1 Makani 17
17
Davida mbwaakayeeya kuyakila Jehova iŋanda
1 #
2 Sam 7:1; 1 Mak 14:1; Hag 1:4; Inc 7:46 Lino Davida naakakede muŋanda yakwe, Davida wakaambila Natani musinsimi kuti, Bona! Mebo ndikede muzjanda yazisamu zyakedari, pele ibbokesi lyacizuminano ca-Jehova cili mucilao camasani buyo. 2Mpawo Natani wakaambila Davida kuti, Mbubo, kocita zyoonse zili mumoyo wako, nkaambo Leza uli ayebo,
3Pele masiku ayo ngaonya ijwi lya-Jehova lyakasikila Natani, liti, 4Koya, ukaambile Davida mulanda wangu kuti, Mbuboobu mbwaamba Jehova. Tokooyoondiyakila iŋanda yakukala pe. 5#Kul 40:2; 2 Sam 6:17; 1 Bam 8:4,16Nkaambo nsina kukala muŋanda kuzwa kubuzuba obo nindakalonzya bana ba-Israyeli akusikila kubuzuba obuno. Ndakali kulonga-longa buyo muzilao zilao amuzikalilo zikalilo. 6Koonse koonse nkundakali kweendeenda aba-Israyeli boonse, sa ndakaamba ijwi niliba lyomwe mumatwi aaumwi wababetesi mbondakalailila kweembela bantu bangu ba-Israyeli lyakuti, Nkaambonzi tamuna kundiyakila iŋanda yazisamu zyakedari? 7Lino mbuboobu mboelede kwaambila mulanda wangu Davida, Mbuboobu mbwaamba Jehova wamakamu. Ndakakugwisya kumacezezyo nkuwakali kweembela imbelele, kuti ube musolozi wabantu bangu ba-Israyeli. 8Ndakali ayebo koonse koonse nkuwakaya, abasinkondonyoko boonse ndabanyonyoona kubusyu bwako, Lino ndakupa izina idemu mbubonya mbuli izina lyabapati baansi. 9#Jer 31:12; Ezk 34:14; 2 Mak 15:2; Is 49:17Alimwi nzoobikila bantu bangu ba-Israyeli busena, akubasimpika kuti bakale kabotu mpobabede akutazungaana limbi. Bantu babi tabakooyoobapenzya limbi, mbubakali kutaanguna kubapenzya, 10kuzwa kumazuba alya nindakaboola bantu bangu ba-Israyeli babetesi. Nkabela njoobombya basinkondonyoko boonse. Alimwi ndakulwiida kuti Jehova uyookuyakila iŋanda. 11Lino mazuba aako naazoozulila aakuya nkubabede bamauso bafwide, njookubusizya inyungu zyako, umwi wabana bako uuelede kulya izina lyako, nkabela njoosimpika kabotu bwami bwakwe. 12Ngonguwe uuti ndiyakile iŋanda, nkabela njoosimpika cuuno cabwami bwakwe kuti citazungaani mazuba oonse. 13#2 Sam 7:14,15; 1 Mak 22:10; 28:6; Heb 1:5Njooba wisi, alakwe uyooba mwanaangu. Nsikooyoomunyanzya luzyalo lwangu mbundakanyanzya oyo iwakakutaangunina mubwami. 14#Int 2:6; 89:36; 110:1; Is 9:7; Ezk 37:25; Dan 2:44; 7:14-27; Mik 4:1; Mt 21:1-11; Lk 1:33; Heb 1:8Njoocita kuti aime nji muŋanda yangu amubwami bwangu mazuba oonse aakutamani. Cuuno cabwami bwakwe ciyoosimpikwa mane kukabe kutamani. 15Nkabela Natani wakaambila Davida majwi aya oonse acilengano coonse ncaakabwene.
16 #
2 Sam 7:18; 2 Bam 19:14; Matl 32:10; Int 144:3; Job 7:17 Mpawo mwami Davida wakaakukala kubusyu bwa-Jehova, wati, Mebo ndimeni, O Leza Jehova? Abalo basiluzuboma mbobani? Wandisisya buti kumakani aali boobu? 17Alimwi eci kacili cintu ciniini buyo mumeso aako, O Leza, nkaambo waamba makani aaluzubo lwangu ndemulanda wako aaciindi cilamfu ciciza. Wanditondezya mazyalani aaciza, O Leza Jehova, 18#Int 139:1; Joh 21:17Lino Davida acaambe buti kulinduwe, mbolemeka mulanda wako? Nkaambo ulizi mulanda wako. 19#Mt 11:26; Ef 1:11O Jehova, nkekaambo kamulanda wako akaambo kamoyo wako nkuwacita aya makani aagambya akuzibya bantu makani mapati aali boobo. 20#Kul 15:11; Dt 3:24; 33:26; 1 Sam 2:2; 2 Sam 7:22; Int 86:8O Jehova, taakwe umbi uuli mbuli nduwe, Taakwe Leza umbi cita nduwe, mbubonya mbutumvwide mumatwi esu. 21Sa kuli musyobo nuuba umwi waansi ano uuli mbuli bantu bako baIsrayeli? Leza wakaya kuyoobanununa kuti babe bantu bakwe, Walicitila impuo impati iigambya mukutanda misyobo imwi kubusyu bwabantu bako ba-Israyeli mbowakanununa kuzwa ku-Egepita. 22Bantu bako ba-Israyeli wakababika kuti babe musyobo wako lyoonse akutamani. Ayebo, O Jehova, wakaba Leza wabo. 23Lino, O Jehova, majwi ngoamba aamulanda wako aluzubo lwakwe azuzikizigwe ncobeni akutamani. Kocita mbubonya mboamba. 24#2 Mak 6:33; Int 21:13; 72:19; Mt 6:9,13; Joh 12:28Aboobo izina lyako liyooyumisigwa akulemekwa lyoonse. Kuyooambwa kuti, Jehova wamakamu Leza wa-Israyeli ngonguwe Leza waba-Israyeli. Alwalo luzubo lwa-Davida mulanda wako luyooima nji kubusyu bwako. 25Nkaambo wandiyubunwida ndemulanda wako, O Leza wangu, kuti uyoondiyakila iŋanda. Nciceeco ndemulanda wako ncindalijanina bukozu bwakukukombela cikombyo eci. 26#Kul 34:6; Tit 1:2; Heb 6:18Lino Jehova, nduwe Leza. Wandisyomezezya ndemulanda wako aya makani mabotu. 27#Matl 27:33; Int 72:17; Rom 11:29Lino cikubotele kulongezya luzubo lwangu ndemulanda wako, kuti lukalilile kubusyu bwako lyoonse. Nkaambo kufumbwa ncolongezya webo, O Jehova, ciyoolongezegwa lyoonse.
Currently Selected:
1 Makani 17: Ibbaib63
Highlight
Share
Compare
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
