Sânghkyang 19
19
1I‑myìt díng é dông nyì yàp é myùng sû gi,
myìt goí dang taî é byu ngha htoq je ge ri.
2Myìt toq myìt zìng zùq kôle,
hpàqchyî a bo le gi, a gè nghut ri;
ahân ahkyut dùt é gi,
shut sê lhê.
3Byù gi, yhûmsîng ngha é yánmai,
yhûmsing é chyungxe lé lhoqhtên pyâm é nghut mù,
yhâng é i‑myìt mai, Yhûmsîng Garai lé nhikmó-yô ri.
4Nyì ngón yùqyò jáng,
buìnùm ji-myi myô ri;
nghut kôlhang, myùng sû gi,
buìnùm wui èq kâng pyâm é huî ri.
5Mhaû é sàksé gi, dam byî é hui râ za nghut lhê;
mhaú dang taí sû gi, wó hpang lùt râ a nghut.
6Byù myo myo gi, zaû hí má myòqdong wó hkyô ho akô;
yùq hkangmó gi, chyûnghuq byi su é luzúm kut akô.
7Myùng sû lé gi, yhâng é buìnùm wuì
bànshoq bâng èq pyâm tô é nghut jáng,
yhâng é luzúm wuî gi, je riyhang,
koi pyám râ nghut lhê mhaî!
Yhang gi, châng hkat tôngbán wún kôlhang,
yhángmòq lé myang hô râ a nghut.
8Hpàqchyî byéng-yá wó sû gi,
yhûmsing é i‑myìt nhiklhum lé chyitdàp ri;
sê gyô é u-nuq lé lùmhkaû sû gi,
kô lò lam lò râ nghut lhê.
9Mhaû é sàksé gi, dam byî é hui râ za nghut lhê;
mhaû é dang taí sû gi, htên byòq byùq râ nghut lhê.
10Nghâ sû gi, ngón ngón myang nyi é hkyô eq a htuk é su,
jùn hpó gi, zau wuî lé ùp râ matú,
je a htuk nghut ri.
11Byù rayùq nhik gying jáng gi,
myìt hing ri;
góyùq shut é mara lé wó wú lhaî pyâm é gi,
yhâng é hpungwup shingkang nghut ri.
12Hkóhkâm hpó nhikjum yô é gi,
hkanghkyi mying hûm é su nghut ri;
nghut kôlhang, yhâng é jeju gi,
mhan má dàp é nghân su nghut ri.
13Ngha é zoshâng gi,
îwa hui zo râ ihkyùp nghut mù,
mabyòq htoq nau é i-kun myhí gi,
zòq zòq gyó nyi é maucham su nghut nyi ri.
14Yhûm yò eq sùtzè gi,
înu îwâ chyáng mai myang sing é mui nghut ri;
nghut kôlhang, nhik gyîng é yhûmsîng myhí gi,
Yhûmsîng Garaî chyáng mâ é nghut ri.
15Lagôn é hkyô gi,
byù lé yhup mó myí nhang ri;
mú zui wum a kâm kat sû gi,
zò-mut wuìshit é huî ri.
16Mhoqshit dang lé châng é sû gi,
yhûmsing chyungxe lé wú zúng é sû nghut ri;
nghut kôlhang, yhûmsing é hkyô lé,
haî su a ngam é sû gi,
shî râ nghut lhê.
17Myùng sû lé ge é hkyô shit é sû gi,
haû Yhûmsîng Garai lé chyi byî é sû nghut mù,
yhûmsîng kut é eq rajung za,
Yhang dum tau byî é hui râ nghut lhê.
18Ge mhoq yu ashî hkûn,
nungzô pé lé mhoqshit àq;
haû a nghut jáng, yhángmòq é chyungxe lé,
lhoqhtên pyám byi râ nghut lhê.
19I‑myìt gyai tot sû gi,
dam byî é hui zo râ nghut lhê;
yhang lé hkyi xe yu é nghut jáng,
dum hkyi xe yù ra râ nghut lhê.
20Hpàqchyî byî é lé rago gyô yù mù,
mhoq kyô é dang lé hàp yù àq;
haú hkûn, ló htáng má, nàng gi,
hpàqchyî bò sû dùt byùq râ nghut lhê.
21Byù gi, i‑myìt má ahkyô hkyô hên kôlhang,
haû Yhûmsîng Garai hen tô é hkyô za,
wó dùt râ nghut lhê.
22Byù gi, ru gîng nyi é chyitdàp myìt lé, myìt ô nau nyi ri;
mhaú su htoq má, byù myùng dùt le gi, rû ge ashî.
23Haû Yhûmsîng Garai lé gyùq hkúnggâ é gi,
chyungxe duì hkyô nghut ri;
haû sû é yùq gi, ngón za myang bánno râ nghut mù,
wuîhke hkyô hpuzo râ a nghut.
24Haû lagon sû gi, yhûmsing é lòq lé,
auhkoq má làp to kôlhang,
yhâng é nhut má a kâm làp zô kat nghut ri!
25Byù rhoî sû lé nhuq bàt jáng,
ngòk sû gi, nhik gying hkyô
wó mhoq yû râ nghut lhê;
sê gyô é u-nuq bò sû lé tan jáng,
yhang gi, hpàqchyî wó yû râ nghut lhê.
26Îwâ é sùtzè lé lú yu pyám mù,
yhâng nu lé hkat htoq pyâm é sû gi,
hoq hpû é eq lùmù gànsang pyâm é
hui zo nhâng râ sû nghut lhê.
27Ngá zo ê, nàng gi, mhoq kyô é dang lé
a gyo lo kut é nghut jáng,
hpàqchyî dang mai
sô nghoq ló byùq râ za nghut lhê.
28A jo a âng é sàksé gi,
târâ ràp-rá hkyô lé rhoi pyâm ri;
haû agè ashop su é nhut gi,
agè ashop hkyô lé myui pyám nau nyi ri.
29Byù rhoî bâng é matú gi,
mara dam byi hkyô lajâng to bê nghut mù,
nghâ bâng é nùnghkûng má gi,
nhuq bàt râ hkyô hen to bê nghut lhê.
© 2025, Wycliffe Bible Translators, Inc.