Ezekieli 23
23
Cikozyano ca-Ohola a-Oholiba
1Lino ijwi lya-Jehova lyakandisikila, nu, 2#Jer 3:7; Ezk 16:46Swiilila, mwana amuntu. Kakuli banakazi bobile, bana bada lyomwe. 3#Lev 17:7; Jos 24:14; Ezk 20:8Aba banakazi bakali kuvuula mu-Egepita. Bakali kuvuula mubwanike bwabo. Nkukonya oko inkolo zyabo nkuzyakatyankilwa, atunyonkelo twabunakalindu bwabo nkutwakasyobelwa. 4Ngaaya mazina aabo. Mupati kali Ohola, amwanike wakwe kali Oholiba. Lino bakaba bangu akuzyala bana. Mazina nabo ngaaya. Ohola ngu-Samariya, Oholiba ngu-Jerusalemu.
5 #
2 Bam 15:19; 16:7; Hos 5:13; 8:9; 10:6 Lino Ohola wakatalika kuvuula kacili wangu, Wakali kufwa muunya muunya kuli basimamambe bakwe, nkokuti ba-Asuri, 6basilumamba basamine zisani zisalala pyu, beendelezi abangambela, boonse bali balombe beebeka, basimbizi batantide amabbiza. 7Wakabapa bwaamu bwakwe, nkokuti ba-Asuri babotubotu boonse buyo, aboonse mbakafwida muunyamuunya wakasofwaazigwa azikozyano zyabo. 8Taakwe naakaleka bwaamu bwakwe mbwaakali kucita mu-Egepita, nkaambo mubwanike bwakwe baalumi bakali koona awe akusyoba tunyonkelo twabunakalindu bwakwe akumutilila bwaamu bwabo bunji. 9#2 Bam 17:3-6,23Nkaambo kako ndakamwaaba mumaanza aabasimamambe bakwe, mumaanza aabana ba-Asuri, mbaakali kufwida muunya muunya. 10#Ezk 16:37,41Mbembabo bakavumbula cinswe cakwe akutola bana bakwe balombe abasimbi akumujazya ipanga. Lino naakamana kubetekwa, izina lyakwe lyakaba cisampauzyo akati kabanakazinyina.
11Lino mucizi wakwe Oholiba wakabona, pele walo wakamwiinda mukubisya mukufwa muunyamuunya amubwaamu bwakwe. Wakacita bwaamu akwiinda mucizi wakwe. 12#2 Bam 16:7Wakali kufwida ba-Asuri muunya muunya, beendelezi abangambela, basilumamba basamine zyamalebaleba, basimbizi batantide amabbiza, boonse mbalombe beebeka. 13Lino ndakabona kuti wasofwaazigwa; boonse bobile buyo balitolede inzila yomwe. 14#Jer 50:2Pele atala lyabwaamu bwakwe bumwi wakabika aceeci. Wakabona baalumi beengedwe abulambo, zifwanikisyo zyaba-Kasidi ziengedwe amusila, 15balisamine inkumba muzikungu azitambala zikwekweba-kwekweba amitwe yabo, boonse bali mbuli basilutwe, mbubonya mbuli bana ba-Babuloni, ba-Kasidi, mbubabede mucisi cakwabo. 16Ababone buyo, wakabafwida muunyamuunya, watuma batumwa kulimbabo kucisi caba-Kasidi. 17Lino bana baBabuloni bakeza kulinguwe kubulo bwakukumbatanina, nkabela bakamusofwaazya abwaamu bwabo. Amane kusofwaazigwa, moyo wakwe wakabasesemwa. 18#Dt 32:19; Int 78:59; Jer 12:8; 15:1; Malo 2:7; Am 6:8; Zek 11:8Elyo naakali kucita bwaamu akulivumbula kucinswe antangalala, moyo wangu wakamusesemwa mbubonya mbundakasesemwa mucizi wakwe. 19Nekubaboobo wakavuzya bwaamu bwakwe akuyeeya mazuba aabwanike bwakwe, naakali kuvuula munyika ya-Egepita, 20#Ezk 16:26nkabela kufwa muunyamuunya kuli basimamambe bakwe ibakali anyama mbuli nyama yambongolo abwaalumi mbuli bwaalumi bwamabbiza. 21Wakalisukeme kusobana kwabwanike bwako, ba-Egepita nibakali kusyoba tunyonkelo twako akutyanka inkolo zyabusimbi bwako.
22 #
Is 10:5,6; Ezk 16:37 Lino, O Oholiba, swiilila mbwaamba Mwami Jehova! Ndabusya basimamambe bako, moyo wako mbowakasesemwa, nkabela bayookuzida kukulwisya kuzwa kumabazu oonse, 23bana ba-Babuloni aba-Kasidi boonse, Pekodi a-Sowa a-Kowa, boonse bana ba-Asuri, balombe bayandika, beendelezi abangambela boonse, basilutwe abasilumamba, boonse balitantide ambizi, 24#Nah 3:2; 2 Sam 24:14; Jer 47:3; 39:5; Ezk 16:38Bazookuboolela azilwisyo ankalaki aŋola amakamu makamu aabantu. Bazoolibamba kukulwisya kumabazu oonse antobo azikwabilizyo angowani. Njooaba lubeta mumaanza aabo, nkabela bayookubeteka mbuli kubeteka kwabo. 25Njookubikila busungu bwabukali bwangu, nkabela bayookucitila cabukali, Bayookukosola impemo amatwi, abana bako bacisyeede bayoojazigwa ipanga. Bayootola bana bako balombe abasimbi abantu bako bacisyeede bayoosukuta mumulilo. 26#Jer 13:22; Ezk 16:39; Ciy 17:16Bayookusamununa zyakusama zyako akukunyanzya zilisakatizyo zyako ziebeka. 27#Ezk 16:41; Mik 5:10Aboobo njoolesya zisapi zyako abwaamu bwako nzowakaiya munyika ya-Egepita. Tokooyootambya meso aako kuba-Egepita nikuba kubayeeya limbi. 28#Jer 21:7; Ezk 16:37Nkaambo mbuboobu mbwaamba Mwami Jehova. Ncobeni njookwaaba mumaanza aabaabo bakusulide amumaanza aabaabo moyo wako mbuusesemwa. 29#Ezk 16:39Lino bayookucitila calusulo, bayootola micelo yamilimo yako, bayookusia uli acinswe abwaamba, aboobo cinswe camubwaamu bwako ciyooyubununwa, nkukuti zisapi zyako abwaamu bwako. 30#Ezk 6:9Aya makani ayookucitilwa nkaambo kakubisya kwako kwakuya buvuula abamasi akulisofwaazya azikozyano zyabo. 31#Int 11:6; Jer 25:15; Dan 9:12Weenda munzila yamucizi wako, aboobo inkomeki yakwe njiyonya njooipa mumaanza aako. 32#Dt 28:37; Ezk 22:4,5Mbuboobu mbwaamba Mwami Jehova. Uyoonywida inkomeki yamucizi wako, inkomeki impati indamfu, aboobo uyooba cisampaulo acisesyo, nkaambo ilizwide mwa. 33Uyookutisigwa bukolwi abuusu, inkomeki yaluyoowo yalusaalo, inkomeki yamucizi wako Samariya. 34#Int 75:8; Is 51:17Uyooinywida akwiikuna, elyo uyoolinonkweda masusu akukwamauna inkolo zyako, nkaambo mbuboobo mbundaamba, mbwaamba Mwami Jehova. 35#Jer 2:32; 3:21; 1 Bam 14:9; Neh 9:26Nkaambo mbuboobu mbwaamba Mwami Jehova. Nkaambo kakuti wandiluba akundifutatila, uyoolemezegwa milandu yazisapi zyako ayabuvuule bwako.
36 #
Is 58:1
Lino Jehova wakandaambila kuti, O mwana amuntu, sa toyandi kubeteka Ohola a-Oholiba? Kobazibya zisesemyo zyabo. 37#Ezk 16:20,38Nkaambo bacita bumambe, amumaanza aabo muli bulowa; bacita bumambe azikozyano zyabo, abalo bana babo mbobakandizyalila babatenta mumulilo babe zilyo zyazyo. 38#Ezk 22:8Acintu cimwi ncibandibisizya nceeci, Basofwaazya zintu zyangu zisalalisya akubisya masabata aangu mubuzuba obo mbubonya. 39#2 Bam 21:4; Jer 23:11; Ezk 44:7Nkaambo nibakapaizizya zikozyano zyabo bana babo, mubuzuba obo mbubonya bakanjila mubusena bwangu busalalisya kuti babusofwaazye. Mbuboobu mbubakacita mukati kaŋanda yangu. 40#Is 57:9; Rut 3:3; 2 Bam 9:30; Jer 4:30Bakatumina baalumi bazwa kule. Bakabatumina mutumwa, nkabela bakeza ncobeni. Abo baalumi, wakabasambila akulinanika musila kumeso aako akulisakatizya. 41#Tus 7:17; Jer 44:17; Ezk 16:18,19; Hos 2:8Wakakala abulo bwabulemu, alimwi intafule yakalibambidwe kubusyu bwako: alinjiyo mpowakabika tununkilizyo twangu amafuta aangu. 42Kulinguwe kwakamvwigwa ijwi lyamakamu makamu aabantu bakede cakuliiba, nkaambo kwakaletwa bantu banji abantu bakoledwe kuzwa kunkanda. Aba bakabika inkaya kumaboko aabanakazi amusini uuebeka amitwe yabo.
43Mpawo ndakaamba kuti, Sa baalumi tabaciti bumambe nibacita awe bwaamu? 44Nkaambo baswanaana awe mbubonya baalumi mbubaswanaana amwanakazi sikuvuula. Mbuboobo mbubakaswanaana a-Ohola a-Oholiba, banakazi basizisapi. 45#Ezk 16:38; Joh 8:4-7Pele bantu baluleme bayoobabeteka, bayoobapa mulandu wabanakazi basimamambe awabanakazi basikutila bulowa, nkaambo mbasimamambe, alimwi bulowa mobuli mumaanza aabo.
46Nkaambo mbuboobu mbwaamba Mwami Jehova. Busya inkamu yakubalwisya. Njoobabika kuti babe cigambyo acisaalo. 47#Ezk 16:41; 24:21; 2 Mak 36:17Inkamu iyoobafusa mabwe, bayoobayasa amapanga aabo. Bana babo balombe abasimbi, boonse buyo bayoobajaya, amaanda aabo bayooarenta mumulilo. 48#Dt 13:11; 2 Pet 2:6Mbuboobo mbunjoolesya zisapi munyika, kuti banakazi boonse bacenjezegwe, bataciti zisapi mbumwacita inywe. 49Zisapi zyanu bayooziboozya kulindinywe, nkabela muyoolemezegwa milandu yazibi zyanu zyakukomba zikozyano, aboobo muyooziba kuti ndime Mwami Jehova.
Currently Selected:
Ezekieli 23: Ibbaib63
Highlight
Share
Compare
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
