Ezekieli 10

Cilengano cabakerebimu

1 # Ezk 1:26; Ciy 4:2 Lino ndakabona kuti atala lyamweenya oyo iwakali kujulu lyamitwe yabakerebimu akaboneka cintu cili mbuli ibbwe lya-Safiro, cakali mbuli cuuno cabwami. 2#Ezk 9:2,3; 1:13; Ciy 8:5Nkabela wakaambila oyo muntu iwakasamide masani aatuba kuti, Njila akati kamavili, kunsi lyabaangelo bakerebimu, ukazuzye inkankamaanza malasa aayaka kuzwa akati kabakerebimu, ukaamwaye atala lyamunzi. Lino wakanjila mumeso aangu.

3Bakerebimu bakaliimvwi kululyo lwaŋanda, muntu oyo naakanjila, nkabela ijoba lyakazuzya lubanza lwamukati. 4#Ezk 1:28; 43:5; Kul 40:35Mpawo bulemu bwa-Jehova bwakatanta kuzwa kubakerebimu, bwaakwiima atala lyacikunguzyo caŋanda, nkabela iŋanda yakazuzigwa ijoba, alwalo lubanza lwakazula mumuni wabulemu bwa-Jehova, 5#Ezk 1:24; Int 29:3Lino muzumo wamababa aabaangelo bakerebimu wakamvwigwa koonse koonse akusikila kulubanza lwaanze, wakali mbuli ijwi lya-Leza Cilenga naamba.

6Lino naakalailila oyo muntu iwakasamide masani aatuba kuti, Bweza mulilo kuzwa akati kamavili akati kabakerebimu, oyo muntu wakanjila, waakwiima kumbali lyavili. 7Mpawo kerebimu wakatandabika ijanza lyakwe kuzwa akati kabakerebimu, walinjizya mumulilo iwakali akati kabakerebimu, wabweza mulilo, wabika mumaanza aayooyo iwakasamide masani aatuba. Autambule buyo, wakazwida anze. 8#Ezk 1:8Lino ndakabona kuti baangelo bakerebimu kabajisi cili mbuli ijanza lyamuntu kunsi amababa aabe.

9 # Ezk 1:15-21 Lino ndakabona kuti mpaali mavwili one kumbali lyabakerebimu, ivili lyomwe kumbali lyakerebimu umwi aumwi. Ayo mavwili akalikozyene amabwe aa-Berulo. 10Oonse one kaelene, kaajisi mbuli mibalo akati kamibalo. 11Ciindi cakweenda, kaenda kufumbwa mabazu aao one nkwaakalangide, kaataleya-leya pe. Kufumbwa ivili lyakunembo nkulyakalangide, oonse akali kulitobela, kaataleyauka pe. 12#Ezk 1:18; Ciy 4:8Nkabela mibili yabo yoonse amasule aabo amaanza aabo amababa aabo, aalo mavwili, zyoonse zyakalizwide meso koonse koonse. Mbwaakabede mavwili ngebakajisi boonse bone. 13Lino mavwili, ndakamvwa kuti alategwa tutendeleka. 14#Dan 9:21; 2 Sam 14:17; 24:16; Ezk 1:10; Ciy 4:7Nkabela umwi aumwi kajisi masyu one: busyu butaanzi kabuli busyu bwakerubu, busyu bwabili kabuli busyu bwamuntu, busyu bwatatu kabuli bwamulavu, abwane kabuli busyu bwansika.

15 # Ezk 1:5 Lino bakerebimu bakatanta kujulu. Mbembabo banyama mbendakabona kumulonga wa-Kebara. 16#Ezk 1:19Nkabela bakerebimu nibakaya, aalo mavwili akeenda kumbali lyabo, alimwi bakerebimu nibakatandabika mababa aabo kuti bauluke kujulu kuzwa ansi, aalo mavwili taakwaakaleka kweenda kumbali lyabo. 17#Ezk 1:12Nibakaima, aalo akaima, alimwi nibakasumpulwa, aalo akasumpulwa, nkaambo mulingao momwakali muuya wabanyama.

18 # Int 78:60; Hos 9:12; Ezk 7:20-22 Lino bulemu bwa-Jehova bwakainka kuzwa kucikunguzyo camulyango, bwaakwiima atala lyabakerebimu. 19Nkabela bakerebimu nibakazwa, bakatandabika mababa aabo akuuluka kuzwa ansi mumeso aangu, aalo mavwili akeenda kumbali lyabo. Bakaakwiima kumulyango wakujwe waŋanda ya-Jehova, nkabela bulemu bwa-Leza wa-Israyeli bwakali kujulu lyabo. 20#Ezk 1:1,22Mbembabo banyama mbendakabona kunsi lya-Leza wa-Israyeli kumulonga wa-Kebara, nkabela ndakaziba kuti mbembabo bakerebimu. 21#Ezk 1:6-8; Ciy 4:7Umwi aumwi kajisi masyu one, umwi aumwi kajisi mababa one, alimwi kunsi lyamababa aabo kakuli zili mbuli maanza aamuntu. 22#Ezk 1:10,12; Int 103:20Aalo masyu aabo, ngengao masyu ngendakabona kumulonga wa-Kebara. Nkabela boonse kabalulama mukweenda kwabo.

Currently Selected:

Ezekieli 10: Ibbaib63

Highlight

Copy