Lukaq 7

Romaq Gyèzau Rayùq É Lùmjíng Myìt

Mht 8:5-13; Yhn 4:43-54

1Yesuq gi, shiwa byu pé lé ban mhoqshit é htâng má, Kaperina‑um wà shut wang ló ri. 2Haú hkûn, Romaq gyèzau rayùq é chyitdàp duìnhâng zoshâng gi, shî‑nò no nyi ri. 3Haú u lé, gyèzau hpó gi, Yesuq é hkyô lé wó gyo jáng, yhâng é duìnhâng zoshâng lé lhoqgê byi râ matú, Yesuq lé ê ji lò keq ga, Yudaq sûwún wuî lé nhang kat ri. 4Haú bang gi, Yesuq chyáng jé ê kô é hkûn, “Yhang gi, nàng shí hkyô kut byi râ matú gíngdán é sû, yhang nghut nyi ri; 5hkâsu mù gâ le, yhang gi, ngá-nhûng a-myû lé chyitdàp é eq, ngá-mòq matú târâjong le kut byi sû nghut ri.” ga luî, Yhang lé zùq zùq dûng wùt nyi akô. 6Haû mù luî, Yesuq gi, yhángmòq eq rahá za e ló ri.

Haú yhûm eq hká hé a wê é má jé jáng, Romaq gyèzau hpó, yhâng é luzúm wuî lé taí nhang kat é gi, “Yhûmsîng Yesuq ê, náng gûng lé hkâ lhoqhkyik lo. Nàng, ngá é laìshînhtâng má, lé nang râ lháng ngò má a gíngdán. 7Haû mù, ngò, náng chyáng jé lé râ matú gíngdán é sû a nghut; Nàng, dang rahkun za taî kat laq, haú hkûn, ngá é duìnhâng zoshâng ge ló râ nghut lhê. 8Hkâsu mù gâ le, ngò le ahkáng ayá wó é zau rayùq é a‑ô mâ é zau nghut lhê; ngá é a‑ô má le gyèzô pé nyi lhê, rayùq lé ‘Ê àq!’ nghu le, yhang e ló lhê; góyùq lé, ‘Lò àq!’ nghu le, yhang lo lhê; ngá jûn lé le, ‘Shî kut àq!’ nghu le, yhang kut lhê.” gâ ri.

9Yesuq gi, dang haú lé wó gyo jáng, haú yùq é hkyô lé maú byùq luî, Yhâng htâng châng é shiwa byu pé lé lhing wú mù, “Ngò, núngmòq lé taí kôlé, Isira-elaq a-myû má lháng, shî í lùmjíng é sû lé, Ngò a myang wú.” ga taî ri. 10Nhang kat é bang yhûm má dum taû jé jáng, no nyi é duìnhâng zoshâng gi, ge to láng é lé ló myang akô.

Shî Sû Lé Dum Lhoqdui É Hkyô

11Hau htâng hkâ-myháng a myáng má, Yesuq gi, Yhâng é chángzô pé eq, shiwa byù mòqmó le mù rahá za Na‑in gâ é wà shut e ló akô. 12Haû wà wâng hkum má jé lo é hkûn lé, chuimó myhî é yùqzo te gi, shî mù, yhâng é màng lé wàq htoq lé lo akô. Wà byù myo myo le, chuimó myhí haû eq rahá châng lé lo akô. 13Yhûmsîng gi, haû chuimó myhí lé myàng jáng, yhang lé wú shogyo luî, “Hkâ-ngaû.” ga taî ri.

14Yesuq gi, gung shut huî ê mù, lòq èq ê záng kat ri. Haú hkûn, wàq tô é bang le jâng yàp to byî akô. Yhang gi, “Zorâm ê, ngò, nang lé taî lhê, toq àq.” ga taî ri. 15Haú hkûn, shî bê sû gi, toq zûng mù dang taî lo ri. Yesuq gi, zorâm haû lé yhâng nû chyáng dum àp byî ri.

16Byù lhúnglhâng bang gyùq maú bùm kôluî, Garai Gasang lé hkya-ôn é dang gi, “Myìqhtoi mó, ngá-nhûng chyáng lé nyi htoq bê nghut ri. Garai Gasang gi, Yhâng é a-myû lé garúm râ ga lé kûm wú nyi ri.” ga taî nyi akô. 17Haû Yesuq é hkyô eq sêng é lùdang lé, Yuda mau eq haú mau awui ayàm jowò hkangmó má taî pyo myhîn ló bum akô.

Yesuq Eq Wuìmyhup Sará Yohan É Hkyô

Mht 11:1-19

18Haú hkûn, wuìmyhup sará Yohan é chángzô pé gi, haú hkyô bànshoq yhang lé lo taî kyô akô. 19Haû mù luî, Yohan gi, yhâng é chángzo í yùq lé ji yù mù, haû Yhûmsing chyáng nhang kat luî, “Nàng gi, haû jé lé lô râ Sû nghut lhê lhú? Haû a nghut jáng, ngá-mòq, góyùq lé láng ra shirâ lhú?” ga, myí nhang kat ri.

20Haú nhik gi, Yesuq chyáng jé jáng, “‘Nàng gi, haû jé lé lô râ sû nghut lhê lhú? Haû a nghut jáng, ngá-mòq góyùq lé myòqbyu láng nyî ra shirâ lhú?’ ga luî, Wuìmyhup Sará Yohan gi, ngá-nhik lé náng chyáng myí nhang kat ri.” ga taî akô.

21Haú u yhang, Yesuq gi, nò zo hpyo zo, nòlì nòjàng huî é bang eq agè ashop é nàt dàp jun dap é byù myo myo lé, lhoqgê byî ri. Myòqjìt bang myo myo lé le, myòq dum myàng nhang ri. 22Haú hkûn, Yesuq gi, yhángnhik lé, “Myàng mî‑myàng, wó gyo má wó gyo, Yohan lé ló taî kyo keq; myòqjìt bang, myòq wó myâng bekô; hkyî hten bang le, wó so bekô; yàpjèq nòlì dàp bang le, lhoqgê byî é hui bekô; nojit bang le, wó gyo bekô; shî bê bang le, lhoqdui toq é hui bekô; myùng bâng é matú, gabú danglù hko kyô nyì bê nghut lhê. 23Ngá é yánmai, Ngo lé lum shut é hkyô a bò sû gi, hkungsô wó nyi ri.” ga taî ri.

24Yohan é chángzô nhik ló byùq é htâng má, Yesuq gi, Yohan eq séng luî, byù mòqmó lé taî é gi, “Núngmòq gi, haî lé hpùq wú râ matú, haû yòso shut e akô lhú? Lai èq hik nhûn é jàmgàm lé wú râ matú nghut akô lhú? 25Haû a nghut jáng, haî lé wú râ matú e akô lhú? Nú nhâm é mèbu wùt sû lé wú râ matú e akô lhú? A nghut! Wú keq, gyai hpaû é mèbu wùt luî agùn agó wó bang gi, hkóhkâm wâng pé má shèq rû nyi lhê. 26Haû nghut le gi, haî lé wú râ matú ê kô é lhú? Myìqhtoi rayùq lé lhú? Haû kúm nghut ri. Ngò, núngmòq lé taí kôlé, Yohan gi, myìqhtoî htoq lháng gyaú sû nghut lhê. 27Haú yùq é hkyô lé, Chyúmdang má kâ tô é gi,

‘Wú aq, Náng é hkyô lajang láng râ matú, Ngá é lagyo lé, Náng é hí má Ngò nhang kat râ nghut lhê.’#Mal 3:1

gâ ri. 28Ngò, núngmòq lé taí kôlé, myiwe wuì mai hku kat é bang má, Yohan htoq je kô é rayùq lháng a nyì, nghut kôlhang, Garai Gasâng é mîngdán má je tiq dik sû gi, Yohan htoq je kô lhê.” gâ ri.

29Mingbyû lhúnglhâng bang eq hkán hkyuî bang gi, dang haú pé lé wó gyo kôjáng, Yohan byî é baptisima lé hkâm yù kô é nghut mù luî, Garai Gasâng é díngmán é hkyô lé sê gyô yu akô. 30Hparishe pé eq târâ sará pé kúm gi, Yohan byî é baptisima a hkam yù kômù luî, Garai Gasang hen lajang é hkyô lé yhûmsing gung é matú he-ngìk pyâm akô.

31Yesuq dum taî é gi, “Haû mù luî, byù myû shî lé, Ngò, hai èq taî kê wú râ lhú? Yhángmòq hai eq wuí akô lhú? 32Yhángmòq gi,

‘Núngmòq é matú, ngá-mòq sámpyí mùt byi kôlhang, núngmòq gi, a gó kó,

ngá-mòq ngaùhkyang sâng kôlhang, núngmòq gi, a ngaù kó.’

ga luî, gaì pé má zùng uchyang rayùq eq rayùq wùt taî lhûm nyi é zoshâng wuì eq wuí akô. 33Hkâsu mù gâ le, Wuìmyhup Sará Yohan jé lé luî, mùk a zo, tsibyiq a shuq é nyi le le, ‘Yhang gi, nàt gang dàp sû nghut ri.’ ga luî, núngmòq taî akô. 34Haû Byu Yhangzo jé lé luî, zo mù shuq mù kut jáng le, ‘Shí yùq gi, zo myoq shuq myòq nòq sû eq, hkán hkyuî bang eq yubàk dàp bâng é buìnùm hpó nghut ri.’ ga dum taî akô. 35Nghut kôlhang, hpàqchyî byéng-yá é yhang zô pé gi, hpàqchyî byéng-yá tengmán é hkyô lé sàksé hkám byî nyi akô.”#7:35 Nghut kôlhang, Garai Gasâng é hpàqchyî byéng-yá lé lhom hàp yu é bànshoq bang gi, Garai Gasâng é hpàqchyî byéng-yá haû, tengmán ri ga sàksé hkâm nyi akô. gâ ri.

Yubàk Dàp É Myiwe Rayùq, Yesuq Lé Xû But Byî É Hkyô

36Hparishe rayùq gi, Yesuq lé yhâng chyáng zang zo râ matú ji kat ri. Haû mù, Yesuq gi, haû Hparishe é yhûm má wàng luî zo râ matú zung tô ri. 37Haú hkûn, wú keq, haú wâ mâ é yubàk dàp é myiwe rayùq gi, Yesuq haû Hparishe é yhûm má zô zung tô é lé sé jáng, gyai hpaudap é namngón xû bo é lùq hpyû bòng yu lé luî, 38Yesuq é nùnghtáng hkyî wàng má ngau yàp to mù, Yhâng é hkyî má ngaùbyî èq záng lhoqteq byi jáng, uxâm èq bùt sut pyám byî ri. Dum nghut jáng, nhut èq puq luî mura lé bùt byî ri.

39Yesuq lé ji é Hparishe hpó gi, haú lé myàng jáng, “Shí yùq myìqhtoi nghut le gi, Yhang lé záng htûng é sû, ó yùq nghut é eq hkâsû é yubàk dàp é myiwe nghut é lé, Yhang sé râ nghut lhê.” ga luî, yhâng é ûnghkaû má myìt nyi ri.

40Yesuq gi, “Simun ê, Ngò, nang lé taí râ rajung jòq ri.” ga taî ri.

Simun le, “Sará ê, taí aq.” ga taî kat ri.

41Haú hkûn, Yesuq gi, “Ngùn chyi zo sû rayùq chyáng, chyîn dàp é byù í yùq nyi ri. Rayùq gi, denari#7:41 Denari rachap gi, ra-nyí lhê é byù rayùq é zuihpau eq wuí ri. ngo shô chap, rayùq gi, ngo xê chap dàp ri. 42Haú nhik gi, chyîn xap râ ngùn a wó kôluî, chyîn yhûmsîng gi, yhángnhik lé xap a ra lo gâ pyâm ri. Haû mù luî, haú nhik mâ é hká yùq gi, yhang lé je chyitdàp râ lhú?” ga myî ri.

43Simun gi, “Je myo lhoqlhut hui sû, nghut râ su ngam ri.” ga tû taî ri.

Yesuq gi, “Nàng myìt é dông jô ri.” ga taî ri.

44Haú hkûn, Yesuq, myiwe zo haû lé lhing wú luî, Simun lé, “Nàng myiwe zo shî lé myang lhê lhú? Ngò, náng é yhûm má wang le, hkyî chi râ ûchyam, nàng a byi, yhang kúm gi, ngaùbyî èq ngá hkyî lé tik byi luî, yhâng é xam èq sut pyám byi bê. 45Nàng gi, ngo lé nhut èq a puq nghut ri; yhang kúm gi, ngò yhúmhkaû má wang é mai ngá hkyî má a no loshoq puq nyi ri. 46Nàng gi, ngá ulhum má xû a bùt byî wú, yhang kúm gi, ngá é hkyî má namngón é mura bùt byi bê nghut ri. 47Haû su mù, ngò, nàng lé taí lé, haû myiwe gi, je chyitdàp luî, yhang wó é yubàk myo myo lé hkyut pyám byî é hui bê. Shau za mara hkyut pyám byî é hui sû gi, shau za chyitdàp sû nghut ri.” ga taî ri.

48Yesuq gi, myiwe haú lé le, “Ngò, náng é yubàk mara hkyut pyám byi bê.” ga taî ri.

49Rahá zung tô é bang gi, “Yubàk mara lháng wó hkyut pyám byi sû, shí yùq gi, ó wá nghut lhê lhú?” ga luî, myìt nyi bum akô.

50Yesuq gi, “Náng é lùmjíng myìt èq nang lé hkyi yù bê, ngón za ló àq hkoi.” ga luî, myiwe haû lé taî kat ri.

Currently Selected:

Lukaq 7: znot

Highlight

Copy