Romaq 4

Abraham, Mara Hkyut San Huî É Hkyô

1Haû su nghut jáng, ngá-nhûng é îchyí îwa Abraham gi, haú hkyô mai haî wó sê yu ri nghû, taí râ lhú? 2Abraham gi, zui saî é dông mai, mara hkyut san byi huî é ru nghut le gi, yhang nghutbun jang jòq râ nghut lhê; nghut kôlhang, Garai Gasâng é hí má gi, yhang haú dông a nghut. 3Chyúmdang má hkâsu gâ tô ri lhú gâ le, “Abraham gi, Garai Gasang lé lùmjíng bê nghut mù, yhang lé, díngmán sû ga són byi bê nghut ri.”#A-pûn 15:6 gâ ri.

4Zui saî é sû gi, yhâng é zuihpau lé, chyûnghuq dông wó yu é a nghut é za, wó yû gíng luî, wó yu é ru nghut lhê. 5Nghut kôlhang, zui saî é hkyô dông a nghut é za, haû agè ashop hkyô lé mara hkyut san byî é Garai Gasang lé lùmhkau é sû gi, yhâng é lùmjíng myìt é yánmai, díngmán sû ga són byi huî é nghut lhê. 6Haû eq rajung za, yhang zui saî é hkyô dông a nghut é za, Garai Gasâng èq díngmán sû ga són byi huî é, Garai Gasâng chyáng mâ é shimân jeju wó é sû eq séng luî, Dawiq taî é gi,

7“Târâ lu laî é lé mara hkyut pyám byi huî é eq yubàk mara nghop pyám byi huî é bang gi, hkungsô wó nyi ri.

8Bo tô é mara lé, Yhûmsing èq mara a són byî é hui sû gi, hkungsô wó nyi ri.”#Hkya-on 32:1-2

gâ ri.

9Haû sû é jeju gi, ahpyo-kuq hpyit hkâm bâng é matú za nghut lhê lhú? Ahpyo-kuq a hpyit bâng é matú le nghut lhê lhú? Hkâsu mù gâ le, Abraham é lùmjíng myìt lé, díngmán sû ga són byi bê nghut lhê nghû, ngá-mòq taî nyì bê nghut lhê. 10Haû su són byî é gi, hkâ-nhám nghut lhê lhú? Ahpyo-kuq hpyit hkâm é htâng má lhú? A nghut jáng, hí má lhú? Haû gi, ahpyo-kuq hpyit hkâm é htâng má a nghut é za, hí má ru nghut lhê. 11Hau htoq agó, Abraham gi, yhang, ahpyo-kuq hpyit a hkam yù shî é hkûn mai, lùmjíng luî wó é díngmán hkyô gâ é dizìk nghut é, ahpyo-kuq hpyit masàt lé myang hkam yù bê nghut ri. Haû mù, yhang gi, haû ahpyo-kuq hpyit a hkam yù kôlhang, lùmjíng é lhúnglhâng bang lé díngmán bang ga són byî é wó hui râ matú, haú bâng é îwa dùt bê nghut ri. 12Haû ahpyo-kuq hpyit hkam é za a nghut, ngá-nhûng é îwa Abraham, ahpyo-kuq hpyit a hkam yù shi má wó é lùmjíng hkyo é hkyî-kám lé cháng luî ahpyo-kuq hpyit bâng é îwa le, yhang nghut ri.

13Mingkân é a-myû hkûngxoq pé dùt râ ga, Abraham eq yhâng é awùt ashîn pé lé danghtum htûm tô é gi, jep é târa é yánmai a nghut é za, lùmjíng hkyô mai lo é díngmán hkyô dông ru nghut lhê. 14Hkâsu mù gâ le, jep é târâ dông nyì yàp é bang gi, a-myû hkûngxoq pé nghut é nghut jáng, lùmjíng hkyô gi, a-kyû a bo é eq, danghtum htûm tô é gi, hpau a dàp é dùt byùq lhê. 15Haû jep é târâ gi, nhikmó-yo hkyô lhoqhtoq é nghut lhê; nghut kôlhang, jep é târâ a jòq jáng gi, târâ lu lai hkyô le jòq râ a nghut.

16Haû mù luî, htûm tô é danghtum gi, Abraham é awùt ashín lhúnglháng bâng chyáng, jeju mai za lo é eq gingtîng nyi é dùt sháng gàq ga, lùmjíng hkyô mai lo é nghut lhê. Haû gi, jep é târâ má lòm bâng é matú baú za a nghut, Abraham é lùmjíng hkyô má lòm bâng é matú le nghut lhê. Abraham gi, ngá-nhúng lhúnglhâng bâng é îwa nghut ri. 17“Ngò gi, nang lé, byù myû myo myô é îwa dùt nhâng bê.”#A-pûn 17:5 ga kâ tô é eq rajung za, haû shi byùq bê bang lé wó lhoqdui é eq a jòq wú é zè lé jòq shoq wó kut é, yhang lùmjíng é sû Garai Gasâng hí má, Abraham gi, ngá-nhûng é îwa nghut lhê.

18“Náng é awùt ashín pé le, haû eq rajung za myo râ nghut lhê.”#A-pûn 15:5 ga yhang lé taî kyô to bê eq rajung za, yhang gi, myìt myòqbyù jowò haî a jòq kôlhang, lùmjíng luî myòqbyu nyi é nghut mù, byù myû myo myô é îwa dùt bê nghut ri. 19Yhang gi, rashô zàn kô jé byùq bê nghut mù, yhâng gùng gi, shi é gyá dùt é hui zô é eq Sarâ é zoyhûm shibó le shum byùq kôlhang, yhang gi, lùmjíng myìt a yom byùq nghut ri. 20Hau htoq agó, Garai Gasang danghtum htûm tô é eq séng luî, a lùmjíng a dùt é eq hê myìt mhô myìt a dùt é za, yhâng é lùmjíng myìt lé saî lhoq gingtíng mù, Garai Gasang lé hkya-on kúngtôn luî, 21Garai Gasang gi, Yhang danghtum htûm tô é eq rajung za wó kut râ a-tsam bò sû nghut é lé, yhang myìt zing nyi ri. 22Hau é yánmai, “Yhang lé, díngmán sû ga són byi bê nghut ri.”#A-pûn 15:6 gâ tô é nghut lhê. 23“Yhang lé, són byi bê.” ga, kâ tô é dang gi, yhâng é matú za a nghut, 24ngá-nhûng é Yhûmsîng Yesuq lé, shi é mai lhoqdui toq yû sû Garai Gasang lé lùmjíng luî, Yhâng èq díngmán bang ga són byi râ nghut é, ngá-nhûng é matú le nghut lhê. 25Yhûmsîng Yesuq gi, ngá-nhûng é yubàk marâ é matú, shî hkám byi râ dông àp pyâm é hui luî, ngá-nhúng, mara hkyut san byî é hui râ matú, lhoqdui toq é hui bê nghut ri.

Currently Selected:

Romaq 4: znot

Highlight

Copy