Incito 12
12
Petro mbwaakagunsigwa muntotongo
1Kuciindi eco Heroda mwami wakabika maanza kupenzya bamwi bembungano. 2Wakajaya Jakobo eceba, mwanaakwabo Johane. 3Naakabona kuti cabotezya ba-Juda, wakaakujata Petro awalo. Cakali ciindi camukamu uutakwe mimena. 4Naakamujata wakamunjizya muntolongo, wamwaaba kunkamu zyone zyabasilumamba abali bone bone, kuti bamulindilile. Wakayeeya kumugwisizya kubantu lyamana pobwe lyaPasika, 5Aboobo Petro wakalindililwa muntolongo, kwalo imbungano yakali kusungweede kumukombela kuli-Leza. 6Heroda naati kamugwisye, ngoonya masiku ayo Petro wakalilede akati kabasilumamba bobile, ulaangidwe nketani zyobile, abasikulindila bali amulyango balalindila ntolongo. 7Elyo angelo wa-Mwami wakamwiiminina, mumuni wamweka muŋanda, wakauma Petro kubbazu lyakwe, wamubusya wati, Fwamba buka. Ndilyonya kwakaloka nketani izyakali kumaboko aakwe. 8Angelo wakamwaambila kuti, Liyabike, usame ndyasyo zyako, Wacita mbubonya. Alimwi wamwaambila kuti, Livumbe jansi lyako, undicilile. 9Wakazwa wamucilila, katezi kuti kuli kasimpe icakacitwa angelo, pele wakayeeya kuti wabona cilengaano. 10Bakabainda basikulindila bataanzi ababili, basika kucitendele calubulo icitola kumunzi, calijula cini, bazwa beenda munzila yomwe, ndilyonya angelo wakamusia, 11Petro naakayeeya wakateeti, Eno nendaziba kuti nkasimpe Mwami watuma angelo wakwe, wandivuna kumaanza aa-Heroda akukulangilila koonse kwabantu baba-Juda, 12Naakazibisisya wakainka kuŋanda ya-Mariya, banyina Johane uutegwa Marko, nkobakali kubungene banjibanji balakomba, 13Petro naakakonkomona kucitendele camulyango, kwakazooswiilila musimbi uutegwa Roda. 14Naakaliziba ijwi lya-Petro, nkaambo kakubotelwa takajulide mulyango, pele wakazuzaanina muŋanda, waamba wati, Petro mpali, uliimvwi amulyango. 15Bakati kulinguwe, Wasondoka, Kwalo wasinizya wati, Nkasimpe. Bateeti, Mungelo wakwe. 16Pele Petro wakali kukonkomona lyoonse. Nobakajula bakamubona, bayoowa. 17Wakatambika janza kuti baumune, wabalungulwida mbwaakamugwisya Mwami muntolongo. Wati, Amwaambile Jakobo abakwesu makani aya, Nkabela wakazwa, wainka kumbi. 18Eno nobwakaca kwakaba kupyopyongana kupati kulibasilumamba kuti, Ino Petro waya kuli? 19Elyo Heroda naakamuyandaula akutamujana, wakababuzisisya basikulindila, walailila kuti bajayigwe. Nkabela wakazwa mu-Judaya, waselemuka kuya ku-Kaisareya, wakaakukala nkuko ciindi.
Leza mbzuaakabeteka Heroda
20Heroda wakabanyemenesya ba-Turo aba-Sidoni. Eno bakaboola kulinguwe amoyo omwe, bakaliyanzanya a-Blasto, mubanzi mupati wakunanda yamwami, baakukumbila kuti kube luumuno, nkaambo cisi cabanamuzyaabo calelwa cisi camwami. 21Kubuzuba ubwakabikwa, Heroda wakasama cakusama cabwami akukala acuuno cakwe, wabakambaukila, 22Eno bantu boompolola bati, Ndijwi lya-Leza, talili lyamuntu, 23Ndilyonya angelo wa-Mwami wakamuuma, takamulemekede Leza, wakaligwa mvunyu, wafwa.
24Kwalo makani aa-Leza akali kuya bukomena akuvula. 25Elyo Barnaba a-Saulo bakaboola kuzwa ku-Jerusalemu, nobakamana milimo yabo, baletelela a-Johane uutegwa Marko.
Currently Selected:
Incito 12: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.