2 Samuele 12
12
Natani mbwaakanyemena Davida nkaambo kazibi zyakwe
1 #
Int 51:1; 2 Sam 14:5; 1 Bam 20:35; Mt 21:33,45; Lk 15:11 Elyo Jehova wakatuma Natani kuli-Davida, nkabela naakasika wakamwaambila kuti, Mumunzi umwi kamuli bantu bobile, umwi kali muvubi, umwi kali mucete. 2Muvubi kajisi imbelele aŋombe zinji loko, 3pele mucete katakwe ncaakajisi cita kabelele komwe kapwizi nkaakavubide, Aka kabelele wakakalela kuŋanda yakwe antoomwe abana bakwe. Kakali kulya munsuma wakwe mwini, akunywida munkomeki yakwe, akulala akaango kakwe, aboobo kakaba mbuli mwana musimbi wakwe. 4Lino muvubi wakaswayigwa silweendo, pele teewakayanda kujayila oyo mweenzu niiba imwi yambelele zyakwe na yaŋombe zyakwe, pe, wakabweza kabelele kamweenzinyina mucete, nkako nkaakajayila mweenzu iwakeza kuzoomuswaya. 5Mpawo Davida wakakalalila loko oyo muntu, wakati, Ncobeni oyo muntu iwakacita obo uleelede kufwa. 6#Kul 22:1; Lk 19:8Ako kabelele uleelede kukabweedezezya kone, nkaambo kakucita obo akutafwa insoni.
7 #
1 Sam 16:13; 2 Sam 7:8 Mpawo Natani wakaambila Davida kuti, Nduwe omwini. Mbuboobu mbwaamba Jehova Leza wa-Israyeli, Ndakakunanika kuti ube mwami wa-Israyeli akukuvuna kuzwa kumaanza aa-Saulo. 8Nkabela ndakakupa iŋanda yasimalelaako, abalo banakazi basimalelaako ndakabakumbatanya ayebo. Ndakakupa luzubo lwa-Israyeli alwa-Juda, alimwi eci coonse nicakakuceela, nindakakupa azimwi zintu zili boobo. 9#Matl 9:5,6; 1 Sam 15:19; Lev 26:15,16; My 15:31; Tus 13:13; Is 5:24; 2 Sam 11:15Lino nkaambonzi nowasampaula ijwi lya-Jehova akucita bubi kumeso aangu? Uriya mu-Hiti wamujazya ipanga, amukakwe wamutola kulinduwe. Wamujazya ipanga lyabana-Amoni. 10#2 Sam 11:15Nkaambo kako ipanga talikonzyi kuleka kukataazya mukowa wako mazuba oonse, nkaambo wandisampaula akutola muka-Uriya mu-Hiti abe mukako. 11#2 Sam 16:22; Dt 28:30Mbuboobu mbwaamba Jehova. Langa! Ndakubusizya bubi buzwa muŋanda yako omwini. Njookunyanzya banakazi bako kumeso aako akubaabila mweenzinyoko, elyo uyoolalika banakazi bako izuba kalibala. 12Cintu nciwakacita webo cakalisisidwe, pele eci cintu ncinti cite mebo ciyoocitwa kumeso aaba-Israyeli boonse azuba kalibala. 13#1 Sam 15:24; 2 Sam 24:10; Job 7:20; Int 32:5; 51:4; Tus 28:13; Int 32:1; Mik 7:18; Zek 3:4Mpawo Davida wakaambila Natani kuti, Ndabisya kuli-Jehova. Elyo Natani wakaambila Davida kuti, Alakwe Jehova wagwisya zibi zyako. Tokooyoofwa pe. 14#Is 52:5; Ezk 36:20; Rom 2:24Nekubaboobo nkaambo kacibaka cakusampaula ncibapegwa basinkondonyina Jehova kuncito eyi njiwacita, ncobeni oyo mwana uuti kuzyalilwe ulafwa. 15#Matl 4:7; Am 3:2Mpawo Natani wakaya kuŋanda yakwe.
Nkabela Jehova wakauma mwana ngwaakazyala muka-Uriya kuli-Davida, aboobo wakaciswa loko. 16#Is 26:16; Jer 18:8; 50:4; Bab 20:26; Joel 1:14; 2 Sam 13:31Elyo Davida wakakombela mwana kuli-Leza, wakaliimya kulya akuyoolala ansi masiku oonse. 17Lino bapati baŋanda yakwe bakabuka kuzoomubusya ansi mpaakalede, pele wakakaka, teewakalya abo insima pe. 18Nkabela mubuzuba bwamusanu aabili mwana wakafwa, elyo balanda ba-Davida bakayoowa kumuzibya makani aalufu lwamwana, nkaambo bakaamba kuti, Mwana naakali muumi, wakakaka kuswiilila majwi esu ciindi ncitwakamwaambila, lino na twamwaambila kuti mwana wafwa, ulaindila kubijilwa. 19Mpawo Davida wakabona kuti balanda bakwe balapetekezya, aboobo wakamvwa kuti mwana wafwa. Lino Davida wakabuzya balanda bakwe kuti, Wafwa na mwana? Bakati, Ii, wafwa.
20 #
Rut 3:3; Job 1:20; Int 95:6-8; 103:8-17; Tus 3:7; 16:6; Malo 3:40,41 Mpawo Davida wakabuka ansi, wakasamba, wakanana akusama zisamo zimbi, wakaya kuŋanda ya-Jehova kuyookomba. Lino naakabweeda kuŋanda yakwe, wakakumbila kuti bamupe cilyo, elyo wakalya. 21Lino balanda bakwe bakabuzya kuti, Ino ninzi eci nciwacita? Mwana naakacili muumi, wakali kuliimya kulya akulila, pele ecino ciindi mwana naafwa, wabuka akulya insima. 22#Is 38:1,5; Jon 3:9Wakati, Mwana, naakacili muumi, ndakaliimya kulya akulila, nkaambo ndakati, Ambweni Jehova ulatufwida luzyalo, kuti mwana apone. 23#2 Kor 5:1-8; Heb 11:10; 13:14; Job 7:8,9Pele ecino ciindi naafwa, sa ndakonzya kuliimya kulya na? Sa ndakonzya kumuboozya? Ime njooinka nkwabede, pele walo takooyooboola kulindime pe.
Kuzyalwa kwa-Solomoni
24 #
Mt 1:6; 1 Mak 22:9 Lino Davida wakaumbulizya mukakwe Bateseba, nkabela wakaya nkwaakabede akulala awe. Elyo wakazyala mwana, wakamuulika izina lya-Solomoni. Nkabela Jehova wakamuyanda, 25wakatuma kujanza lya-Natani musinsimi, akumuulika izina lya-Muyandwi-wa-Jehova, nkaambo ka-Jehova.
Davida ncaakacitila ba-Amoni
26 #
1 Mak 20:1; Dt 3:11 Lino Joabu wakalwana a-Raba mumi waba-Amoni, nkabela wakasaala munzi wamwami. 27Mpawo joabu wakatuma batumwa kuli-Davida, wakati, Ndalwana a-Raba, alimwi ndausaala munzi wamaanzi. 28Lino webo kobunganya boonse bantu basyeede, uze kuzoozyunguluka munzi akuuzunda, kuti utazundwi kumaanza aangu akubandwa izina lyangu. 29Mpawo Davida wakabunganya bantu boonse, wakainka ku-Raba, wakalwana amunzi akuuzunda. 30#1 Mak 20:2Nkabela wakagwisya munsini wamwami kumutwe wakwe. Bulemu bwamunsini oyo kabuli mbuli italenta lyangolida, alimwi wakali amabwe mayandisi, elyo wakabikwa amutwe wa-Davida. Nkabela oko kumunzi bakanyanzya cisaalo cipati loko. 31Abalo bantu ibakali mulinguwo, wakabagwisya akubabika kumasaha akuzisagwido zyabutale akutuleba twabutale, akubabelesya milimo yakubumba zitina. Mbubonya obo mbwaakacitila minzi yoonse yabana-Amoni, Elyo Davida wakaboola abantu boonse ku-Jerusalemu.
Currently Selected:
2 Samuele 12: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
