Lukaq 8

Yesuq Htâng Châng É Myiwe Wuì

1Hau htâng hkâ-myháng a myáng má, Yesuq gi, Garai Gasâng é mîngdán hkyô eq sêng é gabú danglù lé taî kyo uchyang, Yhâng é lagyo raxe í yùq eq rahá za, rawà htâng rawà jé e ló ri. 2Hau htoq agó, nàt gang dàp é mai le, nòhpyo mai le Yesuq èq lhoqge yu é myiwe wuì, nàt nyhit nàt lhoqhtoq pyám byi huî é, Magadalaq wà mâ é Mariq le, 3Herot é i-kun zùm sû Kuza é yhûmsîng myhí Yo‑anaq le, Susannaq le, gótû myiwe wuì myo myo le, Yesuq eq rahá nghut akô. Haú bang gi, yhûmsîng wó du é í Yesuq eq lagyô pé lé byi zo byi huq nyi akô.

Kyôshi Sân É Hkyô

Mht 13:1-23; Mrk 4:1-20

4Wà hkang wà mó mâ é bang gi, Yesuq chyáng zùp zîng lé lo bùm kômù shiwa byù mòqmó zùp míng tô é hkûn, Yesuq dangtú dông taî kyô é gi, 5“Kyô hkyó sû rayùq gi, kyôshi san râ ga htoq e ló ri. Yhang, kyôshi sân kat é hkûn, ra-am gi, hkyô má gyó ang mù, byu èq záng nâng pyeq pyâm lhê, maulat nghoq pê èq hte zô pyâm lhê dùt ri. 6Ra-am gi, lùqgòk yò má gyó ang mù, yùq htoq lo é hkûn, myigùng a teq é yánmai nyhuî shi byùq akô. 7Ra-am gi, zugyóm hkaû má gyó ang luî, zubyap eq rahá yùq htoq lô mù, wùp pyâm é hui bê nghut ri. 8Nghut kôlhang, ra-am gi, myìhpún bo é jang má gyó ang mù, yùq kô lò jáng, rashô tú myô jàt lo ri.” ga taî ri.

Yhang haû su ga taî nyi é hkûn, “Gyô yù râ nohkyap dàp sû gi, gyô yù sháng gàq!” ga le, htê mó èq taî kat ri.

9Haú hkûn, Yhâng é chángzô pé gi, dangtú shî hai lichyúm nghut lhê lhú ga, Yhang lé myî akô. 10Yhang gi, “Garai Gasâng é mîngdán eq sêng é sê gyo wuî é hkyô pé lé sê gyo râ ahko ahkáng, núngmòq lé byî to bê. Nghut kôlhang, góbâng matú gi,

‘Wú to kôlhang, a myàng kó sháng,

gyô nyì kôlhang, a sê gyo kó sháng.’#Esai 6:9

nghû, ngò dangtú dông taî lhê.

11Ahkui lhê é dangtú shi é lichyúm gi, îsu nghut ri: kyôshi gi, Garai Gasâng é mungdang nghut nyi lhê. 12Hkyô má gyó âng é kyôshi gi, haî eq wuí lhê lhú gâ le, haû mungdang lé byu pé wó gyô é htâng má, lùmjíng é má le, hkyi yu é má le, a jé kó sháng gàq ga luî, yhángmòq é i‑myìt hkaû mai nàt Tsádán èq mungdang haû lé, lé yu pyâm é hui bang eq wuí lhê. 13Lùqgòk yò pé má gyó âng é kyôshi gi, haî eq wuí lhê lhú gâ le, haû mungdang lé wó gyo jáng, gabú myìt èq hàp yù kôlhang, a-myìt a wó chín mù, rayòq rabun za lùmjíng luî, gúnglaú huî é nyí má, dum yhik ló byùq é bang eq wuí lhê. 14Zugyóm má gyó âng é kyôshi gi, haî eq wuí lhê lhú gâ le, haû mungdang lé gyô yù luî, yhûmsing é chyungxe dui e ló é hkyô má, shí i-pyàt lhê é myìt wui myìt hke hkyô, ngùn zè sùtgan eq mingkan ngón hkyô má myùp byùq luî, mo é ashi a zuî é bang eq wuí lhê. 15Hpún bo é myigùng má gyó é kyôshi kúm gi, haî eq wuí lhê lhú gâ le, haû mungdang lé lhumzui luî ge é i‑myìt èq ban gyô yù mù, gingtíng shoq zuî zîng luî, wó jân é i‑myìt èq ashi zuî é bang eq wuí lhê.

Myibung Htûn É Hkyô

Mrk 4:21-25

16Myibung lé tap mù, aû èq nghop tô é le, yhupgyàp ô má tô tô é le, ó a kut wú kó. Nghut kôlhang, wang lé lô bang myòq wó myâng râ matú kúm gi, tsûngjang má tsung to to chyat kut akô. 17Hkâsu mù gâ le, a htoq zê loshoq haq tô é zè haî le a jòq, a sé a byông htoq loshoq wó zaú tô é zè le haî a jòq nghut ri. 18Haû mù luî, núngmòq hkâsu wó gyô yu é hkyô lé sidìq nyì keq, haî mù gâ le, wó to sû lé gi, jàt byi shirâ, a wó su chyáng mai kúm gi, yhang wó to bûn é mâ é lé lháng, yu pyám byi shirâ nghut lhê.” ga taî ri.

Yesuq É Yhâng Nu Eq Yhang Gû Pé

Mht 12:46-50; Mrk 3:31-35

19Haú hkûn, Yesuq é yhâng nu eq yhang gû pé gi, Yhâng chyáng lé lô kô le, shiwa byu pé lûm chyîn chyap to kômù, Yhâng chyáng a wó wang ê kó nghut ri. 20Haú hkûn, Yhang lé, “Náng nu eq nunggû pé gi, nang lé hui naû luî, shinggan má láng yàp bum akô.” ga taî kyô akô.

21Yesuq gi, yhángmòq lé, “Garai Gasâng é mungdang lé gyô yù luî, châng é bang gi, Ngá nu eq Ngá gû pé nghut akô.” ga luî, yhángmòq lé tû taî kat ri.

Laìdun Mó Lé Yesuq Lhoqzîm É Hkyô

Mht 8:23-27; Mrk 4:35-41

22Ra-nyí lé, Yesuq gi, Yhâng é chángzô pé lé, “Ngá-nhúng nhông he hpoq shut dàp e ló sháng.” ga taí luî, lhaî má wàng mù gû dàp e ló akô. 23Yhángmòq gû dàp e ló é hkûn lé, Yesuq gi, yhup myhî tô ri. Haú u lé, nhông haú má laìdun mó lò luî, lhaî má wuì byíng lô mù, yhángmòq myùp shî râ su dùt lò nyì bekô nghut ri.

24Haû mù, yhángmòq gi, Yesuq chyáng huî ê luî, Yhang lé nhaû pun mù, “Yhûmsîng ê, Yhûmsîng ê, ngá-nhúng myùp ló nyi ri.” ga taî akô.

Haú hkûn, Yhang toq luî, laìdun eq wuìlhêng pé lé tân kat jáng, haú pé gi, zim za dùt ló byùq bê. 25Haû mù, Yesuq gi, “Núngmòq é lùmjíng myìt gi, hká má nghut akô lhú?” ga luî, yhángmòq lé myî ri.

Yhángmòq kúm gi, gyùq maú byùq bùm kôluî, “Shí yùq gi, hkâsû é byù nghut lhê lhâ? Yhang hkunmó hkyó jáng, laì eq wuìlhêng pé lháng gyo byî rî-nhung!” ga luî, rayùq eq rayùq myî lhûm bum akô nghut ri.

Nàt Lé Hkat Htoq Byî É Hkyô

Mht 8:28-34; Mrk 5:1-20

26Hau htâng, yhángmòq gi, Galile mau tû-tap mâ é Gerase byu pê é mau má jé dàp e ló bekô. 27Yesuq kong shut dòq ló le, haú wâ mâ é nàt gang dàp é sû rayùq gi, Yhang lé lé huî ri. Haú yùq gi, yhûm má le a nyi é za, mèbu a dàp é, lùpdùng má myáng myáng nyi nyì sû nghut ri. 28Haú yùq gi, Yesuq lé myàng jáng, wùt garu luî, yhâng é hkyîwang má paî gòp to mù, “Myhang htâng é Garaî Yhangzo Yesuq ê, Nàng gi, ngò eq haî séng lhê lhú? Ngo lé a zing-ri râ matú, ngò nang lé dûng nyi lhê.” ga luî, htê mó èq taî garû nyi ri. 29Hkâsu mù gâ le, Yesuq gi, agè ashop é nàt lé haú yùq gùng mai htoq ló râ matú, tân pyâm é yánmai nghut ri. Byù haú yùq lé nàt gâng èq adàm dàm wang júng hkangmó, lòq eq hkyî má toqjâng tuî èq tuî shung, kyum xâng tô é eq, zúng tô é nghut kôlhang, lâng hpyit pyám pyám kut é htoq agó, nàt gâng èq yhang lé yòso hkaû shut lângmhàp yù yù kut nyi ri.

30Yesuq gi, yhang lé, “Náng myîng haî gâ lhê?” ga myî kat é hkûn, yhang gi, “Legi‑o#8:30 Legi‑o gâ é gi, gyèzo 4000 eq 6000 gyoro bo é gyèdap lé taî é nghut lhê. gâ lhê.” ga tû taî ri. Haî mù gâ le, yhâng chyáng nàt gang myo myo wang lúng tô é yánmai nghut ri. 31Nàt jùm gi, yhángmòq lé nìk dik htûm é Lasang-dong shut a kôn kat râ matú, Yesuq lé chôm dûng nyi bum akô.

32Haú u lé, wàq rajùm mó gi, bùm yàm má dû bùt zô nyi bum akô nghut ri. Haû mù, yhángmòq gi, wàq pê chyáng wàng nhâng làq ga, Yesuq lé ahkáng dum dung dung kut kôjáng, Yesuq gi, yhángmòq lé ahkáng byî kat ri. 33Haû mù luî, nàt gang jùm gi, byù haú yùq chyáng mai htoq ló kôluî, wàq pê chyáng wàng byùq bekô nghut ri. Haú hkûn, wàq haú jûm gi, gampyoq mai nhông hkaû shut rùt din yán wang ló kôluî, myùp shi byùq bekô nghut ri.

34Wàq zúng bang gi, haû su dùt é lé myàng jáng, hpang din ló kômù, wà mó hkaû mâ é bang eq awui ayàm mâ é bang lé ló taî kyô akô nghut ri. 35Haû mù, wó gyô é bang gi, haú hkyô lé wú râ matú htoq lé lo akô. Yhángmòq gi, Yesuq chyáng jé lé kô é hkûn, nàt gang htoq byùq hui sû, Yesuq é hkyîwang má mèbu wùt to luî, byù gè rayùq su zung to láng é lé myàng kômù, gyùq dan bùm bekô nghut ri. 36Nàt dàp sû lé hkâsu kut luî lhoqge yu é hkyô lé myang é bang gi, góbang lé taî kyô akô nghut ri. 37Haú hkûn, Gerase byu pê é mau mâ é lhúnglhâng bang gi, gyùq dan dik kôluî, Yesuq lé yhángmòq é mau mai htoq ló byùq râ matú, chôm dûng tôngbán akô. Haû mù luî, Yesuq gi, taû ló byùq râ matú lhaî má wàng bê nghut ri.

38Nàt htoq byùq huî é sû gi, Yesuq htâng cháng râ matú, Yesuq lé dûng tôngbán ri. 39Nghut kôlhang, Yesuq gi, “Nàng, yhûm shut shèq ló mù, Garai Gasang, nang lé hkâ-í kut byi bê hkyô lé, ló taî kyo aq.” ga luî, yhang lé ló nhâng bê nghut ri. Haú hkûn, yhang htoq ló mù, Yesuq yhang lé hkâ-í kut byi bê hkyô lé, haú wâ rawa bang lé ló taî kyô ri.

Ya‑iruq É Yhang Zo Byìzô É Hkyô Eq, Yesuq É Bu Lé Lé Záng É Myiwe Rayùq É Hkyô

Mht 9:18-26; Mrk 5:21-43

40Ahkuî, Galile byu pé gi, Yesuq dum taû lò râ lé láng nyî kô é nghut mù, Yhang dum taû gû dàp lo é hkûn gabú myìt eq lhom te yu akô. 41Haú hkûn, Ya‑iruq gâ é târâjong má ùp sû rayùq gi, jé lé lô mù, Yesuq é hkyîwang má hkyîhput htuq luî, yhâng yhûm má lé râ matú ji nyi ri. 42Hkâsu mù gâ le, raxe í zân bò bê é, yhang zo byìzo te gi, shi ló nyi é yánmai nghut ri.

Haû mù, Yesuq châng e ló le, shiwa byu pé gi, Yhang lé záng htûng lo bum akô. 43Haú u lé, raxe í zân sui yuî luî ngùnzè lhúnglháng ban pyám shoq chi sará pê chyáng yâ wú kôlhang, hká yùq le a wó yâ gè byî é#8:43 Ngùnzè lhúnglháng ban pyám shoq chi sará pê chyáng yâ wú kôlhang, hká yùq le a wó yâ gè byi gâ é, Chyúmdang ra-am má gi, bo lhê; ra-am má gi, a bò. myiwe myhí rayùq le haú hkaû má bo tô ri. 44Myiwe haû gi, Yesuq é nùnghtáng má huî lé mù, Yhâng é bushi htâng má ê záng kat eq, suí yui é nòlì gi, ge byùq bê nghut ri.

45Haú hkûn, Yesuq gi, “Ngo lé, ó yùq záng bê lhú?” ga luî myi jáng, lhúnglhâng bang gi, a sé ga he nyi bùm kô é hkûn lé, Petiruq gi, “Yhûmsîng ê, shiwa byu pé gi, náng é lhînghkyùq mai náng chyáng chyîn chyap wang lo bùm kô é yánmai, nang lé záng bekô râ nghut lhê?” ga taî ri.

46Yesuq gi, “Byù rayùq ngo lé lé záng mù, ngá chyáng mâ é hpungwup a-tsam htoq ló é lé, ngò châng sê kat ri.” ga taî ri.

47Haû jáng, myiwe myhí haû gi, yhang a wó haq zaú to lô é hkyô lé sé jáng, rèq rèq nán lé lô mù, Yesuq é hkyîwang má ngóm gòp kat luî, haî mù Yhang lé záng é hkyô eq, hká dông ge ló byùq é hkyô pé lé, shiwa byù bànshoq bâng é hí má Yesuq lé taî kyô nyi ri. 48Yesuq gi, “Ngá zo ê, náng é lùmjíng myìt gi, nang lé lhoqgê byi bê nghut ri, ngón za ló àq hkoi!” ga luî, myiwe haû lé taî kat ri.

49Yesuq gi, dang ru taî nyi ashî hkûn, târâjong má ùp sû Ya‑iruq é yhûm mai byù rayùq jé lé lô luî, “Nungzo gi, shi byùq bê, haû sará lé hkâ lhoqhkyik nyî lo.” ga luî, Ya‑iruq lé taî kyô ri.

50Yesuq gi, dang haû lé wó gyo jáng, “Hkâgyùq, za lùmjíng aq, haû jáng, yhang ge byùq râ nghut lhê.” ga luî, Ya‑iruq lé taî ri.

51Yesuq gi, Ya‑iruq é yhûm má jé é hkûn lé, Petiruq, Yohan, Yakuq, eq haû myiwe zô é yhâng nu eq yhâng wa mai lai luî, yhûm haú má, ó lé le a wàng nhâng kut ri. 52Haú u lé, lhúnglhâng bang zoshâng hau é yánmai, ngaùbyi ngaùnhap èq yón nyi akô. Yesuq kúm gi, “Hkâ-ngaû kó, yhang shi byùq é a nghut, yhup myhî tô é shèq ru nghut lhê.” ga luî, yhángmòq lé taî ri.

53Zoshâng gi, shi byùq bê lé yhángmòq sé kôluî, yhángmòq gi, Yesuq lé wuìzuì kut pyám byî akô. 54Yhang kúm gi, myiwe zo hau é lòq má zuî to mù, “Zoshâng ê, toq àq.” ga taî kat ri. 55Haû mù luî, yhâng sô dum taû wàng mù, haú hkûn jáng toq yàp ri. Haû jáng, Yesuq gi, zoshâng haû lé zôjung byi keq, ga yhángmòq lé taî kat ri. 56Haû myiwe zô é yhâng nu eq yhâng wâ nhik gi, gyai maú byùq akô. Nghut kôlhang, Yesuq gi, haû dùt é hkyô ó lé le a taî kyo râ matú, yhángnhik lé taî hkûm tô ri.

Currently Selected:

Lukaq 8: znot

Highlight

Copy