1 Samuele 21
21
Davida mbwaakaswaya Ahimeleki ku-Nobi
1 #
Mt 12:3-4; Mk 2:25-26; Lk 6:3; 1 Sam 22:19; Neh 11:32; Is 10:32; 1 Sam 14:3 Lino Davida wakasika ku-Nobi kuli-Ahimeleki mupaizi. Nkabela Ahimeleki wakakankama naakabona Davida, wakati, Ino nkaambonzi noza olike, taakwe angomuli awe? 2#Matl 27:20-24; 1 Sam 19:11; 22:22; 1 Bam 13:18; Int 119:29; 141:3; Tus 29:25; Gal 2:12,13; Kol 3:9Mpawo Davida wakaambila Ahimeleki mupaizi kuti, Mwami wakandilailila makani, alimwi wakandaambila kuti, Kutabi muntu uuziba abuniini makani aya ngindakutumina, ngindakulailila. Aboobo ndibikilide balombe kuli banyomfwi. 3Lino ujisinzi okuno? Undipe zinkwa zyosanwe nanka kufumbwa cintu ncojisi. 4#Kul 25:30; Lev 24:5; Mt 12:4; Kul 19:15; Zek 7:3Mpawo mupaizi wakavwiila Davida kuti, Nsijisi zinkwa ziligwa bantu buyo pe, pele zinkwa zisalazidwe nkuzili. Na balombe balitimizizye kuya kubanakazi, mbubo. 5#1 Tes 4:4; Lev 8:26Nkabela Davida wakavwiila mupaizi kuti, Ncobeni twakacelezegwa kuya kubanakazi mazuba otatwe, alimwi ciindi eco ncindakanyampuka, inkomo zyabalombe zyakasalala, nikuba kuti lweendo lwesu ndwabantu buyo, lino sunu ncobeni inkomo zyabo zilainda kusalala. 6#Lev 24:5-9; Mt 12:3; Mk 2:25; Lk 6:3Elyo mupaizi wakamupa zinkwa zisalazidwe, nkaambo kakutakwe zinkwa zimbi pele zinkwa zituulidwe zilike izyakagwisigwa kuzwa kubusyu bwa-Jehova kuti kubikwe zimwi zicipya mubuzuba obo mbubonya.
7 #
1 Sam 22:9
Lino kakuli umwi muntu wabalanda ba-Saulo wakaliwo mubuzuba obo, wakalikasidwe kubusyu bwa-Jehova, izina lyakwe kali Doegi mu-Edomi, kali singuzu akati kabasilutwe ba-Saulo. 8Mpawo Davida wakaambila Ahimeleki kuti, Sa taakwe isumo nunka ipanga okuno kulinduwe? Nkaambo nsiletede ipanga lyangu azintu zyangu, nkaambo makani aamwami akandibinzya. 9#1 Sam 17:51; 31:10Nkabela mupaizi wakati, Mpolili ipanga lya-Goliati muFilisti, nguwe ngowakajaya mumumpata wa-Ela. Lilizambaidwe mucisani okuno kusule lyacikobela cabupaizi. Na ulayanda kulitola, litole, nkaambo taakwe limbi okuno. Mpawo Davida wakati, Taakwe limbi lili mbuli leeli, amundipe.
Davida mbwaakacijila kuli-Akisi mwami wa-Gati
10Mbuboobo Davida mbwaakanyamuka mubuzuba obo akucija kuzwa kuli-Saulo, Nkabela wakasika kuli-Akisi mwami wa-Gati. 11#1 Sam 18:7; 29:5Mpawo balanda ba-Akisi bakamwaambila kuti, Sa oyu teensi Davida mwami wacisi? Sa teensi nguwe ngubakali kwaamba nibakali kuzyana akuvwiilana kuti,
Saulo wajaya bantu bali zyuulu,
Davida wajaya makumi aazyuulu?
12 #
Int 56:1
Lino Davida akamunjila mumoyo majwi aya, wakali kuyoowa loko kubusyu bwa-Akisi mwami wa-Gati. 13#Int 34:1Mpawo wakasandula ziyanza zyakwe kumeso aabo, wakalisondosya-sondosya, wakagwala-gwala kuzitendele zyamilyango, akumbwembwelesya mate kucilezu cakwe. 14Lino Akisi wakaambila balanda bakwe kuti, Sa tamubwene kuti oyu muntu wasondoka? Mwamuletelanzi kulindime? 15Sa njanda basondosi? Sa nciceeco ncimwamuletela okuno, kuti alisondosesye kulindime? Sa oyu muntu uleelede kunjila muŋanda yangu?
Currently Selected:
1 Samuele 21: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
