zyalyo tazinunsuki. 21#Zek 2:5Nkaambo oko Jehova Mulemu uyootubeda mucibaka camilonga iikwazeme atulongalonga. Oko takukooyooinda bwaato bukwasulwa ankasi niciba cikwepe cilemu. 22#Int 44:4; Mt 21:5; Ciy 19:16Nkaambo Jehova ngumubetesi wesu, Jehova ngusimilao wesu, Jehova ngu-Mwami wesu, ngonguwe uuti katufutule. 23Intambo zyatebununwa; teebakakonzya kuyumya munsemu wabwaato, teebakakonzya kuyanika zisani zyakweenzya. Elyo imbono zinji loko zyakaabwa, abalo balema bakasaala imbono. 24#Is 12:2; Rom 11:27Lino takukooyooba naba omwe akati kabantu banyika uuamba kuti, Ndaciswa. Bantu boonse bakede mulinjiyo bayoolekelelwa milandu yabo.
Currently Selected:
Isaya 33: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
