Marikuq 4

Kyôshi Sân É Dangtú

Mht 13:1-23; Luk 8:4-15

1Yesuq gi, nhông yàm má radàm dum mhoqshit hi ló bê nghut ri. Haú hkûn, Yhâng é lhînghkyùq má byù mòqmó lûm yán zîng lé lo bùm kô é yánmai, Yhang gi, nhông hkaû mâ é lhaî má wang zung tô ri; haú u lé, byù mòqmó gi, nhông yàm gin-gau htoq má nyi míng bum akô nghut ri. 2Yhang gi, haú bang lé, dangtú pé dông myo myo mhoqshit byî nyi ri; Yhang mhoqshit é má, 3“Gyô wú keq! Kyô hkyó sû rayùq gi, kyôshi san râ gâ htoq e ló ri. 4Yhang, kyôshi sân kat é hkûn, ra-am gi, hkyô má gyó ang mù, nghoq pê èq lé hte zô pyám ri. 5Ra-am gi, myi-tse a htu é lùqgòk yò pé má gyó ang mù, myi-tse a htu é yánmai, luì za yùq htoq lò kôle, 6a-myìt a wó chîn hing é nghut mù, buì htoq lô jáng, lhap kyuq pyám bê nghut ri. 7Dum ra-am gi, zugyóm hkaû má gyó ang luî, zubyap haú pé kô lò mù, wùp pyâm é yánmai, ashi a wó zui nghut ri. 8Nghut kôlhang, ra-am gi, myìhpún bo é jang má gyó âng é yánmai, yùq kô lò mù, ashi sum xê tú, hkyuq xê tú, rashô tú lháng, zuî myô lo é nghut ri.” gâ ri.

9Hau htâng, Yesuq dum taî é gi, “Gyô yù râ nohkyap dàp sû gi, gyô yù sháng gàq.” gâ ri.

10Yhang baú za nghut nyi é hkûn, haû lagyo raxe í yùq eq Yhâng nàm má nyi tô é bang gi, dangtú haû eq sêng é hkyô lé, lé myî akô. 11Haú hkûn, Yhang, yhángmòq lé taî kyô é gi, “Garai Gasâng é mîngdán eq sêng é sê gyo wuî é hkyô lé sê gyo râ ahko ahkáng, núngmòq lé byî to lùgù nghut bê. Nghut kôlhang, góbâng é matú gi, jung hkangmó lé dangtú dông chyat taî é nghut lhê. 12Haû mù luî,

‘Yhángmòq gi, myang nyì kôlhang, a wú sé kó, gyô nyì kôlhang, a sê gyo kó;

sê wú sê gyo kô é ru nghut le gi, lhing taû lò mù, mara hkyut pyám byî é hui kôrâ nghut lhê!’#Esai 6:9-10

gâ ri.” gâ tô ri.

13Hau htâng, Yhang, yhángmòq lé dum xoq taî é gi, “Núngmòq, dangtú shî lé a sê gyo kô é nghut le gi, gótû dangtú pé lé hkâsu kut ung sê gyo kôrâ lhú? 14Yò mû zui sû sân kat é kyôshi gi, mungdang nghut lhê. 15Byù ra-am gi, hkyô má gyó âng é kyôshi eq wuí akô; yhángmòq gi, mungdang lé wó gyô yu é hkûn yhang, Tsádán gi, lé mù, yhángmòq chyáng mâ é mungdang lé lé yu pyám byî ri. 16Ra-am gi, lùqgòk yò pé má gyó âng é kyôshi eq wuí akô; yhángmòq gi, mungdang lé wó gyo jáng, radá dâm gabú myìt èq hàp yu akô. 17Nghut kôlhang, yhángmòq gi, a-myìt a wó chîn é yánmai, razùp zo za yùq kômù, mungdâng é yánmai, wuîhkê é eq zing-rî é pé hui kôjáng, hân hân yhik ló byùq kôrâ nghut lhê. 18Dum ra-am nghut jáng, zugyóm hkaû má gyó âng é kyôshi eq wuí akô; yhángmòq gi, mungdang lé wó gyô yù kôlhang, 19shí i-pyàt lhê é myìt wui myìt hke hkyô, hkyô shuî nghoq jung ngùn hîng zèhkoq eq gótû zè pé lé ô nau é hkyô pé, yhángmòq chyáng wang lò jáng, haû mungdang lé hup pyâm é yánmai, ashi a wó zui dùt kôrâ nghut lhê. 20Ra-am kúm gi, myìhpún bo é jang má gyó âng é kyôshi eq wuí akô; yhángmòq gi, haû mungdang lé gyô yù mù, lhom yù luî, sân kat é htoq sum xê tú, hkyuq xê tú, rashô tú lháng myo shoq ashi zuî lò kôrâ nghut lhê.” gâ ri.

Myibung Htûn É Hkyô

Luk 8:16-18

21Yesuq, yhángmòq lé xoq taî é gi, “Núngmòq gi, myibung lé yù mù, tsûngjang má a tsung é za, mûng èq nghop tô é, a nghut jáng, yhupgyàp ô má tsung tô é, ó yùq wá kut wú akô lhú? 22Hkâsu mù gâ le, haq tô é zè haí jung le htoq ze lò râ eq, zaú tô é pé haí jung le byông htoq lô râ nghut lhê. 23Gyô yù râ nohkyap dàp sû ó yùq nghut kôle, gyô yù sháng gàq.” gâ ri.

24Hau htoq agó, Yhang dum taî é gi, “Núngmòq gi, wó gyô yu é hkyô lé rago myìt wú keq; núngmòq lìk byî é bung èq, núngmòq lé dum lìk byi râ nghut lhê; hau htoq lháng myo shoq wó kôrâ nghut lhê. 25Hkâsu mù gâ le, wó to sû lé gi, jàt byi shirâ, a wó su chyáng mai kúm gi, yhang wó tô é lé lháng yu pyám byi shirâ nghut lhê.” gâ ri.

Kyôshi Yùq Kô Lo É Dangtú

26Hau htâng, Yhang dum xoq taî é gi, “Garai Gasâng é mîngdán gi, byù rayùq mai, myigùng má sân kat é kyôshi eq wuí ri. 27Byù haú yùq gi, myín lé yhup tô é nghut nghut, nyí lé toq lo é nghut nghut, kyôshi gi, zuí htoq lô mù, yùq kô lo nyi ri; nghut kôlhang, yhang gi, hkâsu kut yùq lo nyi é hkyô lé a sé nghut ri. 28Myigùng gi, yhang baú yhang, kyôshi lé, sânghi má abum bum nhâng, hau htâng má a‑nhâm htoq nhâng mù luî, ashi zui shoq kut é nghut lhê. 29Kyôshi myhíng jáng, kyô shu yòq jé bê nghut é yánmai, yhang gi, zaiyik èq yâm yù râ nghut lhê.” gâ ri.

Angshi Cham Lé Dangtú Yu É Hkyô

Mht 13:31-32; Luk 13:18-19

30Yesuq dum xoq taî é gi, “Garai Gasâng é mîngdán lé, hai èq lhoqwhuî wú râ lhú? Haí jung dangtú yù mù, shit wú râ lhú? 31Garai Gasâng é mîngdán gi, angshi cham eq wuí ri. Angshi cham haû gi, myigùng má hô é kyô-myui jí pé má je tiq é nghut lhê. 32Nghut kôlhang, ho mù, yùq kô lô jáng, xun hkyâm má hô é mhan-haq hpoqnòq gàm bànshoq htoq má je kô é agàm dùt lò mù, akoq kô lò luî, hau é buìshûm hkaû má, maulat nghoq zô pé lé wó zung nô nyi é nghut lhê.” gâ ri.

33Haû sû é dangtú myo myo dông mai, Yesuq gi, yhángmòq wó sê gyô é myhó, mungdang hko kyô nyi ri. 34Yhang gi, yhángmòq lé, dangtú a bo é haî lháng a taî wú nghut ri; nghut kôlhang, Yhang eq chángzô pé baú nghut nyi é hkûn kúm gi, jung hkangmó é lichyúm lé taî sân kyô ri.

Laìdun Mó Lé, Yesuq Lhoqzîm Pyâm É Hkyô

Mht 8:23-27; Luk 8:22-25

35Haú nyí, myínhtâng lé, Yesuq gi, Yhâng é chángzô pé lé, “Ngá-nhúng nhông hé hpoq shut dàp e ló sháng.” ga taî ri. 36Haú hkûn, chángzô pé gi, byù mòqmó lé nyhi pyâm to luî, Yhang zung tô é lhaî mai yhang, Yhang lé shuî gû dàp ló bekô; gótû lhaî pé le, yhángmòq eq rahá bo gû dàp ló akô nghut ri. 37Haú u lé, laìdun mó jé lô mù, wuìlhêng dîng toq lô luî, lhaî má lo bàt hâng é yánmai, wuì byíng lô bê nghut ri. 38Haú hkûn, Yesuq gi, lhaî htâng má uhkuq hkuq mù yhup myhî tô ri; haû chángzô pé gi, Yhang lé nhaû pun luî “Sará ê, ngá-nhúng myùp shi ló râ dùt é lé, nàng a chiq byi lhú?” ga taî akô nghut ri.

39Yesuq gi, toq mù, laìdun lé tan luî, wuìlhêng lé, “Zim aq.” ga taî kat jáng, haû laìdun nûm ló byùq luî, bànshoq zîm byùq bê nghut ri.

40Hau htâng, Yhang gi, Yhâng é chángzô pé lé, “Haî mù, haû í gyùq bum akô lhú? Núngmòq gi, lùmjíng myìt a bò shi kó lhú?” ga taî ri.

41Yhángmòq gi, gyai yhang gyùq dan bùm kômù, “Shí yùq gi, hkâsû é byù nghut lhê lhâ? Laì eq wuìlhêng pé lháng gi, Yhâng é dang lé gyo byî rî-nhung!” ga luî, rayùq eq rayùq myî lhûm bum akô nghut ri.

Currently Selected:

Marikuq 4: znot

Highlight

Copy