Marikuq 5

Nàt Gang Hkat Htoq Pyâm É Hkyô

Mht 8:28-34; Luk 8:26-39

1Yhángmòq gi, nhông hé hpoq mâ é Gerase byu pê é mau má jé dàp e ló akô. 2Yesuq lhaî mai htoq ló é hkûn, agè ashop é nàt wang júng é byù rayùq gi, lùpdùng mai htoq lé lô mù, Yhang lé lhom huî ri. 3Haú yùq gi, lùpdùng má za nyi é sû nghut ri; yhang lé, ó yùq èq le, shâmtoqtuî èq lháng a wó tuî zing wú kó nghut ri. 4Hkâsu mù gâ le, adàm dàm, yhâng é lòq eq hkyî má shâmtoqtuî èq tuî tô wú kôlhang, yhang gi, lòq mâ é shâmtoq tui pé lé lâng hpyit pyám pyám kut mù, hkyî mâ é shâmtoq kyum lé lhoqhkyop pyám pyám kut ri. Yhang lé, ó yùq èq le a wó hkùq yù kó nghut ri. 5Yhang gi, nyí myín aga lùpdùng eq bùm pé má puk garu uchyang, yhûmsing gùng lé lùqgòk èq dûn cheq wún ri.

6Yhang gi, Yesuq lé, we mai myang kat jáng, din e ló mù, Yhâng é hí má hkyîhput htuq ngòp luî, 7htê mó èq, “Myhang htâng é Garaî Yhangzo Yesuq ê! Nàng gi, ngò eq haî sêng lhê lhú? Nàng gi, ngo lé a zing-ri râ matú, Garai Gasâng hí má danghtum htûm to aq.” ga taî garû ri. 8Haî mù gâ le, Yesuq gi, yhang lé, “Agè ashop é nàt nàng ê, byù shí yùq chyáng mai htoq ló aq.” ga taî kat é yánmai nghut ri.

9Hau htâng, Yesuq gi, “Náng myîng haî gâ lhê?” ga, yhang lé myi jáng, yhang gi, “Ngá-mòq gi, myo myo nghut é yánmai, Legi‑o gâ lhê.” ga tû taî ri. 10Hau htâng, yhang gi, haú jowò mai yhángmòq lé a kôn pyám râ matú, Yesuq lé dum dung dung kut nyi ri.

11Haú u lé, wàq rajùm mó gi, bùm yàm má dû bùt zô nyi bum akô nghut ri. 12Haû mù luî, nàt gâng pé gi, “Ngá-mòq lé, wàq pê chyáng nhang kat luî, yhángmòq chyáng wàng nhâng laq.” ga luî, Yesuq lé dûng akô. 13Haú hkûn, Yesuq gi, yhángmòq lé ahkáng byî kat jáng, haû agè ashop é nàt pé gi, haú yùq chyáng mai htoq ló kôluî, wàq pê chyáng wang ló byùq bekô nghut ri. Haû mù, haû í hkyîng kô bo é wàq hpúng gi, gampyoq mai nhông hkaû shut rùt din yán wang ló kôluî, myùp shi byùq bekô nghut ri.

14Wàq zúng bang gi, hpang din wang ló kômù, wà mó hkaû mâ é bang eq awui ayàm mâ é bang lé, haú hkyô ló shit kyo kô é yánmai, byù haú bang gi, dùt laî lò bê hkyô lé, ê htoq wú akô nghut ri. 15Yhángmòq gi, Yesuq chyáng jé lé kô é hkûn, nàt gang myo myo wang júng wú é sû, mèbu wùt luî, byù gè rayùq su zung to láng é lé myàng kômù, gyùq dan bùm bekô nghut ri. 16Haú hkyô lé myang é bang gi, nàt gâng pé wang júng sû eq wàq pê chyáng hkâsu dùt é hkyô, góbang lé taî kyô akô nghut ri. 17Hau htâng, byu pé gi, Yesuq lé yhángmòq é mau mai htoq ló byùq râ matú, chôm dûng tôngbán akô nghut ri.

18Yesuq lhaî hkaû má wang ló é u lé, haû nàt gâng pé wang júng laî lò bê sû gi, Yesuq htâng cháng râ matú, Yesuq lé dûng tôngbán ri. 19Nghut kôlhang, Yesuq gi, yhang lé ahkáng a byî é za, “Nàng, yhûm shut shèq ló mù, haû Yhûmsîng, nang lé hkâ-í kut byi bê hkyô eq hkâsu kut shogyo nhikmyîn yu é hkyô lé, náng é yhûmbyù buìnùm ji-myi wuì lé ló taî kyo aq.” ga taî kat ri. 20Haû mù, byù haú yùq gi, ló luî, yhang lé Yesuq hkâ-í kut byi bê hkyô lé, Dekapoli#5:20 Dekapoli gâ é gi, Grik dông wà mó raxê lé gâ lhê. mau bang lé ló taî kyô ri. Haú hkûn, wó gyô é bang bànshoq gi, maú hong bum akô nghut ri.

Shi Byùq Bê Myiwe Zo Eq No É Myiwe Myhí Rayùq É Hkyô

Mht 9:18-26; Luk 8:40-56

21Yesuq gi, lhaî ji mù, nhông hé hpoq shut dum dàp jé ló mù, Yhang, nhông yàm má nyi tô é u lé, byù ajùm ayò gi, Yhâng é lhînghkyùq má lé zîng bum akô nghut ri; 22haú hkûn, Ya‑iruq gâ é, târâjong má ùp bang mâ é rayùq gi, haú má lé luî, Yesuq lé myang kat jáng, Yhâng é hkyîwang má paî gòp to mù, 23“Ngá zo byìzo gi, kâng byìt ló nyi ri; yhang ge lò mù chyungxe dum duì shi sháng gàq, nàng lé mù, yhâng é ahtoq má lòq lé ke byi laq.” ga, wum kat dûng tôngbán nyi ri. 24Haû mù, Yesuq gi, haú yùq htâng châng e ló ri; byù ajùm ayò le, Yhâng é awui ayàm má châng chyîn chyap wún bum akô.

25Haú hkûn, raxe í zân suí yui nyi é myiwe myhí rayùq le haú hpúng má bo tô ri. 26Yhang gi, chi sará myo myô pê chyáng yhang wó é ngùnzè bànshoq lhoqpán mù, nò hkâm luî yâ wú kôlhang, ge é hkyô a jòq é htoq agó, je lháng wuîhkê lo ri. 27Yhang gi, Yesuq é hkyô lé wó gyo jáng, byù hpûng mai Yesuq é nùnghtáng má huî lé mù, Yhâng é bu má ê záng kat ri. 28Haî mù luî gâ le, yhang gi, “Ngò, Yhâng é bu má za lháng ê wó záng é nghut le gi, ge byùq râ nghut lhê.” ga wó myìt é yánmai, haû su kut é nghut ri. 29Haú hkûn jáng, yhâng chyáng suí yui é kân byùq luî, yhang gi, hpuzô nyi é mai wó lùt bê hkyô lé, yhânggùng má sê gyô kat bê nghut ri.

30Yesuq gi, Yhâng é gùng mai hpungwup a-tsam htoq ló é lé, radá dâm châng sê kat luî, byù mòqmó shut lhing wú mù, “Ngá é bu má ó yùq záng bê lhú?” ga myî kat ri.

31Haú hkûn, Yhâng é chángzô pé gi, “Náng é lhînghkyùq má byù ajùm ayò chyîn chyap nyi é lé, myang to luî nhîng, ‘Ngo lé, ó yùq záng bê lhú?’ nghû myî lhê lhú?” ga tû taî kat akô.

32Nghut kôlhang, Yesuq gi, Yhang lé lé záng sû lé myàng râ matú, ho lhing wú nyi ashî nghut ri. 33Haú hkûn, myiwe myhí haû gi, yhâng chyáng hkâsu dùt laî lò bê hkyô lé sê é yánmai, Yesuq é hí má lé mù, gyùq nán é èq Yhâng é hkyîwang má ngóm gòp to luî, yhâng chyáng dùt laî lò bê hkyô bànshoq lé taî kyô ri. 34Haû mù, Yesuq gi, myiwe myhí haû lé, “Byìzo ê, náng é lùmjíng myìt gi, nàng lé lhoqgê byi bê nghut ri; náng é nòhpyo ge byùq bê nghut ri; ngón za ló àq hkoi!” ga taî ri.

35Yesuq gi, dang ru taî nyi ashî hkûn, târâjong má ùp sû Ya‑iruq é yhûm mai byù ra-am jé lé mù, “Náng é byìzo gi, shi byùq bê; haî mù luî, haû sará lé lhoqhkyik nyi lhê lhú?” ga luî, lé taî kat akô.

36Yesuq gi, haú bang taî é dang lé gyô lhaî pyám mù, “Hkâgyùq, za lùmjíng aq.” ga, haû târâjong má ùp sû lé taî kat ri.

37Hau htâng, Yhang gi, Petiruq, Yakuq eq Yakuq é yhang gu Yohan pé mai lai luî, ó yùq lé le, Yhâng htâng a cháng nhâng nghut ri. 38Yhángmòq, haû târâjong má ùp su é yhûm má jé lé kô é hkûn, Yesuq gi, byu pé garu garín ga yón ngau gabyông nyi bum é lé, myàng ri. 39Yhang gi, yhúmhkaû shut wang ló mù, haú bang lé, “Haî mù, yón ngau gabyông nyi bum akô lhú? Haû zoshâng gi, shi byùq é a nghut, yhup myhî tô é shèq ru nghut lhê.” ga taî ri. 40Nghut kôlhang, yhángmòq gi, Yhang lé wuìzuì kut pyám byî akô.

Yhang kúm gi, haú bang bànshoq lé hkat htoq pyám mù, zôshang é yhâng nu yhâng wâ nhik eq Yhâng é chángzô pé lé za shui luî, zoshâng lé lheq tô é wàp má wang e akô nghut ri. 41Yesuq gi, myiwe zo hau é lòq má zuî to mù, “Talihta ku-mi” (hau é lichyúm gi, “Myiwe zo ê, ngò, nang lé taí bá, toq aq.” gâ é nghut lhê.) ga taî ri. 42Myiwe zo haû gi, haú hkûn jáng, toq luî, sô wún ri (Yhang gi, chyungxe zànwut raxe í zân bò bê sû nghut ri.). Yhángmòq gi, haû sû dùt é hkyô lé gyai yhang maú byùq bùm bekô nghut ri. 43Yhang gi, haú hkyô ó lé le a sé nhâng râ matú, yhángmòq lé taî hkûm kat luî, myiwe zo haû lé, zô jung byi tso râ matú le, yhángmòq lé taî ri.

Currently Selected:

Marikuq 5: znot

Highlight

Copy