Marikuq 6

Yhûmsing Wà Má Myòqdong A Wó É Hkyô

Mht 13:53-58; Luk 4:16-30

1Yesuq gi, haú jowò mai htoq e ló mù, Yhâng é yhum mau shut taû ló ri; Yhâng é chángzô pé le, Yhang eq rahá bo châng ló akô nghut ri. 2Bánno Buìnyì jé jáng, Yhang gi, târâjong má mhoqshit hi ló ri; wó gyô é bang myo myo gi, gyô maú byùq kôluî, “Byù shí yùq gi, haú pé lé hká má mhoq yu é lhâ? Yhang wó yu é hpàqchyî byéng-yá gi, hkâsû é wá nghut mù luî, làklaí alhô agàn lé lháng kut lhê làq? 3Shí yùq gi, Mariq é yhang zo, làksimâ hpó nghut lhê, a nghut lhú? Yhang gi, Yakuq, Yosep, Yudaq, Simun pê é yhang mang nghut lhê, a nghut lhú? Yhâng nhammó pé le, ngá-nhúng eq rahá nghut nyi lhê, a nghut kó lhú?” ga luî, Yhang lé myìt a ngón dùt bùm bekô nghut ri.

4Yesuq, yhángmòq lé taî é gi, “Myìqhtoi rayùq gi, yhûmsing é yhum mau, yhâng é buìnùm ji-myi wuì eq yhûmsing é yhûm má za, myòqdong a lhaq wó wú é nghut lhê.” gâ ri. 5Yhang gi, nò byù ra-am lé lòq ke byi mù, lhoqgê byî é mai lai luî, gótû làklaí alhô agàn haî le, haú má a wó kut shit nghut ri. 6Haû mù, Yesuq gi, yhángmòq lùmjíng myìt a bò kô é hkyô lé, maú nyi ri. Hau htâng, Yhang gi, Nazaret wà mai htoq ló mù, rawà htâng rawà má châng mhoqshit wún ri.

Lagyo Raxe Í Yùq Lé Nhang Htoq Kat É Hkyô

Mht 10:5-15; Luk 9:1-6

7Yesuq gi, haû lagyo raxe í yùq lé wùt yù mù, agè ashop é nàt pé lé ûng râ a-tsam byi luî, í yùq yùq kut nhang htoq kat ri.

8Yhang, yhángmòq lé châng pying kat é dang gi, “Hkyôwui é matú má, dumbáng mai lai luî, zoshuq le, e-tap le, ngùn le, gótû haî le, hkâyu chûng kó; 9hkyî-tsung kúm gi, tsûng chûng keq; nghut kôlhang, bu í dung hkâwut chûng kó. 10Hká má nghut kôlhang, rayhûm yhûm má núngmòq wang bíng kô é nghut le gi, haú wâ mai dum htoq ló é buìnyì jé shoq, haú yhûm má za nyi nyì keq. 11Jowò rawò wò mâ é bang, núngmòq lé a lhom hàp yù, a lhom gyo byi kô é nghut jáng, núngmòq lé yhángmòq a lhom hàp yu é sàksé dùt sháng gàq, núngmòq é hkyîwa má dàp é hpuílhaû lé ko hkyô pyâm to mù, haú jowò mai htoq ló keq.” gâ ri.

12Haû mù, yhángmòq gi, htoq e ló luî, myìt lhîng râ é hkyô, byu pé lé hko kyô akô. 13Hau htoq agó, yhángmòq gi, nàt gâng pé myo myo lé hkat htoq pyám byi mù, no é bang myo myo lé le xû bùt byi luî, lhoqgê byî akô nghut ri.

Yohan, Ulhum Hpyit Huî é Hkyô

Mht 4:1-12; Luk 9:7-9

14Yesuq é myìng hû lo é yánmai, Herot hkóhkâm gi, Yesuq é hkyô lé wó gyo bê nghut ri. Byù ra-am gi, “Shí yùq gi, haû shi byùq bê Wuìmyhup Sará Yohan dum dui toq lo é nghut lhê âbe, hau é yánmai, yhang gi, hpungwup a-tsam haú pé lé wó kut é nghut ri.” ga luî, taî bum akô nghut ri.

15Ra-am gi, “Yhang gi, Eliya nghut ri.” ga taî akô nghut ri.

Dum, ra-am taí kô é gi, “Yhang gi, hí hpyang lhê é myìqhtoî pé su, myìqhtoi rayùq nghut ri.” gâ ri.

16Herot kúm gi, haú lé wó gyo jáng, “Ngò, ulhum hpyit pyám byî é Yohan gi, shi é mai dum dui toq bu‑nhung!” ga taî ri.

17Herot gi, yhang gu Hpilip é yhang myi Herodi‑aq lé hâng yu pyâm é hkyo é yánmai, Yohan lé chyup tuî yù nhâng mù, htóng hkyô pyám nhang wú é sû nghut lhê. 18Hkâsu mù gâ le, Yohan gi, Herot lé, “Nàng, nunggû é yhang myi lé hâng yu é gi, târâ a wang é nghut lhê.” ga luî, taí byî nyi é yánmai nghut ri. 19Haû mù, Herodi‑aq gi, Yohan lé gyai a naù a wom dùt byùq luî, sat pyám naû kôlhang, a wó sat dùt nyi ri. 20Haî mù gâ le, Herot gi, Yohan, díngmán chyoiyúng é sû nghut é lé sé mù luî, yhang lé gyùq hkúngga mù, yhang lé búng nyi é yánmai nghut ri. Yhang gi, Yohan é dang pé lé wó gyo jáng, gyô nhúngnhâng byùq kôlhang, yhang taî é dang pé lé ru gyô nau nyi ashî nghut ri.

21Nghut kôlhang, Herot gi, yhâng é hkû ladu hkyúm buìnyì má, byù mó pé, gyèzaû pé, Galile mau sûwún wui pé lé, ji yù mù zoshuq poî mó kut é yánmai, haú nyí gi, Herodi‑aq é matú, buìnyì gè dùt bê nghut ri. 22Herodi‑aq é yhang zo byìzo gi, wang lé lô mù, gó shit é hkûn, Herot eq yhâng é bíng pé gi, myìt ngón bum akô nghut ri.

Haû mù, hkóhkâm gi, myiwe zo haû lé, “Nàng ô nau é haî nghut kôle, dung aq, ngò nàng lé byi râ nghut lhê.” ga taî ri. 23Hau htoq agó, yhang gi, myiwe zo haû lé, “Nàng dûng é haî nghut kôle, ngò byi râ; ngá é mîngdán rawuí gû lháng, byi râ nghut lhê.” ga, dâkam danghtum htûm tô ri.

24Haú hkûn, myiwe zo haû gi, htoq ló mù, yhâng nu lé, “Haî dûng le gè râ làq?” ga myi jáng, yhâng nu gi, “Wuìmyhup Sará Yohan é ulhum dung aq.” ga tû taî kat ri.

25Myiwe zo haû gi, radá dâm hân hân wang ló mù, hkóhkâm lé, “Ahkuî yhang, Wuìmyhup Sará Yohan é ulhum lé, bó má kat mù byi laq.” ga, dûng tôngbán ri.

26Haû su ga jáng, hkóhkâm gi, myìt gyai yhang a ngón dùt byùq kôlhang, yhang dakâm danghtum htûm tô é yánmai le, bíng pê é myòqdong lé tê nau é yánmai le, myiwe zo haû taî é dang lé a kâm he pyám lo nghut ri. 27Haû mù, hkóhkâm gi, zúng é gyèzo rayùq lé, Yohan é ulhum ê hpyit lô râ matú, radá dâm hkunmó hkyó mù nhang kat ri. Haû mù, haú yùq gi, htóng hkaû má ê luî, Yohan é ulhum lé, ê hpyit mù, 28bó má kat luî, myiwe zo haú lé lo byî ri; myiwe zo haû gi, ulhum haû lé, yhâng nû chyáng yu ló byî ri. 29Yohan é chángzô pé gi, haú hkyô lé wó gyo kôjáng, yhâng é màng lé lé yû luî, lùp má ló myhup pyám bekô nghut ri.

Byù Ngo Hkyîng Lé Byi Tsô É Hkyô

Mht 14:13-21; Luk 9:10-17; Yhn 6:1-14

30Lagyô pé gi, Yesuq chyáng dum jé zîng lò kômù, yhángmòq kut laî lo é hkyô pé eq mhoqshit bê hkyô pé bànshoq, Yhang lé taî kyô akô nghut ri. 31Hau htâng, byù myo myo gi, yhángmòq chyáng htoq htoq wàng wàng kut nyî kô é yánmai, yhángmòq gi, zang zo ahkyíng lháng a wó kó nghut ri. Haû mù, Yesuq gi, chángzô pé lé, “Ngá-nhúng, tsím tsâm é jowò ralhum má ê mù, ê nô yù sháng.” ga taî ri.

32Haû mù, yhángmòq gi, yhángmòq baú lhaî racham má ji mù, tsím tsâm é jowò shut e ló akô nghut ri. 33Nghut kôlhang, yhángmòq e ló é lé châng myang é bang myo myo gi, yhángmòq lé wú sé kôluî, wà hkangmó mai hkyî hkyô châng din ê kômù, yhángmòq é hí má jé to láng akô nghut ri. 34Yesuq gi, lhaî mai gyó dàp ló é hkûn, byù mòqmó nyi to láng é lé myàng jáng, yhángmòq gi, zúng sû a nyi é sau pé su dùt kô é yánmai, yhángmòq lé wú shogyo luî, myo myo mhoqshit byî hi ló bê nghut ri.

35Buì gyum ló yâm jé jáng, Yhâng é chángzô pé gi, lé lô kômù, Yhang lé, “Shí má gi, tsím tsâm é jowò nghut é htoq agó, buì le gyum ló bê; 36yhángmòq gi, awui ayàm mâ é yhûm pé eq wà pé má, zoshuq ló ho wuì zo kó sháng gàq, yhángmòq lé ló nhâng àq hkoi.” ga taî akô nghut ri.

37Haú hkûn, Yhang gi, “Núngmòq, yhángmòq lé rajung jung byi tso keq.” ga tû taí jáng, yhángmòq gi, “Shî myhô é bang zo râ matú, ngá-mòq gi, ê luî, denari#6:37 Denari rachap gi, byù rayùq é ra-nyí lhê é zuihpau eq wuí ri. í sho èq mùk ê wuî byi ra râ lùq?” ga dum taû myî akô nghut ri.

38Nghut kôlhang, Yhang gi, “Núngmòq chyáng mùk hkâ-myhó wó akô? Ê wú wú keq.” ga myî ri. Haû mù, yhángmòq gi, myang hô jáng, “Mùk ngo long eq ngozo í du wó lhê.” ga, dum tû taî akô nghut ri.

39Hau htâng, Yesuq gi, bànshoq bang lé ahpúng hpúng kut wàhu yò má zùng nhâng râ matú, Yhâng é chángzô pé lé taî kat ri. 40Haû mù, shiwa byu pé gi, rashô shô kut le, ngo xê xê kut le, ahpúng hpúng zung tô bùm bekô nghut ri. 41Yesuq gi, haû mùk ngo long eq ngozo í du lé yù mù, mauhkûng shut tu wú to luî, jeju ban hkya-on jáng, mùk lé hpê gam ri. Hau htâng, Yhang gi, byu pê hí má châng hkat to byi râ matú, Yhâng é chángzô pé lé byî ri. Ngozo í du lé le, Yhang yù mù, bànshoq bang lé gàm byî ri. 42Yhángmòq bànshoq bang gi, zô gyî bùm bekô nghut ri. 43Hau htâng, haû chángzô pé gi, zô myhit tô é mùk eq ngozo lé, raxe í mung byíng shoq wó gùq tsîng yu ashî kó nghut ri. 44Haú hkûn, zô é bang gi, yùqgè wuì baú lháng, byù du ngo hkyîng nghut ri.

Yesuq, Wuì Htoq Má Sô É Hkyô

Mht 14:22-33; Yhn 6:15-21

45Yesuq gi, haû shiwa byu pé lé byo ló nhang nyi é hkûn jáng, Yhâng é chángzô pé lé lhaî má wang ji nhâng mù, tû-tap mâ é Bet‑saida wà mó shut dàp ló láng nhang ri. 46Yhángmòq lé shi-kyâm kat é htâng, Yhang gi, kyûdung râ ga, Yhang baú bùm shut dòq e ló bê nghut ri.

47Buì gyum htâng, lhaî gi, nhông gùng má jé tô é u lé, Yesuq gi, Yhang baú za myì htoq má nyi tô ashî nghut ri. 48Laì tau mùt é yánmai, haû chángzô pé gi, lhaî lhu wuîhkê nyì kô é lé, Yesuq myang ri. Nàpsûn maubó zó sum hkyíng eq hkyuq hkyíng gyoro má, Yesuq gi, nhông htoq má so mù, yhángmòq shut e ló luî, yhángmòq é nàm mai laî ló râ haq htung ri. 49Nghut kôlhang, yhángmòq gi, Yhang, nhông htoq má sô nyi é lé myàng kôjáng, sôbyô su ngàm kômù, kyek garû bum akô nghut ri. 50Hkâsu mù gâ le, yhángmòq bànshoq bang gi, Yhang lé myàng kôluî, gyùq dàn kô é yánmai nghut ri.

Nghut kôlhang, Yhang, radá dâm yhángmòq lé dáng nyo kat é gi, “Hkâgyùq kó. Ngò ru nghut lhê; zim za nyì keq.” gâ ri. 51Hau htâng, Yhang gi, lhaî htoq má yhángmòq eq rahá ê dòq ji jáng, laì gi, zîm byùq bê nghut ri; haû mù, yhángmòq gi, gyai yhang maú hong byùq bùm bekô nghut ri. 52Hkâsu mù gâ lé, yhángmòq gi, mùk gam é làklaí alhô agàn eq séng luî a sê gyo kô é htoq agó, myìtbun a bóng kô é yánmai nghut ri.

53Yhángmòq gi, gû dàp ló kômù, Genesarat mau má jé wang lò jáng, lhaî lé haú má ló shap tô akô nghut ri. 54Yhángmòq lhaî mai gyó é hkûn jáng, byu pé gi, Yesuq lé lhom wú sê akô nghut ri. 55Haû mù, yhángmòq gi, haú mau ra-mau gón má din jón mù, nò bang lé taphkang mai wàq luî, Yesuq nyi ri gâ é jowò hkangmó má, shuî lé lo bum akô nghut ri. 56Yesuq jé é wà hkangmó, wà mó hkangmó, awui ayàm mâ é wà hkangmó pé má, yhángmòq gi, nò byù lé gaì pé má lé lheq to kôluî, Yhâng é bushi htâng má za lháng, haú bang lé byi záng nhâng râ matú, Yhang lé dûng tôngbán akô. Yhang lé záng é lhúnglhâng bang gi, lhoqgê byî é huî akô nghut ri.

Currently Selected:

Marikuq 6: znot

Highlight

Copy