Sânghkyang 18
18
1Góbang eq a dàt zùm sû gi,
yhûmsing wuízàt hkyô lé za châng hkat é nghut mù,
ge é târâ hpyit hkyô bànshoq lé,
lhoqhpyoq pyâm ri.
2Ngha é sû gi, sê gyô é u-nuq má a gabú é za,
yhûmsîng myìt é hkyô lé lhoqhtoq râ matú,
myìt nguì ô nau nyi ri.
3Agè ashop hkyô jé jáng,
haî su a ngàm hkyô jé ri;
hoq hpu hkyô jé jáng,
wú tiq lhoqhpoi hkyô le jé ri.
4Byu nhut mâ é dang pé gi,
nìk é wuì su nghut nyi ri;
nghut kôlhang, hpàqchyî byéng-yá wuìbúm gi,
yui nyi é wuìlàng su nghut nyi ri.
5Haû agè ashop sû lé myòqdong tê byî é eq,
mara a bò sû lé târâ ràp-rá hkyô a kut byî é gi,
a ge é hkyô nghut lhê.
6Nghâ su é nhutwuî gi,
mabyòq lhoqhtoq ri;
yhâng é nhut gi, wase dung zô ri.
7Nghâ su é nhut gi,
yhâng é htên byòq hkyô nghut mù, yhâng é nhutwuî gi,
yhâng é chyungxe lé myhí ra gùn nghut nyi ri.
8Lùmù gànsang é dang pé gi,
chuî nghâm é zoshuq su nghut mù,
byu é ûnghkaû shut wang ló ri.
9Yhûmsîng zui saî é múzó má lagôn é sû gi,
lhoqhten lhoqhpyoq su é gu-mang nghut ri.
10Haû Yhûmsîng Garaî é myìng gi,
gingtîng é mâchya nghut mù,
díngmán sû gi, haú má hpang wàng luî,
gau shoq myang nyi tô ri.
11Wó su é sùtzè gi, ging ging tíng tíng saî tô é,
yhángmòq é wà mó nghut nyî mù,
gingtîng é wàhkûm dông myìt yu bum akô nghut ri.
12Byu é i‑myìt gi, htên byòq râ hí má,
nghutbûn lhê; nghut kôlhang,
xânghpoq nge wó hkyô gi,
myìt lhoqnyhum é mai lo é nghut ri.
13A gyô wú shi-má dang tû é sû gi,
ngha é sû eq hoq hpû é hui sû nghut ri.
14Byu é i‑myìt nhiklhum gi,
yhûmsîng nòhpyo huî é hkûn wó jân ri;
nghut kôlhang, myìt gyuî é hkyô lé gi, ó yùq wó jan râ lhú?
15Sê gyô é u-nuq bò su é i‑myìt nhiklhum gi, hpàqchyî wó ri;
hpàqchyî bò su é nohkyap gi,
haú lé ho gyô yu ri.
16Chyûnghuq gi, byi sû lé
hkum hpóng byî é nghut mù,
yhang lé byù mó pê é hí má shuî jé ri.
17Mû htoq é hkyô lé, hí lé taí sû gi,
jô é su dùt râ nghut lhê;
nghut kôlhang, góyùq lé lô mù,
yhâng é mû haú lé, lé myî gôn htoq shit ri.
18Hkyîn shosé gi, dangnyhin nyhîn lhûm é hkyô lé
wó lhoqzîm pyâm é nghut mù,
wúm htan é wàqngân wuì lé wó lhoqpyo pyâm ri.
19Myìt nò huî é gu-mang rayùq gi,
gingtîng é wà mó htoq wuî byùq ri;
dangnyhin nyhîn lhûm é hkyô gi,
gyèdap hkumlaî kyâng to é su nghut nyi ri.
20Byù gi, yhâng é nhut mâ é ashî èq
yhûmsing é wamdau lé lhoqpyíng mù,
yhâng é nhutwuî mai zuî é kyôshî èq
nhik lhoqdìk é nghut ri.
21Haû shô gi, chyungxe duì nhang é eq
shî nhang é a-tsam bo ri;
shô lé chyitdàp é bang gi,
hau é ashi lé myang zo kôrâ nghut lhê.
22Yhûmsîng myhí wó bê sû gi,
ge é hkyô lé myang hô bê nghut mù,
haû Yhûmsîng Garaî chyáng mâ é jeju lé,
myang hàp yù bê sû nghut ri.
23Myùng sû gi, shogyô nhikmyîn yù râ lé, dung tôngbán kôlhang,
wó sû gi, htân htân tû taî ri.
24Byìnzùm myo sû gi,
htên byòq é hui sê lhê;
nghut kôlhang, luzúm gê mó gi,
gu-mang rayùq htoq lháng chyâng nyi ri.
© 2025, Wycliffe Bible Translators, Inc.