Ezekieli 6
6
Makani ngaakasinsima aazilundu zya-Israyeli
1Lino ijwi lya-Jehova lyakandisikila, liti, 2#Ezk 36:1O mwana amuntu, tambya meso aako kuzilundu zya-Israyeli, usinsime aanzizyo. 3#Lev 26:30Amba kuti, Nuzilundu zya-Israyeli, amuswiilile majwi aa-Mwami Jehova. Mbuboobu Mwami Jehova mbwaambila zilundu atulundulundu, meenga amakuti. Ncobeni njoomuletela ipanga, alimwi njoonyonyoona zipaililo zyanu. 4#Jer 44:28; Ezk 5:2,12Zipaililo zyanu ziyoonyonyoonwa, zikozyano zyanu ziyoopwayaulwa, abantu banu bayoowida ansi balijayidwe kubusyu bwamizimu yanu. 5Njoolazika mitunta yabana ba-Israyeli kubusyu bwamizimu yanu, azifuwa zyanu njoozimwaya cakuzyunguluka zipaililo zyanu. 6Koonse koonse nkumukede, minzi yanu iyooba matongo azipaililo zyanu zyakuzilundu ziyoobula bantu, kuti zipaililo zyanu zibe matongo akubula bantu, zikozyano zyanu zipwayauIwe akuloba, tukombelo twanu tumwayigwe, amilimo yanu iziminganisigwe. 7Bantu bayoowa ansi baliyasidwe akati kanu, aboobo muyooziba kuti ndime Jehova.
8Pele njoomusyaazizya bamwi baloboka kuzwa kupanga lyabamasi ciindi eco nimuyoomwaikila akati kazisi. 9#Int 78:40; Is 7:13; My 15:39; Ezk 20:7,43; Lev 26:39; Job 42:6Lino abo balobokede bayooibalukwa ndime akati kazisi nkubatoledwe mubuzike, nkaambo njootyola myoyo yabo yabwaamu iindisiide ameso aabo aabwamu aalanga zikozyano zyabo, lino bayooba cisesemyo mumeso aabo beni nkaambo kabubi bwabo mbubacita akaambo kazisesemyo zyabo zyoonse. 10Nkabela bayooziba kuti ndime Jehova, alimwi mapenzi aya oonse ngendaamba kubaletela teensi aabuyo.
11 #
Lev 26:36; Ezk 12:16; 5:12 Mbuboobu mbwaamba Mwami Jehova. Kamba amaanza aako, lyata acituta cako, akwaamba kuti, Maawe! nkaambo kazisesemyo zibi zyoonse zyaluzubo lwa-Israyeli; nkaambo bayoojazigwa ipanga apamba amalwazi. 12Oyo uuli kule uyoofwa bulwazi, ayooyo uuli kufwaafwi uyoojazigwa ipanga, ayooyo uusyeede uuvunidwe uyoofwa inzala. Aboobo njoozuzikizya bukali bwangu kulimbabo. 13#Jer 2:20; 15:2,3; Hos 4:13; Is 57:5Muyooziba kuti ndime Jehova, ciindi eco bajayidwe babo nibanoozoolede akati kazikozyano zyabo cakuzyunguluka zipaililo zyabo, atala azilundu zyoonse zilamfu, amitwe yoonse yamalundu, mucenzule camisamu yoonse mitete, kunsi lyamibanga yoonse iivovwene, mumasena oonse nkubakali kucitila mizimu yabo tusamu twatununkilizyo. 14#Is 5:25; My 33:46Njootandabika ijanza lyangu kukubalwisya, njoocita kuti nyika ibe matongo aabula bantu, mumasena oonse nkubakede kuzwa kunkanda akusikila ku-Ribila. Lino bayooziba kuti ndime Jehova.
Currently Selected:
Ezekieli 6: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
