Lukaq 6

Bánno Buìnyì Má, Yesuq É Chángzô Pé Kyôshi Shap Zô É Hkyô

Mht 12:1-8; Mrk 2:23-28

1Bánno Buìnyì ra-nyí má, Yesuq gi, Yhâng é chángzô pé eq yò hkaû mai sô laî ló é hkûn, Yhâng é chángzô pé gi, kyôshi ra-tsuí lângshap yû mù, lòq èq ne hpuq zô akô. 2Haû mù luî, Hparishe pé ra-am gi, “Bánno Buìnyì má a ge kut jung lé, núngmòq gi, haî mù luî haû su kut akô lhú?” ga taî akô.

3Yesuq gi, yhángmòq lé, “Dawiq lháng gi, yhâng htâng châng é bang eq rahá zò-mut huî é hkûn, hkâsu kut é hkyô lé, núngmòq a nghap wú kó lhú? 4Dawiq gi, Garai Gasâng é yhûm#6:4 Garai Gasâng é yhûm nghu é gi, Yerusalem wà mó má jòq é sàksé zúm lé gâ é nghut lhê. hkaû má wang ê mù, hkyangjông pé mai lai luî, ó le a ge zô é, ting tô é mùk lé yù zo mù, yhâng htâng châng é bang lé le, byi tsô é a nghut kó lhú?” ga tû taî ri. 5Hau htâng, Yhang gi, “Haû Byu Yhangzo gi, haû Bánno Buìnyi é Yhûmsîng nghut lhê.” ga yhángmòq lé taî ri.

Lòq Jum Shî Sû Lé Yesuq Lhoqgê Byî É Hkyô

Mht 12:9-14; Mrk 3:1-6

6Gótû Bánno Buìnyì má le, Yesuq gi, târâjong má wàng mù mhoqshit nyi é hkûn, lòqyo lòq ajum shi byùq é byù rayùq haú má nyi tô ri. 7Haú hkûn, târâ sará pé eq Hparishe pé gi, Bánno Buìnyì má nòhpyo lhoqgê byi râ lhú ga luî, Yhang lé mara wó hûn shoq ga gyám wú nyi akô. 8Yesuq kúm gi, yhángmòq é i‑myìt lé sé sû nghut luî, lòq jum shî sû lé, “Toq mù, bànshoq bâng é hí má, toq yàp shit àq.” ga taî kat ri. Haú yùq le, toq mù yàp tô ri.

9Haú hkûn, Yesuq gi, “Ngò núngmòq lé myî wú kôlé, Bánno Buìnyì má, ge é múzó kut râ, a ge é múzó kut râ, byù chyungxe hkyî râ eq lhoqhten râ pé má hká lhum kut le shèq târâ wang lhê lhú?” ga luî, yhángmòq lé taî ri.

10Hau htâng má, yhángmòq bànshoq lé lhing wú mù, haû lòq jum shî sû lé “Náng é lòq nyhang kat àq.” ga taî kat é hkûn lé, yhang le lòq nyhang kat luî, yhâng é lòq gi, shoq za ge byùq bê nghut ri. 11Nghut kôlhang, yhángmòq gi, myòq chum nhô chik yhang nhik-yo naù kômù luî, “Yesuq lé hkâsu wá kut pyám râ lhú?” ga luî, rayùq eq rayùq taî lhûm nyi akô.

Raxe Í Yùq Lé Lagyo Ga Myhîng Yu É Hkyô

Mht 10:1-4; Mrk 3:13-19

12Haú yòq ra-nyí má, Yesuq gi, kyûdung râ ga bùm shut htoq e ló luî, ra-myin mau Garai Gasang lé kyûdûng nyi ri. 13Maubó jáng Yhâng é chángzô pé lé wùt yù mù, yhángmòq chyáng mâ é raxe í yùq lé hkyin yù luî, lagyô pé ga myhîng to byî ri. 14Haú bang gi, Yesuq èq Petiruq ga myìng myhíng byî é Simun eq, yhang gu Andire, Yakuq eq Yohan, Hpilip eq Barihtolume, 15Mahte eq Htomaq, Alahpe é yhang zo Yakuq eq Zelutuq#6:15 Zelutuq gâ é gi, yhûmsîng zui saî é hkyô má gyai yhang myìt lòm shîrong é sû lé gâ lhê. Haú u lé, Isira-elaq byu pé gi, mîngdán lùthkyô wó râ matú shi-kùt nyi é hpúng bang lé, Zelutuq gâ lhê. dùt é Simun, 16Yakuq é yhang zo Yudaq eq, Yesuq lé àp pyám râ sû Yudaq Isikarut pé nghut akô.

Hkungsô Wó É Hkyô Eq Dingnyé Wó É Hkyô

Mht 4:23-25, 5:1-12

17Yesuq gi, yhángmòq eq rahá gyó ló mù, janggyú má yàp tô é hkûn; Yhâng é chángzo mòqmó le mù, Yuda mau bànshoq mâ é bang, Yerusalem wà mó mâ é bang, wuìshuq lung-aû ayàm mâ é Turuq wà mó eq Sidon wà mó mâ é bang, rajùm rayò gi, 18Yhâng é dang gyô yù râ eq yhángmòq é nòhpyo lhoqgê nhâng râ matú, rahá za zùp míng tô akô. Agè ashop é nàt èq zing-ri huî é bang le ge byùq akô. 19Yhâng é gùng mai htoq é wum-ô èq byù bànshoq lé lhoqgê byî nyi é yánmai shiwa byu pé le Yhang lé wó záng shoq ga, ho nyi akô.

20Haú hkûn, Yesuq gi, Yhâng é chángzô pé lé wú kat luî taî é gi,

“Myùng bang núngmòq gi, hkungsô wó nyi ri, hkâsu mù gâ le, Garai Gasâng é mîngdán#6:20 Garai Gasâng é mîngdán gâ é gi, Garai Gasang ùp é lé gâ lhê. gi, núngmòq é mîngdán nghut nyi ri.

21Ahkuî, zò-mut wuìshit huî nyi é bang núngmòq gi, hkungsô wó nyi ri, hkâsu mù gâ le, núngmòq nhik dìk shoq myàng zo kôrâ nghut lhê.

Ahkuî, ngau nyì bang núngmòq gi, hkungsô wó nyi ri, hkâsu mù gâ le, núngmòq myang wuì kôrâ nghut lhê.

22Haû Byu Yhangzô é yánmai núngmòq lé su èq a nguì é, lhoqhpyoq lhoqkâng é, hoq hpu nhang é,

agè ashop nghut é dông jihpoi gamhkui huî é hkûn, núngmòq gi, hkungsô wó nyi ri.

23Haú hkûn lé, gabú byam chyû nyì keq, hkâsu mù gâ le, wú keq, núngmòq é matú kô é chyûnghuq gi, mauhkûng mîngdán má jòq tô ri. Ngò, núngmòq lé taî lhê, hkâsu mù gâ le, yhángmòq é îchyí îwâ pé le myìqhtoî pé#6:23 Myìqhtoî pé le zing-ri huî é yánmai, yhángmòq chyûnghuq wó nyi akô. Haû eq rajung za, jamjau huî é bang ngá-nhúng le chyûnghuq wó râ nghut lhê. lé haû su kut wú bekô.

24Nghut kôlhang, sùt wó bang núngmòq gi, dingnyé wó râ, hkâsu mù gâ le, núngmòq gi, yhûmsing gùng má nhik shî nhik dìk é hkyô lé huî yù bekô.

25Ahkuî, gyi gyi dau dau myàng zo myàng shuq nyi é bang núngmòq gi, dingnyé wó râ, hkâsu mù gâ le, núngmòq zò-mut wuìshit é hui kôrâ nghut lhê.

Ahkuî, wui nyi é bang núngmòq gi, dingnyé wó râ, hkâsu mù gâ le, iyon yôn é eq ngaùbyi ngaùnhap htoq é hui kôrâ nghut lhê.

26Byù bànshoq bang, núngmòq lé ge é byù ga kôjáng, núngmòq gi, dingnyé wó râ,

hkâsu mù gâ le, yhángmòq é îchyí îwâ pé le, myìqhtoi pyoq pé#6:26 Myìqhtoi pyoq pé gi, Garai Gasang jéyáng é hui râ. lé, haû su ga taî wú bekô.

Gyè Pé Lé Chyitdàp Râ Hkyô

Mht 5:38-48, 7:12

27Hau htoq agó, ngá dang gyô nyì bang núngmòq lé ngò taí kôlé, núngmòq é gyè pé lé chyitdàp nyì keq; núngmòq lé a naù a wôm é bang lé ge é hkyô kut keq; 28núngmòq lé nhîng é bang lé, shimân byi keq; núngmòq lé rhoi é bang lé kyûdung byi keq. 29Nang lé bo-pyuq rahkyam shut pyuq byi sû lé, rahkyam dum hkâm byi shi aq; náng bumó hkyut yu é sû lé, buzo le dum hkyut byi shi aq; 30nang lé rajung jung dûng é sû lé le, byî pyám aq; náng zè yu pyám byî é su chyáng mai le, hkâdûng yù lo. 31Núngmòq ô nau é dông supé lé kut nhâng nau é su, yhángmòq lé le kut byi keq.

32Núngmòq lé chyitdàp é bang lé za chyitdàp kô le gi, núngmòq é matú hai a-kyû bò kôrâ lhú? Yubàk dàp bang le, yhûmsîng lé chyitdàp é bang lé gi, chyitdàp nyi akô. 33Núngmòq lé ge é dông kut nyi é bang lé za, ge é dông kut nyî kô le gi, núngmòq é matú hai a-kyû bò kôrâ lhú? Yubàk dàp bang le haû su kut nyi akô. 34Supé lé zè chyi byî le, dum wó tau byi râ su dùt é bang lé za, chyi byî le gi, núngmòq é matú hai a-kyû bò kôrâ lhú? Yubàk dàp bang lháng chyi byî é myhó dum wó yû shoq, yubàk dàp é bang lé chyi byî akô. 35Nghut kôlhang, núngmòq gi, núngmòq é gye pé lé chyitdàp mù, ge é dông kut byî nyì keq. Dum wó taû yù râ lé myòq a byu é za, chyi ngho byi keq; haû su kut jáng, núngmòq wó é chyûnghuq ko râ eq, Myhang htáng htúm Su é yhang zô pé dùt râ nghut lhê; hkâsu mù gâ le, Yhang gi, jeju a dàt bun bang eq agè ashop é bang lé ge é kut nyi ri. 36Núngmòq é Îwa Garai Gasang shogyo nhikmyin sê é su, núngmòq le shogyo nhikmyîn nyì keq.

A Jéyáng Râ Hkyô

Mht 7:1-5

37A jéyáng é za nyì keq; haû jáng, núngmòq le jéyáng é a hui kôrâ nghut lhê. A dòqdân é za nyì keq; haû jáng, núngmòq le dòqdân é a hui kôrâ nghut lhê. Mara hkyut byi keq; haû jáng, núngmòq le mara hkyut byî é hui kôrâ nghut lhê. 38Byi keq, haû jáng, núngmòq le dum byî é hui kôrâ nghut lhê. Mán é bùng mai byíng muî shûn shoq nhûn chyîng, dûn chying kat mù, núngmòq é tanghkoí hkaû má lìk kat byî é hui kôrâ. Hkâsu mù gâ le, núngmòq lìk byî é bung èq, núngmòq lé dum lìk byi râ nghut lhê.” gâ ri.

39Hau htoq agó, Yhang dangtú ralhum dông yhángmòq lé dum taî é gi, “Myòqjìt sû gi, myòqjìt sû lé hkyô wó tûn shit lhê lhú? Yhángnhik í yùq é donghkong má byìt gyó kôrâ nghut lhê, a nghut kó lhú? 40Jongzo gi, sará htoq gyaú râ a nghut; nghut kôlhang, gúm shoq mhoq yû bê sû ó nghut kôlhang, yhûmsing é sará su dùt râ nghut lhê.

41Yhûmsing myòq hkaû má lúng tô é siktúm#6:41 Siktúm nghu é gi, yubàk mara kô é lé taî lhê. lé lháng a myìt wú é nhîng, haî mù luî, nunggu nungmâng é myòqwàng#6:41 Myòqwàng nghu e gi, yubàk mara a-tiq azo lé taî é nghut lhê. lé myang lhê lhú? 42Yhûmsing é myòq má lúng tô é siktúm lé lháng a myàng sû nhîng, ‘Gu-mang hpó ê, náng myòq má lúng tô é myòqwàng lé, ngò choq pyám byi lé.’ nghû luî, náng é gu-mang hpó lé hkâsu wó taí râ lhú? Gègùn labyoq kut sû ê, náng é myòq má lúng tô é siktúm lé hí choq pyám aq. Haû jáng shèq, nunggu nungmâng é myòq má wang tô é myòqwàng lé choq pyám byi râ matú, nàng san za myàng râ nghut lhê.

Agàm Eq Ashi

Mht 7:17-20, 12:34-35

43A ge é ashi zuî é, ge é shigâm hká má le a jòq. Ge é ashi zuî é, a ge é shigâm le a jòq. 44Haû mù luî, shigâm hkangmó lé, zuî é ashi lé wú mù wó sê hkyin yu lhê. Dangké, zubyap mai hkohúm-shi ó le a myang hpyoq yu wú, zugyóm mai le tsibyiq shi a wó hpyoq yu wú. 45Ge é sû gi, yhûmsing é i‑myìt ûnghkaû mâ é sùtdò mai ge é zè pé lé lhoqhtoq shit lhê. Agè ashop é sû gi, yhûmsing é i‑myìt ûnghkaû mâ é agè ashop é sùtdò mai, agè ashop é zè pé lé lhoqhtoq shit lhê. Hkasû mù gâ le, yhâng é i‑myìt ûnghkaû má byíng mui tô é lé za, yhâng é nhut mai taî htoq lo é nghut lhê.

Lùqhtân Htoq Má Yhûm Saí Sû Eq Myì Chîn Dum Má Yhûm Saí Su É Hkyô

Mht 7:24-27

46Ngò taî é eq rajung za lháng a wó châng kut kô é nhîng, haî mù luî, núngmòq Ngo lé ‘Yhûmsîng ê, Yhûmsîng ê.’ nghu nyi akô lhú? 47Ngá chyáng lé mù, ngá dang gyô yù luî, châng kut é sû ó nghut kôle, hkâsû é sû eq wuí é lé ngò núngmòq lé shit kyo kôle. 48Haú yùq gi, wahpang yhûm saî le, nìk nìk du luî a dui é lunghtân htoq má a-pûn awang hi é sû eq wuí lhê. Wuì jê lò luî wuìbaù pê èq yhûm haû lé lo gùn kôlhang, ging ging tíng tíng saî to bê nghut luî, haû lé a wó gun nhún. 49Ngá dang gyô yù mù, a cháng sû gi, a-pûn awang a saî é za myì chîn dum má wahpang yhûm saí sû eq wuí nyi ri. Wuìbaù pê èq yhûm haû lé lo gun kat é eq, haú hkûn jáng, lêng gyòp byùq ri. Yhûm haû byòq htên byùq é gi, yù whuî a bò loshoq dùt byùq râ nghut lhê.” gâ ri.

Currently Selected:

Lukaq 6: znot

Highlight

Copy