1 Samuele 6
6
Ba-Filisti mbubakabweedezya ibbokesi lya-Leza
1Nkabela ibbokesi lya-Leza lyakali mucisi caba-Filisti myeezi iili musanu aibili. 2#Matl 41:8; Kul 7:11; Dan 2:2; 5:7; Mt 2:4Lino ba-Filisti bakaita bapaizi abasondi, bati, Tulicite buti ibbokesi lya-Jehova? Amutwaambile tulitume buti kubusena bwalyo? 3#Kul 23:15; Dt 16:16; Lev 5:15; 6:6Mpawo bakaamba bati, Mwatuma ibbokesi lya-Leza wa-Israyeli, mutalitumi buyo, muleelede kulibweedezya antoomwe aluliyo, lino mulaponezegwa, alimwi tulaziba nkaambonzi ijanza lyakwe talizwi kulindinywe. 4#Jos 13:3; Bab 3:3Lino bakaamba bati, Ino nduliyonzi ndutweelede kubweedezya antoomwe andilyo? Nkabela bakaamba bati, Zyuute zyosanwe zyangolida ambeba zyosanwe zyangolida, mbuli mweelwe wabami baba-Filisti, nkaambo kakuti bulwazi bomwe bwakamusikila nyoonse abami banu. 5#1 Sam 5:6; Jos 7:19; 1 Mak 16:28; Is 42:12; Jer 13:16; Mal 2:2; Joh 9:24; Ciy 14:7; 16:9; Kul 9:3; 1 Sam 5:6,11; Int 39:10; Inc 13:11Muleelede kucita zikozyano zyazyuute zyanu azikozyano zyambeba zimubisizya nyika, muleelede kumupa bulemu Leza wa-Israyeli, inga ulalesya ijanza lyakwe, lizwe alindinywe akumizimo yanu akunyika yanu. 6#Kul 7:13; 8:15; 3:19,20; 6:1; Int 105:38Ino nkaambonzi mulalemya myoyo yanu mbuli ba-Egepita a-Farao mbubakalemya myoyo yabo? Naakamana kubasabula, teebakabatuma kuti bainke na? 7#2 Sam 6:3; My 19:2Lino amubweze akubamba iŋola impya ampwizi zyobile zinyonsya zitana kwaangwa ijoko, Alimwi amubope impwizi kunola pele bana bazyo mubaboozye kucimpati. 8Lino muleelede kubweza ibbokesi lya-Jehova akulibika aŋola, azyalo zintu zyangolida nzimubweedezya mbuli luliyo antoomwe andilyo amuzilongele mucibikilo kubbazu lyalyo, lino amulitumye, liinke. 9#Jos 15:10Lino mwabona kuti lilaya kunzila iiya kulindilyo ku-Betisemesi, mulaziba kuti nguwe watuletela mapenzi aya mapati, anukuti mwabona kuti taliyi boobu tulaziba kuti teensi ijanza lyakwe lyatuuma pele asika eni.
10Mpawo baalumi bakacita obo, bakabweza impwizi zyobile zinyonsya, bakazibopa kunola, nkabela bana bazyo bakabajalila muŋanda. 11Lino bakalongela ibbokesi lya-Jehova aŋola antoomwe acibikilo ambeba zyangolida azikozyano zyazyuute. 12Nkabela impwizi zyakalulama munzila yakuya ku-Betisemesi, zyakeenda munzila ziya bulila, teezyakalea pe nikuba kululyo nikuba kulumwensi, nkabela bami baba-Filisti bakali kuya bweenda musule lyazyo kusikila kumunyinza wa-Betisemesi,
13Nkabela bantu ba-Betisemesi bakali mukutebula bulotwe mumumpata, lino bakapuwama, bakabona ibbokesi, bakakondwa kulibona. 14Lino iŋola yakanjila mumuunda wa-Joshua muna-Betisemesi, yakiima nkukonya. Nkabela oko kwakali ibbwe ipati. Mpawo bakakosaula zisamu zyanola, ampwizi bakazituuzya mbuli cituuzyo ca-Jehova. 15Lino ba-Levi bakalongonona ibbokesi lya-Jehova acibikilo cakali antoomwe andilyo, eco mumwakali zintu zyangolida bakali tula abbwe ipati, nkabela bantu baBerisemesi bakatuulila Jehova zituuzyo akumupaizizya zipaizyo obo buzuba. 16#Jos 13:3; Bab 3:3; 16:23; 1 Sam 29:2; Zef 2:5Lino bami bosanwe baba-Filisti nibakabona bakabweeda ku-Ekroni mubuzuba obo mbubonya.
17Lino zyuute zyangolida nzibakabweedezya ba-Filisti mbuli luliyo lwaJehova zyakali boobu, cimwi cakali ca-Asidodi, cimwi cakali ca-Gaza, cimwi cakali ca-Asikeloni, cimwi cakali ca-Gati, cimwi cakali ca-Ekroni. 18Azyalo imbeba zyangolida zyakali mbuli mweelwe wamyunzi yoonse yaba-Filisri yabami bosanwe, niiba myunzi iizyungulusizidwe imbaya niiba myunzi iitakwe imbaya kusikila kubbwe ipati mpobakatula ibbokesi lya-Jehova alindilyo, Ibbwe elyo liciliko asunu mumuunda wa-Joshua muna-Betisemesi.
19 #
Kul 19:21; Lev 10:1-3; My 4:5,15,20; Dt 29:29; 2 Sam 6:7; Kol 2:18; 1 Pet 4:17 Pele bana ba-Jekoniya teebakatangala antoomwe abana-Betisemesi nibakabona ibbokesi lya-Jehova, nkabela wakakoma akati kabo bantu bali makumi aali musanu aabili abantu bali zyuulu zili makumi osanwe. Lino bantu bakalila nkaambo kakuti Jehova wakauma bantu luumo lupati. 20#2 Sam 6:9; Mal 3:2; Ciy 6:17Nkabela bantu ba-Betisemesi bakaamba bati, Ino nguni uukonzya kuliimika kubusyu bwa-Jehova oyu Leza uusalala? Aye kuli kuzwa kulindiswe? 21#Jos 18:14; Bab 18:12; 1 Mak 13:5,6Nkabela bakatuma basimilazyo kubantu ba-Kiriyati-Jearimu, bati, Ba-Filisti baboozya ibbokesi lya-Jehova. Amuseluke, mulitansike kulindinywe.
Currently Selected:
1 Samuele 6: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.