Ezekieli 27
27
Lwiimbo lwakulila Turo
1Lino ijwi lya-Jehova lyakandisikila, liti, 2#Ezk 26:17Uwe O mwana amuntu, imba lwiimbo lwakulizya Turo. 3#Ezk 28:2; Is 23:3Ambila Turo kuti, Uwe nokala kumanjililo aalwizi, nosambazya bantu bamisyobo misyobo kunkomwe zinji, mbuboobu mbwaamba Mwami Jehova. O Turo, webo waamba kuti, Ndeebeka loko. 4Migaano yako ili mukati kalwizi. Bayaki bako bakubotya loko, 5#Dt 3:9Zisamu zyako zyoonse bakaziyasya misamu yakupresi iyakazwa ku-Seniri. Bakabweza musamu wakedari waku-Lebano kuti bakuyakile kasamu kandembela. 6#Jer 2:10Inkasi zyako bakazibezya mibanga yaku-Basani, acibuye cako bakacicita azisamu zyamizimbwa zizilulwidwe minyanga iyakazwa kunkomwe zyaku-Kitimu. 7#Matl 10:4Cisani cako cakweenzya cakalicitidwe amasani aamanyengwemanyengwe aazwa ku-Egepita, kuti cibe citondezyo cako; acivunisyo cako cakali masani aasalala-salala akamweemvwe aakazwa kunkomwe zyanyika ya-Elisa. 8Bantu baku-Zidoni abaku-Arivadi mbobakali basikukwasula bako, abantu bacenjede ba-Zemeri bakali mukati kako, mbombabo bakali basikukweenzya. 9#Jos 13:5Bapati baku-Gebali abantu bacenjede bankuko bakali mukati kako, mbombabo bakali kusinkasinka myoombe yako, Maato oonse aakulwizi akali mukati kako, abalo basimaato boonse, kuti basambazyanye makwebo.
10 #
Jer 46:9; Ezk 30:5 Ba-Persia aba-Ludi aba-Puti bakali mumpi yako, bakali basilumamba bako. Mulinduwe mobakali kwaanzika intobo angowani. Bakali kukubotya. 11Bana ba-Arivadi aba-Heleki bakaliimvwi amalambo aako buzyungulukide, abalo ba-Gamadi bakali amaanda aako malamfu. Bakali kwaanzika intobo zyabo amalambo aako buzyungulukide, Bakakubotya loko.
12 #
2 Mak 20:36
Ba-Tarisi bakali kusambazyanya ayebo nkaambo kabuvubi bwako bunji bwamisyobo misyobo: insiliva abutale amundalila amukuba, zyoonse buyo bakali kuzisambazya imbono zyako. 13#1 Mak 1:5; Joel 3:6Ba-Javani aba-Tubali aba-Meseki bakali kusambazyanya ayebo. Imbono zyako bakali kuzyuuzya bantu azibelesyo zyamukuba. 14#Matl 10:3; 1 Mak 1:6Bantu baluzubo lwa-Togarima bakali kuuzya imbono zyako imbizi amabbiza aankondo ambongolo. 15#Matl 10:7; 1 Mak 1:9Bana ba-Dedani abalo bakali kusambazyanya ayebo. Nyika zyankomwe zinji zyakali mumaanza aako, zyakali kusambazyanya ameja aanzovu azisamu zyamucenje. 16Ba-Aramu bakali kusambazyanya ayebo nkaambo kambono zyako zinji. Bakali kuuzya mabwe aayandika aanofeki, amasani aasalala salala, amasani amanyengwe-manyengwe, amasani aatuba, amabwe aabekema amabwe aasalala pyu. 17#1 Bam 5:9; Inc 12:20Ba-Juda anyika ya-Israyeli bakali kusambazyanya ayebo. Bakali kuuzya imbono zyako bulotwe bwaku-Miniti azinkwa abuci amafuta amabbona. 18Bantu baku-Damasko bakali kusambazyanya ayebo nkaambo kabunji bwambono zyako zyamisyobo misyobo. Imbono zyako bakali kuzyuuzya waini waku-Heliboni, aboya butuba bwambelele, 19awaini waku-Uzali. Abutale bufulidwe atununkilizyo amisale, zyoonse zyakauzigwa makwebo aako. 20#Matl 25:3Ba-Dedani bakali kusambazyanya ayebo amasani mabotu aakutantya awo. 21#Matl 25:13; 1 Mak 1:29Ba-Arabu abamwi boonse baku-Kedari bakali kukugwasya kukusambala tubelele abagutu ampongo nzebakali kuuzya. 22#Matl 10:7; Int 72:10,15; Is 60:6Basambazi baku-Seba abaku-Raama bakali kusambazyanya ayebo. Bakali kuuzya imbono zyako misamu mibotu loko, amabwe aayandika aamisyobo misyobo, angolida. 23#Matl 11:31; 25:3; 2 Bam 19:12; Inc 7:4Abalo ba-Harani aba-Kane aba-Edeni abasambazi baku-Seba aba-Asuri aba-Kilimadi, boonse buyo bakali kusambazyanya ayebo. 24Bakali kusambala zyamalebaleba, azikobela zyakamwemvwe azyamanyengwe manyengwe, amasasa aamabala mabala aatungidwe kabotu. Ezi zyoonse bakali kuuzya nzizyo. 25#Is 2:16; Ciy 18:11-19Maato aa-Tarisi ngaakali kuyumuna zyakusambala zyako,
Wakazuzigwa akulemenwa loko mukati kalwizi. 26#Int 48:7Basikukwasula bako bakusisya ampwampwa, lino muuwo wakujwe wakupwaya akati kamaanzi aalwizi. 27#Tus 11:4Buvubi bwako, makwebo aako, zyakusambala zyako, basibwaato bako, basikusika bako, basikumamika bako, bantu mbosambazyanya abo, basilumamba bako boonse bali mukati kako, ankamu yoonse iili mukati kako, boonse buyo bayooinkila mubbonze lyalwizi mubuzuba bwabuwe bwako. 28Limvwigwe buyo ijwi lyakulila kwabasikusika bako, tunzuunzi tweengelede tulazungaana. 29#Ciy 18:17Boonse basinkasi balazwa mumaato aabo, Basibwaato boonse aboonse basikusika mulwizi balaima ankomwe, 30#Neh 9:1; Malo 2:10; Ciy 18:19; Es 4:1balalila amajwi aabo nkaambo kako, balalila loko, Balalivwikila bulongo amitwe vabo akwaalabana muzyaala zyatwe. 31Balaligela cinkulu cakukulila akusama zisani zyamasaka. Balakulila cabuusu bwamumoyo akweema kupati. 32Balakwiimbila cilizyo cakwamba kuti, Maawe! Nguni uuli mbuli Turo uunyonyooka mukati kalwizi? 33Makwebo aako naakali kuzwa mulwizi, wakali kulamya bantu banji, Imbono zyako zinji azyakusambala zyako zinji zyakali kuvubya bami banyika, 34Pele ciindi ecino wanyonyooka mukati kalwizi, mukati kabbonze, Makwebo aako ankamu yabantu bako, zyoonse buyo zyainkila mumaanzi. 35#Ezk 26:15Bantu boonse bakede munyika zyakunkomwe yalwizi baligambide aanduwe, abalo bami babo bayoowa loko, amasyu aabo ausana. 36#Jer 18:16Basambazi bali akati kabamasi balakunyontoka, Ncobeni waba ciyoosyo. Tokooyooba limbi.
Currently Selected:
Ezekieli 27: Ibbaib63
Highlight
Share
Compare
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
