Mahte 10

Raxe Í Yùq Lé Nhang Htoq Kat É Hkyô

Mrk 3:13-19, 6:7-13, 9:41, 13:9-13; Luk 6:12-16, 9:1-6, 12:2-9, 51-53, 14:26-27, 21:12-17

1Yesuq gi, Yhâng é chángzo raxe í yùq lé wùt yù mù, agè ashop é nàt pé lé wó hkat htoq râ eq, nòlì nòjàng eq nòhpyo ajung jung lé wó lhoqgê râ ahko ahkáng yhángmòq lé byî ri.

2Haû lagyo raxe í yùq é myìng gi, (Petiruq ga sû) Simun eq yhang gu Andire, Zebedi é yhang zô nhiktâng Yakuq eq yhang gu Yohan, 3Hpilip eq Barihtolume, Htomaq eq hkán hkyuî sû Mahte, Alahpe é yhang zo Yakuq, Htade, 4Zelutuq#10:4 Zelutuq gâ é gi, yhûmsîng zui saî é hkyô má gyai yhang myìt lòm shîrong é sû lé gâ lhê. Haú u lé, Isira-elaq byu pé gi, mîngdán lùthkyô wó râ matú shi-kùt nyi é hpúng bang lé, Zelutuq gâ lhê. dùt é Simun eq, Yesuq lé àp pyám râ sû, Yudaq Isikarut pé nghut akô.

5Yesuq gi, haú bang raxe í yùq lé dang sâng mù, nhang htoq kat ri. Yhang sang kat é dang gi, “Tûngbaù pê chyáng le hkâ-ê kó; Samariq wà rawà má le hkâwâng kó. 6Haû byùq byùq é sau pé su nghut nyi é Isira-elaq byu pê chyáng shèq ê keq. 7Núngmòq gi, ê mù, ‘Mauhkûng mîngdán gi, chyâng lò bê nghut ri.’ nghu é danglù lé hko kyo keq. 8Nò bang lé lhoqgê byi, shî bê bang lé lhoqdui toq, yàpjèq nòlì dàp bang lé lhoqsan lhoqyúng byi, nàt gâng pé lé hkat htoq pyám, kut keq. Laí laí wó é lé, laí laí byi keq. 9Núngmòq é hpyihit má, hîng, ngùn eq gyi pé hkâkat chûng kó; 10hkyôwui é matú, e-tap, mèbu htaí, hkyî-tsung eq dumbáng pé hkâyu chûng kó; hkâsu mù gâ le, mû zui sû gi, zoshuq wó gíng lhê.

11Hká wâ hká dum má jé wang ló le le, haú mâ é gíngdán é byù lé hô mù, haú mai htoq ló é hkûn jé shoq, haú yùq é yhûm má za nyi nyì keq. 12Haú yhûm má wang é hkûn, dù nyo yù keq. 13Haú yhûm gi, gíngdán é nghut jáng, núngmòq shimân byî é hkyô, yhángmòq chyáng jòq nyì sháng gàq; a gíngdán é nghut jáng, núngmòq chyáng dum taû lò sháng gàq. 14Núngmòq lé a lhom hàp yu é eq núngmòq é dang lé a lhom gyo byi kô é nghut jáng, haú yhûm haú wâ mai htoq ló é hkûn, núngmòq é hkyîwa má dàp é hpuílhaû lé ko hkyô pyâm to keq. 15Ngò, núngmòq lé teng za taí kôlé, târâ jéyáng é buìnyì má, haú wâ gi, Sodom eq Gomora wà mó htoq má je hpuzo râ nghut lhê. 16Wàmhkui hpúng má nhang hâng kat é sau pé lé su, Ngò, núngmòq lé nhang kat é nghut lhê. Haû mù, lhângmuì su hpàqchyî bò luî, hpûngkyui su nú nhâm nyì keq.

17Byu pé lé sidìq keq; hkâsu mù gâ le, yhángmòq gi, núngmòq lé, târâ rûng pé má ê àp pyám kôrâ nghut é htoq agó, yhángmòq é târâjong pé má, núngmòq lé nhuq bàt kôrâ nghut lhê. 18Núngmòq gi, Ngá é yánmai, mau zau wuì eq hkóhkam pê é hí má shuî jé é hui luî, yhángmòq é hí má le, tûngbaù pê é hí má le, sàksé myang hkám kôrâ nghut lhê. 19Nghut kôlhang, núngmòq lé àp pyám kô é hkûn, núngmòq hkâsu taí râ eq haî taí râ lé, hkâ-myìt chiq kó. Haú hkûn taí râ dang, núngmòq wó kôrâ nghut lhê. 20Hkâsu mù gâ le, haû gi, núngmòq é dang a nghut, núngmòq é Yhâng wâ é Sô shèq, núngmòq dông taí râ ru nghut lhê.

21Nhiktâng gi, nhiktâng yhangchang, îwa gi, yhang zo lé, shî shoq àp pyâm lhum kôrâ nghut lhê; zo wuî gi, mó wuî lé gumlau toq mù, sat pyám nhâng kôrâ nghut lhê. 22Byù lhúnglhâng bang gi, Ngá é yánmai, núngmòq lé a nguì kut kôrâ nghut lhê; nghut kôlhang, jihtûm jé shoq wó hkam jân nyi é sû gi, hkyi yu é hui râ nghut lhê. 23Rawò má zing-rî é hui jáng, rawò shut hpang ê keq. Ngò, núngmòq lé teng za taí kôlé, Isira-elaq byu pê é wà mó pé má, núngmòq a ban wang ngàp shi-má, haû Byu Yhangzo jé râ nghut lhê.

24Jongzo gi, sará htoq, duìnhâng zoshâng gi, yhûmsing htoq, gyaú râ a nghut. 25Jongzo gi, yhâng é sará su, duìnhâng zoshâng gi, yhâng é yhûmsîng su, wó dùt jáng gé bê. Yhûmsîng hpó lé lháng Bezebulaq#10:25 Bezebulaq gâ é gi, Tsádán é myíng rajà nghut lhê. ga kô le gi, Yhâng é yhûmbyù wuì lé gi, je riyhang nghû kôrâ a nghut lhú?

26Haû mù, yhángmòq lé hkâgyùq kó. A byông htoq loshoq wó zaú nghop tô é haî le a jòq râ nghut lhê; a sé loshoq wó haq tô é le, haî a jòq râ nghut lhê. 27Ngò, núngmòq lé mauchut hkaû má taî é hkyô lé, myòq myàng maubó má taî kyo keq; Ngò, núngmòq lé dangsoq soq kyô é hkyô lé, yhûmhkûng htoq mai taî pyô keq. 28Gùngdu lé za wó sat pyám mù, sô lé a wó sat bang lé, hkâgyùq kó. Sô lé le, gùngdu lé le, ngaraî ming má wó lhoqhtên é Sû lé shèq, gyùq nyì keq. 29Jòhkyáng í du lé, gyi htingchap rachap èq wó ûng pyâm lhê a nghut kó lhú? Nghut kôlhang, haû radu lháng, núngmòq é Îwâ é myìt èq a nghut jáng, myigùng má wó byìt gyó râ a nghut. 30Núngmòq é ulhum mâ é xâm bànshoq lé lháng, nghap to gù nghut lhê. 31Haû mù, hkâgyùq kó; núngmòq gi, haû jòhkyáng myo myô htoq má lháng gù je bo é bang nghut lhê.

32Byu pê hí má, Ngo lé lhom yín yu é sû ó yùq lé nghut kôle, mauhkûng htoq mâ é Ngá wâ é hí má, Ngò lhom yín yû râ nghut lhê. 33Byu pê é hí má, Ngo lé he-ngìk pyâm é sû ó yùq lé nghut kôle, mauhkûng htoq mâ é Ngá wâ é hí má, Ngò he-ngìk pyám râ nghut lhê.

34Ngo lé, haû myìdàm htoq má nguì ngón yùqyò hkyô byi râ matú lé lo é sû su hkâ-ngâm kó. Ngò gi, nguì ngón yùqyò hkyô byi râ matú lé lo é a nghut, shâm byi râ matú shèq lé lo é ru nghut lhê.#10:34 Yesuq gi, nguì ngón yùqyò hkyô byi sû nghut lhê. Nghut kôlhang, Yhâng é yánmai, byu pé mabyòq htoq râ nghut é hkyô lé sé mù, haû su ga taî é nghut lhê. 35Hkâsu mù gâ le,

‘Yùqzo gi, yhâng wa eq, byìzo gi, yhâng nu eq, dùmó gi, yhâng mhoí eq, byòq lhum kôrâ nghut lhê.

36Yhûmsing é yhûmbyù wuì gi, yhûmsing é gyè taû dùt râ nghut lhê.’#Mihka 7:6

gâ tô é matú shèq, Ngò jé lé é ru nghut lhê.

37Ngo lé chyit é htoq yhûmsing é înu îwa lé je chyit é sû ó yùq nghut kôle, Ngá é chángzo kut râ gíngdán sû a nghut; Ngo lé chyit é htoq yhûmsing é zo wuî lé je chyit é sû ó yùq nghut kôle, Ngá é chángzo kut râ gíngdán sû a nghut; 38Yhûmsing é tapzîng lé a wàq é za, Ngá htâng châng é sû ó yùq nghut kôle, Ngá é chángzo kut râ gíngdán sû a nghut. 39Yhûmsing é chyungxe lé ha bûn é sû ó yùq nghut kôle, chyungxe sum râ nghut lhê; Ngá é yánmai, yhûmsing é chyungxe sûm pyâm é sû ó yùq nghut kôle, chyungxe wó râ nghut lhê.

40Núngmòq lé hàp yù sû gi, Ngo lé hàp yu é sû nghut bê; Ngo lé hàp yù sû gi, haû Ngo lé nhang kat Sû lé hàp yu é sû nghut bê. 41Myìqhtoi rayùq lé, myìqhtoi dông lhom hàp yu é sû ó yùq nghut kôle, myìqhtoi rayùq é chyûnghuq lé wó yû râ nghut lhê; díngmán sû rayùq lé, díngmán sû dông lhom hàp yu é sû ó yùq nghut kôle, díngmán sû rayùq é chyûnghuq lé wó yû râ nghut lhê. 42Shî, tiq bang mâ é rayùq yùq lé, Ngá é chángzo nghut é yánmai, ûchyam ragòm byi huq é sû gi, Ngò, núngmòq lé teng za taí kôlé, yhâng é chyûnghuq lé hkyak myang hkam yù râ za nghut lhê.” gâ ri.

Currently Selected:

Mahte 10: znot

Highlight

Copy