2 Samuele 14
14
Abisalomu mbwaakaboozegwa ku-Jerusalemu
1Lino Joabu mwana wa-Zeruya, naakabona kuti moyo wamwami ulisukeme Abisalomu, 2#2 Mak 11:6; 20:20; Neh 3:5,27; Jer 6:1; Am 1:1; Rut 3:3wakatuma ku-Tekowa kuyootamba mwana kazi uucenjede. Lino wakamwaambila kuti, Ulyeenyenye kuti uli sikulila, usame zyakusama zya dilwe akutalinanika mafuta, kuti uboneke mbuli mwanakazi iwamana mazuba manji kukulila mufu. 3#Kul 4:15Elyo uleelede kusika kumwami akumwaambila obo, Nkabela joabu wakabika majwi mukanwa lyakwe. 4#1 Sam 20:41; 2 Sam 1:2; 2 Bam 6:26Mpawo oyo s mwanakazi waku-Tekowa wakasika kumwami, nkabela wakavundama ansi akukotamina, wakati, Kondigwasya, O mwami.
5 #
2 Sam 12:1
Elyo mwami wakamubuzya kuti, Ninzi? Wakati, Ndi mukasikufwa, ndakafwidwa mulumi wangu. 6Lino ime ndemulanda wako ndakajisi bana balombe bobile, Aba bobile bakalwana musokwe, nkabela taakwe muntu wakubalesyanya, aboobo umwi wakauma mweenzinyina akumujaya. 7#Matl 4:14; My 35:19; Dt 19:12Mpawo mukowa woonse wakandibukila ndemulanda wako, bakati, Utwaabile oyo mwana iwakajaya mweenzinyina, kuti tumujaye alakwe nkaambo kabuumi bwamweenzinyina ngwaakajaya. Lino kukucita obo balanyonyoona sikulyazina, aboobo balazimya mulilo wangu uucisyeede akutasiila mulumi wangu niliba izina niluba luungu ansi ano. 8Nkabela mwami wakaambila mwanakazi kuti, Koya kuŋanda yako, ndalailila aanduwe.
9 #
Matl 27:13; 1 Sam 25:24; 2 Sam 3:28,29; Mt 27:25; My 35:33; 1 Bam 2:33 Mpawo mwanakazi waku-Tekowa wakaambila mwami kuti, O mwami simalelaangu, mulandu ube wangu awaluzubo lwataata, pele kumwami akucuuno cakwe cabwami kutabi mulandu abuniini pe. 10Lino mwami wakati, Kufumbwa muntu uukwaambila cintu, komuleta kulindime, elyo takooyookukataazya limbi pe. 11#My 35:19; Jos 20:3-6; 1 Sam 28:10; 14:45; Inc 27:34Wakati, Mwami atalubi Jehova Leza wakwe, kuti sikutema mulandu wabulowa atanyonyooni limbi, atajayi mwanaangu. Wakati, Ncobeni Jehova mbali muumi, mwanaako takooyoowidwa ansi kasusu nikaba komwe.
12Lino mwanakazi wakati, Ime ndi mulanda wako. Ngambile mwami simalelaangu ijwi. Wakaamba kuti, Amba. 13#Bab 20:2; 2 Sam 13:37Mpawo mwanakazi wakati, Ino nkaambonzi nokanza makani aali boobo cakubisizya bantu ba-Leza? Nkaambo mwami mbwaamba obo uli mbuli muntu uujisi mulandu, nkaambo mwami taboozyi kulinguwe mwanaakwe uutandidwe. 14#Job 30:23; 34:15; Muk 3:19; Heb 9:27; My 35:15Nkaambo ncobeni tuleelede kufwa, abwalo buumi bwesu bulaba mbuli maanzi aatika ansi aatakonzyi kuboozegwa mwakabede, Nkabela Leza mwini tanyanzyi buumi, pele ulakanza buyo makanzo kuti mwanaakwe uutandidwe atatandililwi. 15Lino ndasika kuzooambila mwami simalelaangu aya makani nkaambo kakuti bantu bandiyoosya. Ndemulanda wako ndakati, Nkaambile mwami. Ambweni mwami ulacita mbwaamba mulanda wakwe musimbi. 16Nkaambo mwami uyoondiswiilila akundivuna ndemulanda wakwe kuzwa kumaanza aayooyo uuyanda kutunyonyoona toonse amwana wangu kunyika ya-Jehova. 17#2 Sam 19:27; 1 Sam 29:9Aboobo ndemulanda wako ndakati, Ijwi lyamwami simalelaangu libe lyakutontozya nkaambo mwami simalelaangu uli mbubonya mbuli angelo wa-Leza, ulizi kumvwisya makani mbwaabede na mabotu na mabi, alimwi Jehova Leza wako abe ayebo.
18Mpawo mwami wakaambila mwanakazi kuti, Utandisisi makani ngenti kakubuzye. Mwanakazi wakati, Aambe simalelaangu. 19Lino mwami wakabuzya kuti, Sa ijanza lya-Joabu talili ayebo mumakani aya na? Nkabela mwanakazi wakavuwa kuti, Ncobeni mbubonya mboli muumi, O mwami simalelaangu, taakwe muntu uukonzya kuleesya majwi ngaamba mwami simalelaangu, nikuba kululyo nikuba kucimweensi, nkaambo mulanda wako Joabu nguwakandilailila ndemulanda wako akubika aya majwi oonse mukanwa lyangu. 20#2 Sam 19:27Kusandula makani mulanda wako Joabu nkwaakacitila obo. Lino mwami wangu uli amaanu mbuli maanu aangelo wa-Leza, ulibwene toonse twaansi.
21Elyo mwami wakaambila Joabu kuti, Bona! Ndacita eci cintu. Koya, ukaboozye mulombe Abisalomu. 22Mpawo Joabu wakavundama ansi, wakakotamina, akulumba mwami. Nkabela Joabu wakati, Sunu ndemulanda wako ndizi kuti ndijene luzyalo mumeso aako nkaambo mwami wazumina kucita mbubonya mbundaamba ndemulanda wakwe. 23#Dt 3:14; 2 Sam 3:3; 13:37Lino Joabu wakanyamuka, wakaya ku-Gesuri akuboozya Abisalomu ku-Jerusalemu, 24#Matl 43:3; 2 Sam 3:13; Ciy 22:4Mpawo mwami wakati, Aye kuŋanda yakwe, tatukonzyi kubonana ameso pe. Aboobo Abisalomu wakaya kuŋanda yakwe, pele kubonana ameso katana kubona mwami pe.
25 #
Dt 28:35; Job 2:7; Is 1:6; Ef 5:27 Lino mucisi coonse ca-Israyeli katakwe muntu naba omwe iwakatembaulika kwiinda Abisalomu kumakani aabweebesi, Kuzwa kundyato kusikila kumutwe katakwe kampenda alinguwe. 26#2 Sam 18:9Nkabela ciindi coonse ncaakagelwa, (wakali kugelwa lyoonse kumamanino aamwaaka, nkaambo isusu lyakwe lyakamulemena, nciceeco ncaakali kugelelwa), wakeeleka bulemu bwasusu lyakwe, wakajana kuti mbwamasyekeli aali myaanda yobile mbwaaelekwa kuceelesyo camwami. 27#2 Sam 18:18Nkabela Abisalomu wakazyala bana balombe botatwe amusimbi omwe, izina lyakwe kali Tamara, kali mwanakazi waciwa ceebesi.
28Lino Abisalomu naakamana myaaka yobile yakukala mu-Jerusalemu, katana kubonana amwami kumeso. 29Elyo Abisalomu wakatumina Joabu kuti amutume kumwami, pele wakakaka kuza, alimwi naakatuma alwabili wakacili kukaka. 30#2 Sam 13:28; Bab 15:5; Tus 29:12Mpawo wakaambila balanda bakwe kuti, Amubone! Muunda wa-Joabu ulibambene awangu, alimwi ulilimide bbaale mulinguwo. Kamuya, mukautente amulilo, Mpawo balanda ba-Abisalomu bakaakutenta muunda wa-Joabu. 31Elyo Joabu wakanyamuka, wakasika kuŋanda yaAbisalomu, wakamubuzya kuti, Ino nkaambonzi balanda bako nobatenta muunda wangu? 32#Job 31:33; Tus 28:13; Jer 8:12Nkabela Abisalomu wakavuwa kuti, Swiilila! Ndaka-kutumina, ndakati, Boola okuno, nkakutume kumwami akumubuzya kuti, Ino nkaambonzi ndeza okuno kuzwa ku-Gesuri? Nicandibotela kwiinda nindacili nkukonya. Lino njanda kubonana amwami kumeso, elyo na ndijisi mulandu, andijaye. 33#Matl 33:4; 45:15; Lk 15:20Mpawo Joabu wakasika kumwami akumwaambila aya makani. Elyo wakatumina Abisalomu, nkabela wakasika nkwaakabede mwami akumukotamina cakuvundama ansi. Lino mwami wakamyonta Abisalomu.
Currently Selected:
2 Samuele 14: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
