Mahte 11

Yesuq Eq Wuìmyhup Sará Yohan

Luk 7:18-35

1Yesuq gi, Yhâng é chángzo raxe í yùq lé dang ban pying é htâng má, Galile mau mâ é wà pé má mhoqshit râ matú eq hko kyo râ matú, haú jowò mai htoq e ló bê nghut ri.

2Wuìmyhup Sará Yohan gi, Hkrisidùq kut nyi é hkyô lé, htóng hkaû má wó gyo jáng, 3“Nàng gi, haû jé lé lô râ Sû nghut lhê lhú? Haû a nghut jáng, ngá-mòq gi, góyùq lé láng ra shirâ lhú?” ga, yhâng é chángzô pé lé myí nhang kat ri.

4Yesuq tû taî é gi, “Núngmòq wó gyo wó myang é hkyô, Yohan lé ló taî kyo keq; 5myòqjìt bang, myòq wó myâng bekô; hkyî hten bang le, wó so bekô; yàpjèq nòlì dàp bang le, lhoqgê byî é hui bekô; nojit bang le, wó gyo bekô; shî bê bang le, lhoqdui toq é hui bekô; myùng bâng é matú, gabú danglù hko kyô nyì bê nghut lhê. 6Ngá é yánmai, Ngo lé lum shut é hkyô a bò sû gi, hkungsô wó nyi ri.” ga taî ri.

7Yohan é chángzô pé taû ló kô é u lé, Yohan eq séng luî, byù mòqmó lé Yesuq taî é gi, “Núngmòq gi, haî lé hpùq wú râ matú, haû yòso shut e akô lhú? Laì èq hik nhûn é jàmgàm lé wú râ matú nghut akô lhú? 8Haû a nghut jáng, haî lé wú râ matú e akô lhú? Nú nhâm é mèbu wùt sû lé wú râ matú e akô lhú? A nghut. Nú nhâm é mèbu wùt bang gi, hkóhkâm wâng pé má shèq rû nyi lhê. 9Haû nghut le gi, haî lé wú râ matú ê kô é lhú? Myìqhtoi rayùq lé lhú? Haû kúm nghut ri; Ngò, núngmòq lé taí kôlé, Yohan gi, myìqhtoî htoq lháng gyaú sû nghut lhê. 10Haú yùq é hkyô lé, Chyúmdang má kâ tô é gi,

‘Wú aq, Náng é hkyô lajang láng râ matú, Ngá é lagyo lé, Náng é hí má Ngò nhang kat râ nghut lhê.’#Mal 3:1

gâ ri. 11Ngò, núngmòq lé teng za taí kôlé, myiwe wuì mai hku kat é bang má, Wuìmyhup Sará Yohan htoq je kô é rayùq lháng a htoq wú shi; nghut kôlhang, Garai Gasâng é mauhkûng mîngdán má je tiq dik sû gi, Yohan htoq je kô lhê. 12Wuìmyhup Sará Yohan é buìnyì mai ahkuî jé shoq, mauhkûng mîngdán gi, lú chyîn wang nyi é hui mù, sarhê pé gi, haú lé wó yû bekô nghut ri. 13Hkâsu mù gâ le, Yohan é ahkyíng jé shoq, haû myìqhtoî pé bànshoq eq târâ gi, haú hkyô eq séng luî, myìqhtoi htoî to gù nghut lhê. 14Núngmòq hàp yù nau é nghut jáng, Yohan gi, haû jé lé lô râ ga sû Eliya nghut lhê.#Mal 4:5 15Gyô yù râ nohkyap dàp sû gi, gyô yù sháng gàq.

16Shí i-pyàt lhê é byu pé lé, Ngò, hai eq taî kê wú râ lhú? 17Yhángmòq gi,

‘Núngmòq é matú, ngá-mòq sámpyí mùt byi kôlhang, núngmòq gi, a gó kó;

ngá-mòq, ngaùhkyang sâng kôlhang, núngmòq gi, a ngaù kó.’

ga luî, gaì pé má zùng mù, góbang lé wùt taî lhûm nyi é zoshâng wuì eq wuí akô. 18Hkâsu mù gâ le, Yohan gi, jé lé mù, a zo a shuq kut jáng le, yhángmòq gi, yhang lé, ‘Yhang gi, nàt gang dàp sû nghut ri.’ ga taî akô. 19Haû Byu Yhangzo jé lé luî, zo mù shuq mù kut jáng le, ‘Shí yùq gi, zo myoq shuq myòq nòq sû eq, hkán hkyuî bang eq yubàk dàp bâng é buìnùm hpó nghut ri.’ ga dum taî akô. Nghut kôlhang, hpàqchyî byéng-yá gi, yhâng é múzó èq sàksé tûn shit nyi ri.” gâ ri.

Myìt A Lhing É Wà Mó Pê Hkyô

Luk 10:13-15

20Hau htâng, Yesuq gi, làklaí alhô agàn pé je myo kut shit bê nghut kôlhang, myìt a lhing é wà mó pé lé tân é gi, 21“Kurazin wà mó ê! Nàng dingnyé wó ri! Bet‑saida wà mó ê! Nàng dingnyé wó ri! Núngmòq chyáng lé kut shit é làklaí alhô agàn pé lé, Turuq wà mó eq Sidon wà mó má kut shit é ru nghut le gi, yhángmòq, noq noq mai myìt lhîng mù, jimê tû wùt lhê, myiwap kyaq gyûn lhê kut bekô râ nghut lhê. 22Ngò, núngmòq lé taí kôlé, târâ jéyáng é buìnyì má, núngmòq gi, Turuq wà mó eq Sidon wà mó htoq má je hpuzo kôrâ nghut lhê. 23Dum mù, Kaperina‑um wà nàng ê, nàng gi, mauhkûng jé shoq wàq toq é hui râ lhú? A nghut, mosumhkung má shèq gyó râ nghut lhê. Náng chyáng kut shit é làklaí alhô agàn lé, haû Sodom wà má kut shit é ru nghut le gi, wà mó haû hkû-nyí jé shoq jòq nyì râ nghut lhê. 24Ngò, núngmòq lé taí kôlé, târâ jéyáng é buìnyì má, Sodom wà hpuzô é gi, náng htoq shau râ nghut lhê.” gâ ri.

Ngú Nyî Bâng É Matú Bánno Jang

Luk 10:21-22

25Haú u lé, Yesuq taî é gi, “Mauhkûng eq myigung é Yhûmsîng, Âwa ê, Nàng gi, haú pé lé, hpàqchyî byéng-yá bò bang eq myìt hpàqchyî sé bâng é hí mai haq nghop to luî, zoshâng wuì lé tûn shit bê nghut é yánmai, Ngò, Nang lé hkya-ôn lhê ô. 26Nghut bê, Âwa ê, haû gi, Nàng ô nau é hkyô nghut ri.

27Ngá wa gi, lhúnglháng lé Ngá é lòq má àp byî to bê. Haû Zo lé, Âwa mai lai luî ó le a sé; Âwa lé le, haû Zo eq haû Zo mai sé nhâng râ matú hkyin yu é bang mai lai luî ó a sé.

28Ngú é eq wòlai wun é lhúnglhâng bang ê, Ngá chyáng lé keq; Ngò, núngmòq lé bánno nhâng râ nghut lhê. 29Ngò gi, myìt nú nhâm é eq myìt lhoqnyhum é sû nghut é yánmai, Ngá é kyaú lé wùn keq; Ngá chyáng mai mhoq yû keq; haú hkûn, núngmòq é chyungxe sô bánno kôrâ nghut lhê. 30Haî mù gâ le, Ngá é kyaú gi, wàq lui é htoq agó, Ngá é wò le sôm lhê.” gâ ri.

Currently Selected:

Mahte 11: znot

Highlight

Copy