Romaq 3

Garaî É Lhumzui Hkyô

1Haú dông ga jáng, Yudaq byù rayùq dùt nyi é gi, hai a-kyû hkâm zo râ lhú? Ahpyo-kuq hpyit hkyô gi, hai a-kyû bò râ lhú? 2Hkyô hkangmó má gyai a-kyû bo lhê! Je hí má gi, haû Garai Gasâng é mungdang lé yhang, yhángmòq lé àp byi bê nghut ri.

3Yhángmòq mâ é ra-am lùmjíng myìt a bo é nghut le gi, hkâsu kó lhú? Yhángmòq lùmjíng myìt a bo é yánmai, Garai Gasâng é lhumzui hkyô lé a-kyû a bò nhâng wó dùt râ lhú? 4Hká dông le a wó dùt!

“Haû mù, nàng dang taî é hkûn, díngmán é hkyô wó lhoqhtoq râ eq,

nàng jéyáng huî é hkûn, ûng râ nghut lhê.”#Hkya-on 51:4

ga kâ tô é eq rajung za, byù yùq hkangmó gi, byù mhaú dùt kôlhang, Garai Gasang gi, tengmán nyî sháng gàq.

5Nghut kôlhang, ngá-nhûng é a díngmán hkyô gi, Garai Gasâng é díngmán hkyô lé san za je lhoqhtoq shit é nghut lhê; haû nghut jáng, ngá-nhúng hkâsu nghû taí râ lhú? Ngá-nhúng lé Garai Gasang nhikmó-yô é hkyô gi, Yhang a târâ mù nghut lhê lhú? (Ngò gi, byù hkyam dông taî htîng é nghut lhê.) 6Ra-tsuí lháng a nghut! Haû su ru nghut le gi, haû mingkan lé, Garai Gasang hkâsu wó jéyáng râ lhú? 7Rayùq yùq, “Ngò mhaû é hkyô gi, Garai Gasang tengmán é hkyô lé lhoqkô jàt mù, Yhâng é hpungwup shingkang lé je wó lhoqhu nhang é nghut le nhîng, haî mù luî, ngò, yubàk byù rayùq dông mara byî é hui zô nyì ra shirâ lhú?” ga dangnyhin nyhin râ nghut lhê. 8“Ge é hkyô htoq sháng gàq, ngá-nhúng, agè ashop hkyô kut sháng.” nghû haî mù a taí kô é lhú? Dang haû lé ngá-mòq taî é nghut lhê ga luî, ngá-mòq lé lùmù gànsang é dông byù ra-am taî akô. Haú bang gi, mara dam byî é hui zo gíng bang nghut akô.

Díngmán Byù A Nyì

9Haû jáng, hkâsu nghû lo râ lhú? Ngá-nhúng gi, je gè bang nghut lhê lhú? Ra-tsuí lháng a nghut. Yudaq byù nghut nghut, tûngbaù pé nghut nghut, yubàk mara hkaû mâ é bang chyat nghut lhê nghû, ngá-mòq taî sân kyô wú bê nghut lhê. 10Chyúmdang má kâ tô é le,

“Díngmán é byù a nyì, rayùq lháng a nyì nghut ri;

11Sê gyô é byù rayùq le a nyì, Garai Gasang lé ho é byù le a nyì nghut ri;

12Lhúnglháng bang gi, lhing ló byùq bekô; yhángmòq gi, hpau a dàp bang chyat dùt byùq bekô nghut ri.

Ge é kut sû ó a nyì, rayùq lháng a nyì nghut ri.”#Hkya-on 14:1-3

gâ ri.

13“Yhángmòq é hkyungdong gi, bóng tô é lùp pé nghut akô; yhángmòq é shô gi, mhaú zo dang taî akô.”#Hkya-on 5:9

“Yhángmòq é nhutwuî pé má gi, shîdùq bò lhângmui é dùq dàp bum ri.”#Hkya-on 140:3

gâ tô ri.

14“Yhángmòq é nhut pé gi, nhing myíng nhing htê eq myìt nò danghko baú byíng zan tô ri.”#Hkya-on 10:7

gâ tô ri.

15“Yhángmòq é hkyî pé gi, byù sat sui lhoqhtoq râ matú, hân nau nyi akô;

16Yhángmòq sô nyi é hkyô pé gi, htên byòq é eq wuîhkê é ahkô tông tô é nghut mù,

17nguì ngón é hkyô lé gi, yhángmòq a sé kó nghut ri.”#Esai 59:7-8

gâ tô ri.

18“Yhángmòq é myòq hí má Garai Gasang lé gyùq hkúnggâ é hkyô, a bò kó nghut ri.”#Hkya-on 36:1

gâ tô ri.

19Byù yùq hkangmó é nhut gi, tû taí jang a jòq dùt byùq mù, mingkan gón gi, Garai Gasâng é hí má mara bo é bang dùt nyì sháng gàq ga, haû jep é târâ má taî é lhúnglháng gi, jep é târâ ô má nyi é bang lé taî é nghut é hkyô lé, ngá-nhúng sê lhê. 20Haû mù luî, jep é târâ lé châng é dông mai, ó yùq le, Yhâng é hí má díngmán sû gâ é wó hui râ a nghut; jep é târâ dông gi, yubàk mara bo é hkyô lé wó sê yu é za nghut lhê.

Lùmjíng Jáng, Díngmán Sû Wó Dùt É Hkyô

21Ahkuî kúm gi, jep é târâ dông a nghut é za, haû jep é târâ eq myìqhtoi laiká pé mai sàksé hkâm tô é Garai Gasâng chyáng mâ é díngmán hkyô lé, sé nhâng bê nghut ri. 22Garai Gasâng chyáng mâ é díngmán hkyô haû gi, Yesuq Hkrisidùq lé lùmjíng é dông mai nghut mù, lùmjíng bang bànshoq htoq má jé é nghut lhê. Gamhkuî é hkyô a jòq. 23Hkâsu mù gâ le, lhúnglhâng bang gi, yubàk mara kut shut bê bang chyat nghut mù, Garai Gasâng é hpungwup shingkang lé a hkyit hkap byùq lo kó nghut ri. 24Ahkuî kúm gi, Hkrisidùq Yesuq mai lo é hkyi yù hkyô dông, Garai Gasâng é jejû èq, mara hkyut san byî é laí laí wó hui bê nghut ri. 25Garai Gasang gi, Yesuq é sui lé lùmjíng bâng matú, shîhtaí gùnglik hkungga ralhum dông, Yesuq lé byî pyám bê nghut ri. Haû gi, laî lò bê yubàk mara lé lhut pyám byi shoq, Garai Gasang myìt hîng byi bê nghut é yánmai, Yhâng é tengmán hkyô lé tûn shit é nghut ri. 26Garai Gasang haû su kut é gi, Yhânggùng yhang díngmán Sû nghut é eq, Yesuq lé lùmjíng é sû lé mara hkyut san byî é Sû nghut râ matú, ahkui lhê i-pyàt má, Yhâng é tengmán hkyô lé shit byî é nghut lhê.

27Haû su nghut jáng, nghutbun jowò jòq ri lhú? A jòq. Hai târâ mai a jòq dùt byùq é lhú? Haû jep é târâ châng é yánmai nghut lhê lhú? A nghut, lùmjíng hkyo é yánmai shèq a jòq dùt byùq é nghut lhê. 28Hkâsu mù gâ le, byù gi, haû jep é târâ châng é dông a nghut é za, lùmjíng luî, mara hkyut san byi huî é hkyô lé, ngá-mòq lum nyi lhê. 29Garai Gasang gi, Yudaq byu pê é Garai Gasang za nghut lhê lhú? Tûngbaù pê é Garai Gasang le a nghut lhú? Nghut lhê, tûngbaù pê é Garai Gasang le nghut lhê. 30Hkâsu mù gâ le, Garai Gasang gi, rayùq za nghut é yánmai, rajung za lùmjíng luî, ahpyo-kuq hpyit hkam é bang lé le, ahpyo-kuq a hpyit é bang lé le, Yhang, mara hkyut san byi râ nghut lhê. 31Haû nghut jáng, ngá-nhúng gi, lùmjíng myìt hau èq, jep é târâ lé lhoqhpoî pyám râ lhú? Ra-tsuí lháng a nghut! Ngá-nhúng gi, jep é târâ haû lé lhoq gingtîng é bang ru nghut lhê.

Currently Selected:

Romaq 3: znot

Highlight

Copy