Romaq 5

Nguì Ngón Hkyô Eq Gabú Hkyô

1Haû mù luî, ngá-nhúng gi, lùmjíng é dông mai mara hkyut san byî é hui bê nghut é yánmai, ngá-nhûng é Yhûmsîng Yesuq Hkrisidùq dông, Garai Gasang eq buìnùm wó xoq yû bê nghut lhê. 2Yesuq é yánmai, ngá-nhúng gi, ahkuî wó yu to bê jeju shî má, lùmjíng luî wó wâng bê nghut mù, Garai Gasâng é hpungwup shingkang lé myòqbyù luî gabú myìt mai taî nghutbûn nyi lhê. 3Haû za a nghut, ngá-nhúng gi, wuîhke jamjau hkyô pé má le gabú myìt mai taî nghutbûn nyi lhê. Hkâsu mù gâ le, wuîhke jamjau hkyô gi, hkam jan hkyô lhoqhtoq ri; 4hkam jan hkyô gi, myìt a-tsam lhoqhtoq lhê; myìt a-tsam gi, myòqbyu to hkyô lhoqhtoq é lé, ngá-nhúng sê lhê. 5Myòqbyu to hkyô haû gi, ngá-nhúng lé myìt wum gyuí nhang é a nghut; hkâsu mù gâ le, Garai Gasang gi, Yhâng é chyitdàp myìt lé, Yhang mai, ngá-nhúng lé byî tô é Chyoiyúng Sô dông, ngá-nhûng é i‑myìt ûnghkaû má hut kat byi bê nghut ri.

6Hkâsu mù gâ le, ngá-nhúng gi, a-tsam a bò dùt tô ashî u lé, ahkyíng hkyak má yhang, Hkrisidùq gi, yubàk dàp bang nghut é ngá-nhûng é matú shî hkám byi bê nghut ri. 7Gè gè ga jáng, díngmán su é matú shî hkám byi râ byù gi, shau râ nghut lhê; nghut kôlhang, byù gè rayùq é matú kúm gi, wám shî hkâm é byù nyì sê lhê. 8Nghut kôlhang, ngá-nhúng gi, yubàk dàp bang nghut nyi ashî hkûn, ngá-nhûng é matú Hkrisidùq shî hkám byî é má, Garai Gasang gi, Yhâng é chyitdàp myìt, ngá-nhúng lé shit byi bê nghut ri.

9Ngá-nhúng gi, ahkuî, Yhâng é sui mai mara hkyut san byî é hui bê nghut mù, Yhâng é yánmai, Garai Gasâng é nhikmó-yo hkyô mai, hkyi yu é je riyhang hui râ nghut lhê. 10Hkâsu mù gâ le, ngá-nhúng gi, Garai Gasâng é gye pé nghut nyi ashî u le, yhâng é Zo shî hkám byî é dông, Garai Gasang eq buìnùm wó xoq yu é hui bê nghut lhê. Wó xoq yu to bê nghut jáng, ngá-nhúng gi, Yhâng é chyungxe dông mai, gè gè yhang hkyi yu é hui râ nghut lhê. 11Haû su za a nghut, ngá-nhúng gi, ngá-nhûng é Yhûmsîng Yesuq Hkrisidùq dông mai, buìnùm wó xoq yu é jeju lé, ahkuî wó yu to bê nghut mù, Yhâng é yánmai, Garai Gasang má le, gabú myìt mai taî nghutbûn nyi lhê.

Shi É Gi, Adam É Yánmai, Dui É Chyungxe Gi, Hkrisidùq É Yánmai

12Byù rayùq dông mai, yubàk mara gi, mingkan má jé wâng bê nghut luî, shî‑nò hkyô gi, yubàk marâ é yánmai châng jé bê nghut ri; haú dông mai, byù lhúnglhâng bang gi, yubàk dàp bang chyat nghut byùq mù, shî‑nò hkyô gi, byù lhúnglháng bâng chyáng jé bê nghut ri. 13Hkâsu mù gâ le, haû jep é târâ lé a byi shi-má, yubàk mara gi, mingkan má jòq to bê nghut lhê. Nghut kôlhang, jep é târâ a jòq shî é hkûn gi, yubàk mara lé mara su a ngàm shî é nghut lhê. 14Haû su ga kôlhang, Adam su hkunmó lé lu laî é dông mara a kut shut bâng é ahtoq má lháng, shî‑nò hkyô gi, Adam é i-pyàt mai Mosheq é i-pyàt jé shoq up nyì bê nghut ri. Adam gi, jé lé lò râ su é azòng nghut ri.

15Nghut kôlhang, jeju chyûnghuq gi, haû mara kut shut é hkyô su a nghut; hkâsu mù gâ le, mara kut shut é byù rayùq é yánmai, byù myo myo shi pyâm é nghut le gi, Garai Gasâng jeju eq Yesuq Hkrisidùq gâ é byù rayùq é jeju mai lo é chyûnghuq gi, byù myo myô é htoq má hkâ-í yhang byíng mui nyi rî-nhung! 16Garai Gasâng jeju chyûnghuq gi, byù rayùq kut é yubàk mara su a nghut; hkâsu mù gâ le, târâ jéyáng é hkyô gi, byù rayùq é mara má cháng mù, mara dam byî é hkyô lhoqhtoq é nghut lhê; nghut kôlhang, jeju chyûnghuq gi, târâ lu lai bang myo myo má cháng mù, mara hkyut san byi hkyô lhoqhtoq é nghut lhê. 17Hau htoq agó, byù rayùq târâ lu lai luî, haû rayùq é yánmai, shî‑nò hkyô up nyì bê nghut lhê, ahkuî kúm, haû Garai Gasâng é agùn agó shimân jeju eq díngmán hkyo é chyûnghuq lé hàp yu é bang gi, Yesuq Hkrisidùq gâ é byù rayùq dông mai, je riyhang chyungxe duì hkyô má ùphkang nyì kôrâ nghut lhê.

18Haû mù luî, târâ lu laî é hkyô ralhûm é yánmai, byù lhúnglhâng bang gi, mara dam byî é hui zo kô é su, díngmán hkyo é múzó ralhûm é yánmai, byù lhúnglhâng bang gi, chyungxe duì hkyô eq sêng é mara hkyut san byi hkyô lé wó bê nghut ri. 19Hkâsu mù gâ le, byù rayùq jì-no a gyô é yánmai, myo myo gi, yubàk dàp bang dùt byùq é su, byù rayùq jì-no gyô é yánmai, myo myo gi, díngmán bang gâ é hui kôrâ nghut lhê.

20Haû jep é târâ jàt é gi, târâ lu lai hkyô je myo râ matú nghut lhê. Nghut kôlhang, yubàk mara myô jàt é hkûn, jeju gi, je riyhang myô jàt lo é nghut lhê. 21Haû mù, yubàk mara gi, shî‑nò hkyô dông ùphkâng bê su, jeju gi, ngá-nhûng é Yhûmsîng Yesuq Hkrisidùq é yánmai, ahtum abyùq é chyungxe wó byî é díngmán hkyô dông ùp râ nghut lhê.

Currently Selected:

Romaq 5: znot

Highlight

Copy