Sânghkyang 4
4
Zo Wuî Lé Byî É Hpàqchyî Dang
1Ngá zô pé ê,
îwa mhoqshit é dang lé gyo keq;
myìt lòm tung kut luî,
sê gyô é u-nuq lé wó yù keq.
2Ngò gi, núngmòq lé,
ge é dông mhoqshit é nghut mù,
ngò mhoqshit é hkyô lé,
hkâtô pyám kó.
3Ngò gi, ngá wâ yhûm má,
zoshâng zo nghut nyì mù,
ngá nû é hí má, bón bón za kô yúng é zote nghut luî,
chun dik é zo nghut nyi é hkûn,
4ngá wa ngo lé mhoq kyô é gi,
“Náng é i‑myìt nhiklhum bànshoq èq,
ngá é dang lé myhik zing to aq;
ngá é hkunmó pé lé cháng aq;
haû jáng, nàng chyungxe duì râ nghut lhê.
5Hpàqchyî byéng-yá lé hô àq;
sê gyô é u-nuq lé hô àq;
ngá é dang pé lé, hkâ tô-myhí,
haú pé mai hkâsô nghoq byùq.
6Hpàqchyî byéng-yá lé,
hkâtô pyâm to; yhang gi,
nang lé mâgum yù râ nghut lhê;
yhang lé chyitdàp aq;
haû jáng, yhang,
nang lé wú zúng râ nghut lhê.
7Hpàqchyî byéng-yá gi,
i-kyí mó nghut lhê mù,
hpàqchyî byéng-yá lé hô àq.
Nàng wó é lhúnglhâng htoq hpau kôlhang,
sê gyô é u-nuq lé hô àq.
8Yhang lé hkúngga owaq àq;
haû jáng, yhang,
nang lé wàq toq râ nghut lhê;
yhang lé po zìng àq;
haû jáng, yhang,
nang lé xânghpoq nge wó hkyô byi râ nghut lhê.
9Yhang gi, náng é ulhum má,
jeju banhkóng tsung byi mù,
hpungwup a-tsam bo é jánmaú,
nang lé byi râ nghut lhê.” gâ ri.
Hpàqchyî Byéng-yá Èq Mâgum É Hkyô
10Ngá zo ê, ngò taî é dang lé gyo mù, hàp yù àq;
haû jáng, náng é chyungxe zànwut,
myo râ nghut lhê.
11Ngò gi, nang lé,
hpàqchyî byéng-yá hkyô shut,
mhoqshit yû mù,
tengmán é hkyô shut,
shuî-û yu é nghut lhê.
12Nàng hkyô sô é hkûn,
náng é hkyîbyè
htûng htê jang jòq râ a nghut;
nàng din é hkûn,
htûng lèqbàt râ a nghut.
13Mhoq kyô é hkyô lé,
myhik zing to aq,
hkâ-nhang pyám;
haû gi, náng é chyungxe nghut é yánmai,
haú lé rago wú zúng nyî àq.
14Haû agè ashop bâng é hkyô má,
hkâwâng;
byù gâng pé é hkyô má, hkâso.
15Haú bâng é hkyô lé, koi pyám aq;
haû mai hkâjáng lai;
haû mai lhing pyám mù,
náng hkyô shut sô é ló aq.
16Hkâsu mù gâ le, haú bang gi,
agè ashop hkyô a myang kut le,
a wó yhup kó;
yhángmòq gi,
góbang lé a lèqbàt nhang le,
yhup a ngón kó nghut ri.
17Yhángmòq gi, agè ashop mara bo é mùk, zo kômù,
lú lhum bàt zìk mara bo é tsibyiq wing, shuq akô nghut ri.
18Díngmán bâng é hkyô kúm gi,
nàpsûn maubó su nghut mù,
san za maubó shoq,
dùq bang lo é nghut ri.
19Nghut kôlhang, agè ashop bâng é hkyô gi,
htu dik é mauchut hkaû su nghut mù,
yhángmòq lé haí jûng èq lèqbàt nhang é hkyô lé,
yhángmòq a sé kó nghut ri.
Mhoqshit É Dang Mai Ge É Chyungxe Duì Hkyô Wó Yû Râ Hkyô
20Ngá zo ê, ngò haî taî é lé,
myìt lòm tung tâm gyo aq;
ngá é dang pé lé chyáng za mai gyô yù àq.
21Haú pé lé, náng é myòq hí mai,
a kâng pyâm é za,
náng é i‑myìt ûnghkaû má kat to aq.
22Hkâsu mù gâ le, haú pé gi,
myang hô bâng é matú,
chyungxe duì hkyô kut mù,
gùngdu gón é matú,
wángzán hkyô nghut ri.
23Bànshoq htoq má, i‑myìt nhiklhum gi,
chyungxe wuìbúm nghut lhê mù,
haú lé wú zúng nyî àq.
24Dang gang taî é lé, náng é nhut mai,
choq pyám mù,
lhoqhten lhoqhpyoq é dang lé,
náng é nhutwuî mai wê gang nhâng àq.
25Náng é myòqjí lé,
hí shut díng za wú nhâng mù,
náng é hí má za wú tsuq to nhâng àq.
26Nàng e ló é hkyô lé lhoqrhá mù,
náng é hkyô pé bànshoq lé,
lhoq gingtîng to aq.
27Lòqyò lòqpai shut hkâjau byùq;
náng é hkyî lé, agè ashop hkyô mai,
koi pyám aq.
Currently Selected:
Sânghkyang 4: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.