Deuteronomo 28
28
Coolwe cabaswiilila amapenzi aabataswiilili
1 #
Dt 11:13-17; Kul 15:26; Lev 26:3; Int 106:3; 111:10; Is 1:19; 3:10; Jer 11:4; 12:16; 1 Mak 14:2; Rom 2:10 Lino na mwaswiilila ijwi lya-Jehova Leza wanu, akucenjela kubamba milazyo yakwe yoonse njendi mukumulailila buzuba obuno, ncobeni Jehova Leza wanu ulamusumpula kwiinda misyobo yoonse yannsi. 2#Zek 1:6ZyooIwe ezi zyoonse zilamusikila, zilaba zyanu, na mwaswiilila ijwi lya-Jehova Leza wanu. 3#Int 128:1,4; Matl 39:5Mulaba acoolwe mumunzi, mulaba acoolwe musokwe. 4#Matl 22:17; 1 Tim 4:8Lulaba acoolwe lunyungu lwamibili yanu, alunyungu lwamicelo yanyika yanu, alunyungu lwaŋombe zyanu, banamani bamatanga aanu abana bambelele zyanu. 5Zilaba acoolwe intumba zyanu azikandilo zyanu. 6#Int 121:8Mulaba acoolwe kuciindi cakunjila akuciindi cakuzwa.
7 #
2 Sam 22:38
Basinkondonyokwe bamubusizya inkondo, Jehova ulabaaba kuti bazundwe kubusyu bwanu. Kuza balaleta inzila yomwe, pele kucija balatola inzila zili musanu azibili. 8#Lev 25:21; Tus 3:10; Dt 15:10Jehova ulalailila kuti mube acoolwe mumatala aanu amumilimo yoonse yamaanza aanu. Ulamupa coolwe munyika eyo Jehova Leza wanu njamupa. 9#Matl 17:7; Kul 19:5; Is 1:26; 62:12; Tit 2:14Jehova ulamusimpa kuti mube bantu bakwe basalalisya, mbubonya mbwaakamukonkezya, na mwaswiilila milazyo yaJehova Leza wanu akweenda munzila zyakwe. 10#2 Mak 7:14Lino bantu boonse baansi balabona kuti izina lya-Jehova lili alindinywe, aboobo balamuyoowa. 11#Tus 10:22Jehova ulamwaandya muzyoolwe, mulunyungu lwamibili yanu alunyungu lwaŋombe zyanu alunyungu lwamicelo yanyika yanu, mpoonya awo anyika Jehova njaakakonkezya bamausowanu kumupa. 12#Jak 1:18Jehova ulamujalwida ciyobwedo cakwe cibotu cakujulu, kuti awisizye nyika yanu imvula kuciindi ceelede, akumupa coolwe mumilimo yoonse yamaanza aanu, Mulakolotya misyobo minji, pele kukolota tamukooyookolota nywebo pe. 13Jehova ulamubika kuti mube mutwe, tamukooyooba mucila pe. Munooya butanta lyoonse, tamukooyooselela pe, na mwaswiilila milazyo ya-Jehova Leza wanu njendi mukumulailila buzuba obuno, na mwacenjela kwiicita 14#Jos 1:7; 2 Bam 22:2akutaleya kuzwa kumajwi oonse ngendamulailila buzuba obuno, nikuba kululyo nikuba kulumwensi, kuya butobela baleza bambi akubamanina milimo.
15 #
Lev 26:14; Malo 2:17; Dan 9:11; Mal 2:2; Rom 2:8,9 Pele na mwakaka kuswiilila ijwi lya-Jehova Leza wanu, na mwakaka kucenjela kucita milazyo yakwe yoonse ambeta zyakwe nzendi mukumulailila buzuba obuno, intuko ezi zyoonse ziyoomusikila. 16Mulaba alutuko mumunzi, mulaba alutuko musokwe. 17Zilaba alutuko intumba zyanu azikandilo zyanu. 18#Is 3:1; Hab 3:17Lulaba alutuko lunyungu lwamibili yanu alunyungu lwamicelo yanyika yanu, banamani baŋombe zyanu abana bambelele zyanu. 19Mulaba alutuko mukunjila kwanu amukuzwa kwanu.
20 #
Tus 3:33; Zek 5:3,4; Mal 2:2; Int 80:16; Is 30:17; 51:20 Jehova ulamutumina intuko, alupilingano, amakataazyo, mumilimo yoonse yamaanza aanu, mane lumwi mukanyonyooke akufwambaana kufwa nkaambo kabubi bwancito zyanu, nkaambo mwaleka kunditobela. 21#Lev 26:25; My 14:12; Jer 16:4; 24:10; Am 4:10; Mt 24:7Jehova ulamukakatizya malwazi, mane lumwi amumanisye munyika eyo njemoyoovuba. 22#Lev 26:16Jehova uyoomujazya lungwangwa, antuntumaanzi, amalwazi aatenta mibili, acimpayuma, andyomba akwiibuka. Zintu ezi zilamutobela mane lumwi mukanyoonyooke. 23Kujulu kulamubeda mbuli mukuba, ayalo nyika iili kunsi lyamaulu aanu ilamubeda mbuli butale, 24Jehova uyoosandula imvula yakunyika yanu ibe lusuko amusee. Iyoomuwida kuzwa kujulu mane mukanyonyooke.
25 #
Lev 26:17; Dt 32:30; Is 30:17; Jer 15:4; 24:9; Ezk 23:46 Jehova ulamwaaba kuti muzundwe kubusyu bwabasinkondonyoko. Mulatola inzila yomwe kuyoobalwisya, pele mulabacija munzila zili musanu azibili. Nkabela muyooba cigambyo kumisyobo yoonse yaansi. 26Mitunta yanu iyooba zilyo zyabayuni boonse bakujulu azyabanyama boonse baansi; takukooyooba muntu naba omwe uubayoosya. 27#Kul 9:9; 15:26; 1 Sam 5:6; Int 78:66Alimwi Jehova ulamuumya zyuute zyaku-Egepita, azilonda, acibulu, acipele citakonzyi kusilikwa. 28Jehova ulamuumya busondosi aboofu akupilinganya myoyo yanu, 29mane mukabe basikwaampaampa ciindi casikati mbubonya mbuli moofu mbwaampaampa mumudima. Tamukooyoojana coolwe munzila zyanu; muyoopenzegwa akusaalwa buyo, nkabela takukooyooba sikumuvuna. 30#Job 31:10; Jer 8:10Ulakwata mwanakazi, pele mwaalumi umbi ulamulalika; ulayaka iŋanda, pele tokooyookala mulinjiyo; ulabyala muunda wamasaansa, pele tokooyoolya micelo yawo. 31Iŋombe yako iyoojayigwa kumeso aako, pele tokooyoolya nyama yayo; imbongolo yako iyoobbigwa kumeso aako, tiikooyooboola limbi; imbelele zyako ziyooabwa mumaanza aabasinkondonyoko, pele taakwe uuyookugwasya. 32Bana bako balombe abasimbi bayooabwa mumaanza aabantu bambi; meso aako ayoobona; uyoobasukama buzuba boonse, pele taakwe cintu ncokonzya kucita. 33#Lev 26:16; Jer 5:17Micelo yoonse yanyika yako njowakabeleka iyooligwa kubantu mbotezi. Muyoopenzegwa aku umwa buyo mazuba conse, 34mane mukasondoke nkaambo kazintu zyoonse nzyaabona meso aanu. 35Jehova ulamuumya zyuute zibi zitasilikiki amazwi aanu amaulu aanu; ulaciswa mubili woonse kuzwa kuzituta kusikila alubwebwe lwamutwe.
36 #
2 Bam 17:4; 24:12,14; Jer 39:1; 2 Mak 33:1; 36:1; Jer 16:13 Jehova uyoomulonzya, nywebo amwami ngomuyoolibikila, kucisi neemutezi, nywebo nebaba bamauso, nkabela oko muyookomba baleza beenzu, baleza bazisamu abamabwe. 37#1 Bam 9:7,8; Jer 24:9; 25:9; Zek 8:13; Int 44:14Muyooba ciyoosyo akasimpi ajwi lyakuweezya akati kamisyobo yoonse Jehova nkwayoomutandila, 38#Mik 6:15; Hag 1:6; Kul 10:4; Joel 1:4Muyoobyala imbuto zinji kumyuunda, pele kutebula muyootebula zice buyo, nkaambo cisozi ciyoozilya. 39Muyoobyala myuunda yamasaansa akwiibamba, pele tamukoonywa waini kulinjiyo nekuba kulya micelo yayo, nkaambo basyanyungwa bayooilya. 40Muyooba amisamu yamaolifa munyika yanu yoonse, pele tamukooyoonana mafuta aayo, nkaambo micelo iyookunkumuka, 41#Jer 52:28Muyoozyala balombe abasimbi, pele tabakooyooba banu, nkaambo bayootolwa mubuzike. 42Misamu yanu amicelo yanyika yanu, mapaso ayooimanisya. 43Beenzu bakala akati kanu banooya busumpuka kwiinda ndinywe, pele nywebo munooya bubbililila. 44#Ezr 9:7; Malo 1:5Mbembabo bayoomukolotya, tamukooyookolotya mbabo pe. Bayooba mutwe, pele nywebo muyooba mucila. 45Ezi intuko zyoonse ziyoomusikila, ziyoomutobela akumujana, mane mukanyonyooke, nkaambo kakuti tamuswiilili ijwi lya-Jehova Leza wanu akubamba malailile aakwe ambeta zyakwe nzyaakamulailila. 46#My 26:10; Is 8:18; Ezk 5:15; 14:8Ziyoomubeda citondezyo amalweza, nywebo alunyungu lwanu, mane kukabe kutamani.
47 #
Neh 9:35-37
Mwakakaka kumanina Jehova Leza wanu milimo cakukondwa acamoyo mubotu nkaambo kakuvuba imbono zinji. 48#Is 47:6; Jer 27:12; 28:14; Mt 11:29Nkaambo kako muyoomanina basinkondonyoko milimo, Jehova mbaazootuma kukumulwisya; muyoobamanina milimo cakufwa inzala acakufwa nyotwa acacinswe acakubula zintu zyoonse. Uyoomubikila ijoko lyabutale ansingo zyanu mane akamunyonyoone. 49#Jer 5:15; 6:22,23; Lk 19:43; Jer 48:40; 49:22; Malo 4:19; Ezk 17:3; Hos 8:1Jehova uyoomubusizya musyobo wabantu bazwa kule, kuzwa kumagolelo aanyika. Balafuuma mbuli sikube, Musyobo ngomutamvwidi mwaambo. 50#Dan 8:23; 2 Mak 36:17; Is 47:6Mbantu bayoosya, batakonzyi kulemeka bapati nekuba kufwida banike luzyalo. 51#Is 1:7; 62:8; Jer 5:15-17Bayoolya lunyungu lwaŋombe zyanu alunyungu lwamicelo yanyika yanu, mane bakamunyonyoone. Tabakooyoomusiila maila naba waini naaba mafuta, manamani aŋombe zyanu nebaba bana bambelele zyanu, mane lumwi bakamumaninizye. 52#2 Bam 25:1; Jer 37:8; Mt 22:7Bayoomusinkinizya muminzi yanu yoonse mane malambo malamfu mayumu ngomwakali kusyoma ayookolomoka moonse munyika yanu, Bayoomusinkinizya muminzi yanu yoonse amunyika yoonse Jehova Leza wanu njaakamupa. 53#2 Bam 6:28,29; Jer 19:9; Malo 2:20; 4:10; Lk 21:23Lino muyoolya lunyungu lwamibili yanu, nyama yabana banu balombe abasimbi mbaakakupa Jehova Leza wanu. Mbuboobo mbumuyoocita mukusinkinizigwa kuli basinkondonyoko bamusinkinizya. 54Muntu mubombu moomfosi akati kanu uyooba syacivulamwangu uutayandi kwaabila muzyalwanyina zilyo naba mwanakazi wamuntaamo yakwe nebaba bana bakwe bacisyeede mbaakasyaalilwa. 55Uyookaka kwaabila naba omwe akati kabo nyama yabana bakwe mbalya nkaambo kakubula cintu mukusinkinizigwa kulibasinkondonyoko bamusinkinizya muminzi yanu yoonse. 56Alakwe mwanakazi mubombu moomfosi akati kanu, iwakali kuyoowa kulyata maulu aakwe ansi nkaambo kakubomba akoomfoka, uyooba syacivulamwangu kumulumi wamuntaamo yakwe akumwana wakwe mulombe aku mwana wakwe musimbi. 57#2 Bam 6:28-29; Malo 4:10Ulakaka kubapa cabacembele cizwa mwida lyakwe abana mbazyede; ulayanda kuzilya zyoonse mwini cakusisikizya mumapenzi aakusinkinizigwa kulibasinkondonyoko bakusinkinizya muminzi yanu.
58 #
Kul 6:3; Int 99:3; Is 57:15; 29:23; Mal 1:14; Int 20:1; 83:18; Is 42:8; Mal 2:3; 4:2; Flp 2:10 Na tamucenjeli kucita majwi oonse aamilao eyi iilembedwe mubbuku eli, kukulemeka izina eli idemu liyoosya lya-Jehova Leza wanu, 59#1 Bam 9:7,9; Malo 1:9,12; 4:12; Dan 9:12; 2 Mak 21:12-15Jehova uyoomuletela, nywebo alunyungu lwanu, zyuumo ziyoosya, zyuumo zipati zitamani amalwazi mabi aatamani. 60Uyoomuboozezya alimwi malwazi oonse aaku-Egepita ngwemwakayoowede, nkabela ayoomukakatila. 61Aalo malwazi oonse amapenzi oonse aatalembedwe mubbuku eli lya-Mulao, Jehova ulamuletela ngao, mane lumwi mukanyonyooke. 62#Neh 9:23Nekuba kuti mwakali banji mbuli nyenyeezi zyakujulu, muyoosyaala bace buyo, nkaambo kakutaswiilila ijwi lya-Jehova Leza wanu. 63#Is 62:5; Jer 32:41; Mik 7:18; Zef 3:17; Lk 15:6,10; Tus 1:26; Is 1:24Mbubonya mbuli Jehova mbwakondedwe kumupa coolwe akumuvuzya, uyookondwa mbubonya akunyonyoona akumumwaya, mane lumwi mukamaninine munyika eyo njimuyoovuba. 64#Lev 26:33; Neh 1:8; Jer 16:13Jehova uyoomumwayila akati kamisyobo yoonse yabantu kuzwa kumagolelo aanyika kusikila kumagolelonyina, nkabela oko muyookomba baleza bambi, baleza bazisamu abamabwe, mbemutezi nywebo nibaba bamauso. 65#Matl 8:9; Is 57:21; Ezk 5:12,17; Am 9:4; Lev 26:36Nkabela akati kabamasi abo tamukooyoojana luumuno, niciba cilyokezezyo cazituta zyanu. Jehova uyoomupa myoyo iikankama, amalwazi aamana meso, abuusu bwamutwaango twanu. 66Buumi bwanu buyooangalikilwa. Munooyoowa lyoonse isikati amasiku, Tamukooyooba alusyomo pe. 67#Job 7:4Cifumo muyooamba kuti, Kubota kaali masiku; masiku muyooamba kuti, Kubota kacili cifumo; nkaambo kakuyoowa kwamyoyo yanu akubona kwameso aanu. 68#Jer 44:7; Hos 8:13; 9:3Jehova uyoomubweedezya ku-Egepita mumaato musinzo ngundakaamba kuti tamukooyoouinda limbi. Oko muyoolyaaba mumaanza aabasinkondonyoko, kuti muuzigwe, mube bazike baalumi abanakazi, pele takukooyooba sikumuula.
Currently Selected:
Deuteronomo 28: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.