Ezekieli 7
7
Mbwaakasinsima mamanino aacisi
1Lino ijwi lya-Jehova lyakandisikila, liti, 2#Dt 32:20; Malo 4:18; Am 8:2; Mt 24:6Uwe O mwana amuntu, mbuboobu Mwami Jehova mbwaambila nyika ya-Israyeli. Asika mama nino! Asika mamanino kumabazu aanyika oonse one. 3Mamanino amusikila, lino ndaamba kumutumina bukali bwangu. Njoomubeteka mbubonya mbuli inzila zyanu akumubweedezya bulumbu bweelede milimo yanu iisesemya. 4#Ezk 5:11; 6:7Meso aangu taakooyoomufwida luse, alimwi nsikooyoomufwida luzyalo pe, Njoomubweedezya bulumbu bwanzila zyanu, milimo yanu iisesemya niicili akati kanu. Lino muyooziba kuti ndime Jehova.
5Mbuboobu mbwaamba Mwami Jehova. Mapenzi alasika atala lyamapenzinyina! Ncobeni asika! 6Mamanino asika! Mamanino asika! Amubukila! Ncobeni asika! 7#Is 13:22; 1 Pet 4:17; Ezk 12:23-25Asika malweza, uwe nokede munyika! Ciindi casika, Buzuba buli afwiifwi. Mbuzuba bwalupyopyongano, tabuli buzuba bwacikwala cakukondwa atala azilundu pe. 8#Int 79:6; Is 42:25; Jer 7:20; Ezk 20:8Kabe kaindi, ndaamba kumutilila bukali bwangu akuzuzikizya lunyemo lwangu kulindinywe, Njoomubeteka mbubonya mbuli inzila zyako akukubweedezezya bulumbu bwamilimo yako iisesemya. 9Meso aangu taakooyoomufwida luse, alimwi nsikooyoomufwida luzyalo pe, Njoomubweedezya bulumbu bwanzila zyanu, milimo yanu iisesemya niicili akati kanu. Lino muyooziba kuti ndime Jehova.
10Ncobeni buzuba bwasika, Ncobeni bwasika, Malweza amusikila, Musamu wasyuuka. Micelo yakulisumpula yafulula. 11#Jer 6:7; 16:5Luuni lwabuka, lwaba musako wabubi. Takukooyoosyaala naba omwe akati kabo, niziba imbono zyabo, nibuba buvubi bwabo. Takukooyooba kulisumpula akati kabo. 12Ciindi casika. Buzuba buli afwaafwi, Sikuula atasekeleli, alakwe sikuulisya atalili, nkaambo bukali bwasikila boonse buyo. 13Sikuulisya takooyoopiluka kumakwebo aakwe, nekuba kuti bacili baumi, nkaambo cilengano cilaamba aamakamu aabo boonse. Bukali tabukooyoopiluka pe, nkabela takukooyooba naba umwi uuliyumya mububi bwabuumi bwakwe.
14Balizya mweembo, babamba zintu zyoonse, nekubaboobo taakwe uuinka kuyoolwisya, nkaambo bukali bwangu bwasikila makamu aabo oonse buyo. 15#Dt 32:25Ipanga lyaboneka anze, malwazi anzala zyaboneka mukati. Oyo uuli musokwe ulajazigwa ipanga, ayooyo uuli mumunzi inzala abulwazi nzeziyoomujaya. 16#Ezk 6:8Na nkubali bamwi akati kabo baloboka, bayooba atala amalundu, bayooba mbuli inziba zyamukuti, balaya buvuluvuta, umwi aumwi nkaambo kamilandu yakwe. 17#Is 13:7Maanza oonse akompaama, mazwi oonse ateta buyo mbuli maanzi. 18#Jer 6:26; Int 55:5Basama zisani zyamasaka, Kuyoowa kwabavumba. Bweeme bulaboneka mumasyu aabo oonse, alubala mpoluli amitwe yabo yoonse. 19#Tus 11:4; Zef 1:18; Ezk 44:12Bayoosowa insiliva yabo mumigwagwa, ayalo ingolida yabo iyooba mbuli cintu cisofweede, Ingolida yabo ansiliva yabo zyoonse zilakacilwa kubavuna mubuzuba bwabukali bwa-Jehova. Tazikonzyi kubakutya nikuba kuzuzya mada aabo, pe, nkaambo nzenzizyo zyaba cilebyo cakubawisya muzibi. 20#Jer 7:30Bakali kulikankaizizya bweebesi bwazyo, bakali kuzicitya zikozyano zibi zisesemya, aboobo ndacita kuti zibabede cintu cisofweede. 21Njoozyaaba mumaanza aabazwakule kuti bazisaale, abalo basizibi banyika bayoozitola, nkabela bayoozisofwaazya. 22Njoofutatika busyu bwangu kuzwa kulimbabo, nkabela bayoosofwaazya ciyobwedo cangu. Bafumpi bayoonjila mulincico, bayoocisofwaazya, akucimwaya.
23 #
Matl 9:6; 2 Bam 21:16; Int 10:8 Nyika ilizwide milandu yabulowa, amunzi ulizwide malwani. 24#Hab 1:6Njooleta babi babamasi kuti bakavube maanda aabo. Njoomanisya kulisumpula kwabayumu, amasena aabo aasalalisya ayoosofwaazigwa. 25Mapenzi naazoosika, balayandaula luumuno, pele tabakooyoolujana pe. 26#Dt 32:23; Int 74:9; Malo 2:9; Mal 2:7-9Malweza alasika atala lyamalwezanyina, makani aayoosya alamvwigwa cakutobela makaninyina. Bayooyandaula cilengano kumusinsimi, pele mulao uyooloba kubapaizi, alulayo luyooloba kubanene. 27Mwami ulalila, basilutwe bacisi balasama cikobela cansoni, maanza aabantu bacisi alakankama. Njoobacitila mbubonya mbuli inzila zyabo, njoobabeteka mbubonya mbubabeteka beni, nkabela bayooziba kuti ndime Jehova.
Currently Selected:
Ezekieli 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
