Sânghkyang 23
23
1Nàng gi, zau rayùq eq
zang zô zung nyi é hkûn,
náng hí má ó yùq zung tô é lé,
rago bûn sê nyi àq.
2Nàng gi, zo myòqnòq é sû nghut jáng,
náng é lìngzing má,
shâmhto wing to bê nghut ri.
3Yhâng é nghâm é zoshuq lé hkâ malú;
hkâsu mù gâ lé, haû gi,
byù mhuî é zoshuq nghut ri.
4Sùtzè wó râ matú,
yhûmsing gùng lé hkâ-ngú byùq nhâng;
nô pyám râ u-nuq bò aq.
5Byùq byùq sê é sùtzè lé
wú tsuq nyi lhê lhú?
Haú pé gi, hkyak yhang dùng yùq lô mù,
zùn su maulat shut dâng ló byùq râ nghut lhê.
6Byù chûm kaî nai é zoshuq lé hkâ malú;
yhâng é nghâm é zoshuq lé hkâ myòqnòq;
7yhang gi, hkâ-nhám le,
ahpau lé za myìt nyi é sû nghut mù,
nang lé, “Zo aq, shuq aq.” ga taí kôlhang,
yhâng é myìt gi, nàng eq rahá a nyì nghut ri.
8Nàng gi, nàng zô kat tô é ra-tsuí zo lé,
hpat pyám râ nghut mù,
nàng taî é dang ngón pé le,
a jè dùt byùq râ nghut lhê.
9Ngha é sû lé dang hkâtaí,
hkâsu mù gâ le, náng é dang mâ é
hpàqchyî byéng-yá lé,
wú shôm pyâm é dang taí râ nghut lhê.
10Góhkun lhê é maukyo lùqgòk lé
hkâhuî pyám;
chuízô pê é yò má hkâchyîn wàng.
11Hkâsu mù gâ le,
yhángmòq lé hûng byi Sû gi,
wum bô sû nghut lhê mù,
mû taî lhûm é hkûn,
yhángmòq é hkyam shut
bo yàp byi râ nghut lhê.
12Náng é i‑myìt nhiklhum gi,
mhoqshit é hkyô má myìt tuî nyì mù, náng é nohkyap gi,
hpàqchyî dang pé lé gyô nyì àq.
13Zoshâng rayùq lé a mhoqshit hkâkut;
yhang lé nàng dumbáng èq dam byi kôlhang,
yhang shî râ a nghut.
14Yhang lé dumbáng èq dam byi mù,
yhâng é sô lé mosumhkung mai
hkyi yù àq.
15Ngá zo ê, náng é i‑myìt nhiklhum hpàqchyî bò jáng,
ngá é i‑myìt gabú râ nghut lhê.
16Náng é nhutwuî mai,
jô é têng é hkyô taí jáng,
ngá é i‑myìt ûnghkaû
hkye gabú râ nghut lhê.
17Yubàk dàp bang lé hkâ manôn;
Yhûmsîng Garai lé
gyùq hkúnggâ é hkyô lé kúm gi,
ayang myìt zìng zùq nyì àq.
18Gè gè yhang, náng é matú,
myìt myòqbyù hkyô jòq é nghut mù,
myìt myòqbyù hkyô haû gi,
htên byùq râ a nghut.
19Ngá zo ê, gyô yù mù, hpàqchyî bò àq;
náng é i‑myìt nhiklhum gi,
jô é têng é hkyô má cháng aq.
20Tsibyiq wing shuq laî é bang eq le,
sho myòqnòq é bang eq le,
hkâzûm yàp.
21Hkâsu mù gâ le, zô lai shuq laî é sû gi,
asho awui myung byùq râ nghut lhê;
lûm yhup laî é hkyô gi,
byù lé mè-pyâng hut râ nghut lhê.
22Nang lé hku kat é
náng wâ é dang lé gyo aq;
náng nu mâng byùq é hkûn,
yhang lé hkâwú tiq pyám.
23Tengmán hkyô lé wui yù àq,
haú lé hkâ-ûng pyám;
hpàqchyî byéng-yá lé le,
mhoqshit hkyô eq sê gyô é u-nuq lé le, wui yù àq.
24Díngmán su é yhâng wa gi,
gyai yhang gabú byam chyu hkyô wó ri;
hpàqchyî bo é zo wó sû gi,
yhang zô é yánmai myìt ngón nyi ri.
25Náng nu eq náng wa gi,
gabú nyî luî,
nang lé hku é înu gi,
gabú byam chyu sháng gàq.
26Ngá zo ê, náng é i‑myìt gi,
ngá chyáng tuî nyì mù,
náng é myòqjí gi,
ngá é hkyô lé wú tsuq nyî sháng gàq.
27Hkâsu mù gâ le, shiwa myhí gi,
nìk é donghkong nghut mù,
bíng myiwe myhí gi,
chyap é wuìhtung nghut ri.
28Yhang gi, hpyoq zo hpyoq shuq sû su, haq láng to mù,
danghtum htûm tô é lé a châng é byù lhoqmyô ri.
29Ó yùq wá dingnyé wó nyi lhê lhú?
Ó yùq wá yón kuq nyi lhê lhú?
Ó yùq wá mabyòq jishûm htoq nyi lhê lhú?
Ó yùq wá mara hûn dang taî nyi lhê lhú?
Ó yùq wá haî a râ é má
dàm dap zu záng nyi lhê lhú?
Ó yùq wá wùtwàt myòq ne nyi lhê lhú?
30Haú bang gi, tsibyiq wing lé
myáng myáng shuq mù,
ajung jung nyhô tô é tsibyiq wing lé
chyam wú é bang nghut akô.
31Nè nè za dùt luî,
hkoq má kat tô le wìk wìk dùt mù,
hkyung hkyó yò nhô zâ é
tsibyiq wing lé, hkâwú tsuq to.
32Jihtûm má, haû gi, lhângmuì su hte mù,
dùq htân lhângmuì é dùq su dùt râ nghut lhê.
33Náng é myòqjí gi,
maú nhô zâ é hkyô lé myàng mù,
náng é i‑myìt gi,
nhúngnhâng é hkyô lé taí râ nghut lhê.
34Nàng gi, wuiming má yhup tô é su le,
wuìsanghpo donghkón zìng‑u má
yhup tô é su dùt râ nghut lhê.
35Nàng gi, “Yhángmòq,
ngo lé bàt kôlhang, ngò gi, dàm a dap!
Yhángmòq, ngo lé nhuq kôlhang,
ngò, nò htê a wó gyo!
Ngò gi, gótû dum myang hô shuq râ matú,
hkâ-nhám bûn lò râ lhú?”
ga taí râ nghut lhê.
© 2025, Wycliffe Bible Translators, Inc.