Romaq 6

Hkrisidùq Eq Rading Ralhum

1Haû nghut jáng, ngá-nhúng gi, hkâsu nghû taí râ lhú? Jeju myô jàt lò sháng gàq nghû, ngá-nhúng, yubàk mara kut xoq nyì râ lhú? 2Haû su a nghut sháng gàq! Ngá-nhúng gi, yubàk mara eq shi gang bê bang nghut lhê; hkâsu mù haú má wó dui nyì lo râ lhú? 3Hkrisidùq Yesuq eq rading ralhum za dùt râ matú, wuìmyhup hkâm yù bê bang ngá-nhúng bànshoq gi, Yhâng é shî hkâm hkyô má le rading ralhum za dùt râ matú, wuìmyhup hkâm yù bê nghut é lé, núngmòq a sé kó lhú? 4Haû mù luî, Hkrisidùq gi, Îwâ é hpungwup shingkâng èq, shî bê mai lhoqdui toq huî é su, ngá-nhúng le, chyungxe asik dông wó dui nyì sháng gàq nghû, ngá-nhúng gi, wuìmyhup hkâm é dông, Yhang eq rahá, shî hkâm é eq myhup yhûm é hui bê nghut lhê.

5Ngá-nhúng gi, Yhang shî hkâm é hkyô má, Yhang eq rading ralhum za dùt bê nghut jáng, Yhâng é dum dui toq hkyô má le, Yhang eq rading ralhum za hkyak dùt râ nghut lhê. 6-7Hkâsu mù gâ le, shî bê sû gi, yubàk mara mai lhoqlhut é hui bê nghut é yánmai, ngá-nhúng gi, yubàk marâ é jùn dùt nó a ra lo mù luî, yubàk mara gùng gi, lhoqhtên pyâm é hui râ matú, ngá-nhûng é byù xau gi, Yhang eq rahá jén sat pyâm é hui bê nghut é hkyô lé, ngá-nhúng sê lhê.

8Haû mù, ngá-nhúng gi, Yhang eq rahá shî hkám bê nghut jáng, Yhang eq rahá dui nyì râ nghut lhê nghû, lùmjíng lhê. 9Hkâsu mù gâ le, Hkrisidùq gi, shî bê mai lhoqdui toq é hui bê nghut mù, Yhang gi, dum wó shî lo râ a nghut é lé, ngá-nhúng sê lhê; shî‑nò hkyô gi, Yhang lé hkâ-nhám le wó sing to râ a nghut lo. 10Yhang shî hkâm é shî‑nò hkyô gi, bànshoq bâng é matú, yubàk mara eq séng luî radàm za shî hkám byi bê nghut ri; nghut kôlhang, Yhang dui nyi é chyungxe gi, Garai Gasâng hí má dui nyi é nghut lhê.

11Haû eq rajung za, núngmòq gi, yubàk mara eq shi gang luî, Hkrisidùq Yesuq dông Garai Gasâng é matú chyungxe dui nyi lhê nghû, sôn yù keq. 12Haû mù luî, núngmòq é htên byòq sê é gùngdu má, yubàk mara lé hkâ ùphkâng nhâng, ùphkâng nhâng kô é nghut jáng, gùngdu yùt yùt ô nau é agè ashop hkyô lé, núngmòq châng é nghut bê. 13Núngmòq é gùngdu showui showang pé lé, agè ashop hkyo é chûngzè pé dông yubàk mara má hkâ‑ap byî pyám kó, shî bê mai lhoqdui toq yû huî é bang su, yhûmsing gùng yhûmsîng, Garai Gasâng chyáng kúm àp byi keq; núngmòq é gùngdu showui showang pé lé, díngmán hkyo é chûngzè pé dông, Garai Gasâng chyáng àp byi keq. 14Hkâsu mù gâ le, núngmòq gi, jep é târâ hkaû má a nghut lô é za, jeju hkaû má nghut nyî bekô yánmai, yubàk mara gi, núngmòq lé sîng sû wó dùt râ a nghut lo.

Díngmán Hkyo É Jùn Pé

15Haû jáng gi, hkâsu kó lhú? Ngá-nhúng gi, jep é târâ hkaû má a nghut lô é za, jeju hkaû má nghut nyî bekô yánmai, mara wó kut shut kôrâ lhú? Haû su a wó kut! 16Núngmòq gi, rayùq yùq é jì-no gyo râ matú, yhûmsing gùng lé jùn pé dông àp pyâm é hkûn, shî‑nò hui râ nghut é yubàk marâ é jùn dông nghut kôlhang, díngmán hkyô wó râ nghut é jì-no gyo hkyô nghut kôlhang, núngmòq châng nyi é nghut le gi, núngmòq, hau é jùn dùt bê lé, a sé kó lhú? 17Núngmòq gi, yubàk marâ é jùn dùt wú bê bang nghut kôlhang, núngmòq hkam yu to bê mhoqshit hkyô lé, núngmòq é myìt nhiklhum bànshoq èq cháng bekô nghut é yánmai, Garai Gasang lé jeju hkya-on sháng. 18Núngmòq gi, yubàk mara mai lhoqlhut é hui bang nghut kômù, díngmán hkyo é jùn dùt bekô nghut ri.

19Núngmòq gi, sê gyô é u-nuq má wum nyhôm é bang nghut kô é yánmai, byu pé sê gyo râ dông ngò taí râ ga jáng: núngmòq gi, núngmòq é gùngdu showui showang pé lé, a sansêng é hkyô eq agè ashop hkyô myô jàt nhang é má jùn dông lháng àp byî wú bekô nghut é su, ahkuî gi, chyoiyúng hkyô wó yû râ matú, haú pé lé, díngmán hkyô má jùn dông àp byi keq. 20Núngmòq gi, yubàk marâ é jùn dùt nyì kô é hkûn, díngmán hkyo èq ùphkang é mai lùt nyì kô é nghut lhê. 21Ahkuî, núngmòq hoq jung nghû wú htoq é pé gi, haú u lé, hai a-kyû wó yû kô é lhú? Haú pé gi, shi byùq é má htûm é chyat nghut ri. 22Nghut kôlhang, ahkuî gi, núngmòq, yubàk mara mai lhoqlhut é hui bekô nghut mù, Garai Gasâng é jùn dùt bekô nghut ri; hau é a-kyû gi, chyoiyúng hkyô wó yu é nghut mù, ahtum abyùq é chyungxe wó râ nghut lhê. 23Hkâsu mù gâ le, yubàk marâ é ahpau gi, shi é hkyô nghut ri; nghut kôlhang, Garai Gasâng é chyûnghuq gi, ngá-nhûng é Yhûmsîng Hkrisidùq Yesuq é yánmai, ahtum abyùq é chyungxe nghut ri.

Currently Selected:

Romaq 6: znot

Highlight

Copy