Incito 13
13
Barnaba a-Saulo mbobakasalwa kuya kulibamasi
1Eno mumbungano yaku-Antiokeya kwakali basinsimi abaiyi: baBarnaba a-Sumeoni uutegwa Nigeri, a-Lukiya mu-Kurene, a-Manayeni uwakakomena antoomwe amwami Heroda, a-Saulo. 2Nobakali kucita milimo ya-Mwami akuliimya kulya, Muuya Uusalala wakati, Ndilekele eno ba-Barnaba a-Saulo kumulimo ngwendabaitila. 3Nkabela nobakaliimya kulya akukomba, akubabika maanza, bakabatuma.
Mbobakacita mu-Kupro
4Balo mbobakatumwa Muuya Uusalala, bakaselemuka kuya ku-Selukeya, kuzwa oko bainka abwaato ku-Kupro. 5Nobakasika ku-Salami bakaamba makani aa-Leza muzikombelo zyaba-Juda, bakali a-Johane, mugwasyi wabo. 6Nobakaandulula mucilwa coonse mane kusikila ku-Pafo, bakajana musonzi, musinsimi mucengi, mu-Juda uutegwa Baŋesu, 7uwakakede kumweendelezi wacisi, Sergio Paulo, mwaalumi musongo, Walo wakaliitila ba-Barnaba a-Saulo, wali kuyanda kuswiilila makani aa-Leza, 8Pele Elima musonzi (nkaambo mbolibede zina lyakwe nolisandulwa) wakabakasya, wali kuyanda kulesya mweendelezi kulusyomo. 9Kwalo Saulo, ngo-Paulo, mbwaakazywide Muuya Uusalala, wakamulangisisya, 10wati, Yebo yoomwana a-Saatani, oozywide luuni loonse amaanu mabi oonse, oolwanya bululami boonse, sena tokooleka kulengawida nzila ziluleme zya-Mwami? 11Eno bona, ijanza lya-Mwami lili atala lyako, ulaba moofu, tokoobona zuba kaindi. Ndilyonya lwakamuwida luubi amudima, wali kweendeenda ulayandaula uumutembaizya ejanza, 12Nkabela mweendelezi naakabona cakacitwa wakasyoma, wayoowa kukwiisya kwa-Mwami.
Mbobakacita ku-Antiokeya wamu-Pisidiya
13Elyo Paulo ambaakali abo bakazwa ku-Pafo abwaato, bakainka ku-Perge wamu-Pamfiliya, pele Johane wakabasia, wabweeda ku-Jerusalemu, 14Balo bakaindilila kuzwa ku-Perge, beza ku-Antiokeya wamu-Pisidiya. Buzuba bwa-Sabata bakanjila mucikombelo, bakala. 15Nokwakamana kubalwa kumulao akubasinsimi, bapati bacikombelo bakatuma kulimbabo bati, Nobaalumi bakwesu anooli mujisi majwi aakulaya bantu amwaambe, 16Nkabela Paulo wakanyamuka, watambika janza wati,
Nobaalumi ba-Israyeli, anywebo nomuyoowa Leza, amuswiilile. 17Leza wabantu aba ba-Israyeli wakasala matateesu akusumpula bantu nobakacili kukede mucisi ca-Egepita, wakabagwisya mulincico ejanza ijumu. 18Wakabalela mbuli wisi munkanda myaaka yati kabe makumi one. 19Naakamwaya zisi izyali musanu muzibili munyika ya-Kanana, wakabakonya nyika yabo, kutola kumyaaka yati kabe myaanda yone amakumi osanwe, 20munsi lyakooko wakabapa babetesi mane kusikila kuli-Samueli musinsimi. 21Elyo bakakumbila mwami, Leza wakabapa Saulo mwana wa-Kisi, mwaalumi wamukowa wa-Benjamini, wakabalela myaaka iili makumi one. 22Naakamugwisya walo, wakabika Davida kuti abe mwami wabo. Ngonguwe ngwaakasinizya kuti, Ndijene Davida, mwana wa-Jese, mwaalumi wakumoyo wangu, uyoocita zyoonse nzenjanda. 23Kulunungu lwayooyu muntu Leza, mbubonya mbwaakasyomezya, waleta kuli-Israyeli Mufutuli, ngu-Jesu. 24Katanasika walo, Johane wakakambaukide kale lubapatizyo lwakusanduka kubantu boonse ba-Israyeli. 25Eno Johane nati kamanizye lweendo lwakwe wakati, Mweezeezya kuti ndimeni ino? Endime oyo pe. Kwalo uleza munsi lyangu oyo ngwenteelede kwaangununa ndyasyo zyakumatende aakwe, 26Nobakwesu, bana baluzubo lwa-Abrahamu, abalo abali akati kanu abayoowa Leza, kulindiswe nkwaakatuminwa makani aalufutuko olu. 27Abo abakala mu-Jerusalemu, abeendelezi babo, kabatamuzi walo naaba majwi aabasinsimi aabalwa muma-Sabata oonse, bakaacita kukumujanya mulandu, 28anobatakajana mulandu wakuti afwe, nokubaboobo bakakumbila Pilato kuti ajayigwe. 29Nobakazyulizya zyoonse izyakalembwa aanguwe, bakamugwisya acisamu, bamubika mucuumbwe. 30Kwalo Leza wakamubusya kubafu, 31mazuba manjimanji wakabonwa kulibaabo mbaakazwa abo ku-Galilaya kuya ku-Jerusalemu, sunu mbabakamboni bakwe kubantu, 32Eno swebo twamuletela makani mabotu aacisyomezyo ncobakapegwa bamatateesu, 33eco Leza wakacizuzya kulindiswe tobana babo mbwaakabusya Jesu, mbubonya mbokulembedwe mulwiimbo lwabili kuti, Yebo uli mwanaangu, sunu ndakuzyala. 34Kumakani aakumubusya kwakwe kulufu kuti katacipiluki limbi kukubola wakaamba obo wati, Ndiyoomupa nywebo coolwe cisalala cisinizizye ca-Davida. 35Alimwi mulwiimbo lumwi wakati, Tokoozumina kuti Uusalala wako abone kubola, 36Nkaambo Davida, naakamana lukanzo lwa-Leza mucizukulu cakwe mwini, wakafwa, wazikwa kumawisi, wabola, 37kwala oyo ngwaakabusya Leza takabolede pe. 38Aboobo nobakwesu, amuzibe kuti nkaambo kayooyo mwaambilwa kujatilwa kwazibi, 39alimwi nkaambo kakwe umwi umwi uusyoma ulalulami-kwa zyoonse nzomwatakali kukonzya kululamikilwa nzizyo kumulao waMusa. 40Nkaako amucenjele kuti mutasikilwi eco icakaambwa musinsimi kuti,
41Amulange, nywebo nomunenya, muyoowe, mumane,
Nkaambo ndacita mulimo kumazuba aanu,
Mulimo ngomutakoozumina, muntu namwaambila.
42Nobakazwa mucikombelo, bakakumbila kuti bakambaukilwe aya majwi amu-Sabata iiza. 43Mubungano nowakamwaika, banjibanji kuba-Juda akubamasi basandule abakomba bakacilila ba-Paulo a-Barnaba. Balo nobakaamba kulimbabo, bakabalailila kuti kabaceenda muluzyalo lwa-Leza.
Mbobakasandukila kulibamasi
44Eno mu-Sabata iicilila, munzi woonse wati kamaninine kukubunganina kuswiilila makani aa-Leza. 45Pele ba-Juda nobakabona makamu makamu aabantu bakaba ebbivwe, bakazya makani ngaali kwaamba Paulo, balasampaula. 46Kwalo Paulo a-Barnaba bakaamba ecamba bati, Kwali kweelede kuti makani aa-Leza aambilwe ndinywe lutaanzi, eno mbomwaakaka buya, akuti tamweelede buumi butamani, mbubo, tulasandukila kulibamasi. 47Nkaambo mbombuboobo Mwami mbwaakatulailila kuti,
Ndakubika kuti ube mumuni kulibamasi,
Kuti utole lufutuko mane kusikila kumamanino aanyika.
48Nobakamvwa obo bamasi bakabotelwa, balemeka makani aa-Leza, abaabo abasalidwe buumi butamani basyoma. 49Nkabela makani aa-Mwami akamwaika mucisi eco coonse, 50Pele ba-Juda bakasungilizya bakaintu balemu abakomba, abapati bamunzi, bakabusizya ba-Paulo a-Barnaba mapenzi, babatanda mucisi cabo, 51Balo bakabakunkumwida lusuko lwakumatende aabo, bainka ku-Ikoniyo. 52Basikwiiya bakazyula kubotelwa a-Muuya Uusalala.
Currently Selected:
Incito 13: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.