1 Samuele 7
7
1 #
2 Sam 6:2-4; 1 Mak 13:5-7; 1 Sam 6:21; Int 132:6 Lino bantu ba-Kiriyati-Jearimu bakasika, bakatansika ibbokesi lyaJehova, bakalileta kuŋanda ya-Abinadabu mucilundu, Nkabela mwa naakwe Eleazeri bakamusalazya kuti alindile ibbokesi lya-Jehova.
Samuele mbwaakakombelezya ba-Israyeli. Ba-Filisti mbubakakomwa
2Lino kuzwa kubuzuba obo mbulyakakala ibbokesi mu-Kiriyati-Jearimu ciindi cakalampa, cakasika kumyaaka iili makumi obile. Nkabela luzubo loonse lwa-Israyeli lwakali kuya bulilila Jehova.
3 #
Dt 30:2; 1 Bam 8:48; Is 55:7; Hos 6:1; Joel 2:12; Matl 35:2; Jos 24:14; Bab 2:13; 2 Mak 30:19; Mt 4:10; 15:8; Lk 4:8 Lino Samuele wakaambila luzubo loonse lwa-Israyeli wati, Kuti mwapiluka kuli-Jehova camoyo woonse, amugwisye mizimo myeenzu kuzwa mukati kanu, abalo ba-Astoreti amubagwisye. Amubambe myoyo yanu kuli-Jehova, mumanine nguwe luzutu milimo, kuti amuvune kuzwa mumaanza aaba-Filisti. 4Mpawo bana ba-Israyeli bakagwisya ba-Baala abaAstoreti, akumanina Jehova luzutu milimo,
5 #
Bab 10:17; 11:11; 1 Sam 10:17; 2 Bam 25:23 Lino Samuele wakaamba wati, Amubunganye ba-Israyeli boonse kuMizipa, nkamukombele kuli-Jehova. 6#2 Sam 14:14; Neh 9:1,2; Dan 9:3; Joel 2:12; Lev 26:40; Bab 10:10; 1 Bam 8:47; Job 33:27,28; Int 106:6Nkabela bakabungana ku-Mizipa, bakateka maanzi akwaatila kubusyu bwa-Jehova, Nkabela bakaliimya zilyo mubuzuba obo, bakaamba oko bati, Twabisizya Jehova. Lino Samuele wakabeteka ba-Israyeli mu-Mizipa. 7Mpawo ba-Filisti nibakamvwa kuti ba-Israyeli bakalibungene ku-Mizipa, bami baba-Filisti bakaya kuyoolwana aba-Israyeli, Lino bana ba-Israyeli nibakamvwa bakayoowa nkaambo kabaEilisti. 8#Is 37:4Nkabela bana ba-Israyeli bakaambila Samuele bati, Utaleki pe kutukumbilila kuli-Jehova Leza wesu, kuti atuvune kuzwa kumaanza aabaFilisti. 9#Int 99:6; Jer 15:1Lino Samuele wakabweza kabelele komwe kanyonka, wakakatuula koonse mbuli cituuzyo kuli-Jehova. Nkabela Samuele wakakumbilila Israyeli kuli-Jehova, alakwe Jehova wakamuvwiila,
10 #
Jos 10:10; Bab 4:15; 1 Sam 2:10; 2 Sam 22:14,15 Lino Samuele naakacili mukutuula cituuzyo, ba-Filisti bakaswena afwiifwi kuzoolwana aba-Israyeli, nkabela Jehova wakandindima ajwi ipati mubuzuba obo kuba-Filisti, wakabayoosya, nkabela bakakomwa kubusyu bwaba-Israyeli. 11Nkabela bantu ba-Israyeli bakazwa ku-Mizipa akuya butanda ba-Filisti akubauma kusikila kunsi ku-Betikara. 12#1 Sam 4:1Lino Samuele wakabweza ibbwe, wakalibika akati kaku-Mizipa aku-Seni, wakalyuulika izina lya-Ebenezeri, nkaambo wakaamba wati, Kusikila sunu Jehova watugwasya. 13#Bab 13:1; 1 Sam 13:5Nkabela ba-Filisti bakazundwa, teebakacili kuboola alimwi kusika kucisi caba-Israyeli, nkabela ijanza lya-Jehova lyakali kukoma baFilisti mazuba oonse aa-Samuele. 14Lino myunzi yoonse njibakanyanzizye ba-Filisti kuzwa kuba-Israyeli yakaboola kuba-Israyeli kuzwa ku-Ekroni kusikila ku-Gati, alimwi cisi ceengelede njiyo acalo ba-Israyeli bakacivuna kuzwa kumaanza aaba-Filisti. Nkabela kwakaba luumuno akati kabaIsrayeli aba-Amori. 15#1 Sam 12:11; Bab 2:16Nkabela Samuele wakali kubeteka ba-Israyeli mazuba oonse aabuumi bwakwe. 16Myaaka yoonse wakali kuya buzyunguluka ku-Beteli aku-Giligala aku-Mizipa, akubeteka ba-Israyeli mumasena aya oonse. 17#Bab 21:4Lino wakali kuboola ku-Rama nkuyakabede iŋanda yakwe, nkabela wakabeteka Israyeli nkukonya oko, alimwi wakayaka oko cipaililo ca-Jehova.
Currently Selected:
1 Samuele 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.