Popular Bible Verses from Deuteronomo 28

Share

Lino na mwaswiilila ijwi lya-Jehova Leza wanu, akucenjela kubamba milazyo yakwe yoonse njendi mukumulailila buzuba obuno, ncobeni Jehova Leza wanu ulamusumpula kwiinda misyobo yoonse yannsi.

ZyooIwe ezi zyoonse zilamusikila, zilaba zyanu, na mwaswiilila ijwi lya-Jehova Leza wanu.

Jehova ulamubika kuti mube mutwe, tamukooyooba mucila pe. Munooya butanta lyoonse, tamukooyooselela pe, na mwaswiilila milazyo ya-Jehova Leza wanu njendi mukumulailila buzuba obuno, na mwacenjela kwiicita

Jehova ulamujalwida ciyobwedo cakwe cibotu cakujulu, kuti awisizye nyika yanu imvula kuciindi ceelede, akumupa coolwe mumilimo yoonse yamaanza aanu, Mulakolotya misyobo minji, pele kukolota tamukooyookolota nywebo pe.

Basinkondonyokwe bamubusizya inkondo, Jehova ulabaaba kuti bazundwe kubusyu bwanu. Kuza balaleta inzila yomwe, pele kucija balatola inzila zili musanu azibili.

Jehova ulalailila kuti mube acoolwe mumatala aanu amumilimo yoonse yamaanza aanu. Ulamupa coolwe munyika eyo Jehova Leza wanu njamupa.

Mulaba acoolwe kuciindi cakunjila akuciindi cakuzwa.

Mulaba acoolwe mumunzi, mulaba acoolwe musokwe.

Lulaba acoolwe lunyungu lwamibili yanu, alunyungu lwamicelo yanyika yanu, alunyungu lwaŋombe zyanu, banamani bamatanga aanu abana bambelele zyanu.

Jehova ulamusimpa kuti mube bantu bakwe basalalisya, mbubonya mbwaakamukonkezya, na mwaswiilila milazyo yaJehova Leza wanu akweenda munzila zyakwe.

Zilaba acoolwe intumba zyanu azikandilo zyanu.

Jehova ulamwaandya muzyoolwe, mulunyungu lwamibili yanu alunyungu lwaŋombe zyanu alunyungu lwamicelo yanyika yanu, mpoonya awo anyika Jehova njaakakonkezya bamausowanu kumupa.

Lino bantu boonse baansi balabona kuti izina lya-Jehova lili alindinywe, aboobo balamuyoowa.

akutaleya kuzwa kumajwi oonse ngendamulailila buzuba obuno, nikuba kululyo nikuba kulumwensi, kuya butobela baleza bambi akubamanina milimo.

Pele na mwakaka kuswiilila ijwi lya-Jehova Leza wanu, na mwakaka kucenjela kucita milazyo yakwe yoonse ambeta zyakwe nzendi mukumulailila buzuba obuno, intuko ezi zyoonse ziyoomusikila.