Lukaq 12

Gègùn Labyoq Kut É Bang Lé Sidìq Râ Hkyô

Mht 10:28-33, 12:32, 10:19-20

1Haú u, byù hkyîng mun zùp zîng lò mù, rayùq eq rayùq lháng záng nâng lhum shoq dùt nyi é hkûn, Yesuq, Yhâng é chángzô pé lé taî hi é gi, “Gègùn labyoq kut é Hparishe pê é múnchi lé koi sidìq pyám keq. 2A byông htoq loshoq wó zaú nghop tô é, haî le a jòq râ nghut lhê; a sé loshoq wó haq tô é le, haî a jòq râ nghut lhê. 3Haû mù luî, núngmòq, mauchut hkaû má haq taî é dang bànshoq lé, myòq myàng maubó má wó gyô bùm kôrâ nghut lhê. Wàp hkaû má, dangsoq soq é lé le, yhûmhkûng htoq mai taî pyo bùm bekô râ nghut lhê.

4Ngá buìnùm wuì ê, Ngò, núngmòq lé taí kôlé, gùngdu lé za wó sat pyám mù, sô lé haî le a wó kut é bang lé, hkâgyùq kó. 5Nghut kôlhang, núngmòq ó lé za gyùq râ é lé gi, Ngò, núngmòq lé taî kyo kôlé, gùngdu lé sat pyâm é htâng má, sô lé ngaraî ming shut wó hkyô kat pyâm é a-tsam wó sû lé kúm gi, gyùq keq. Nghut bê, Ngò, núngmòq lé taí kôlé, haú yùq lé za, gyùq nyì keq. 6Jòhkyáng ngo du lé, gyi htingchap í chap èq wó ûng pyâm lhê a nghut kó lhú? Haû jòhkyáng radu lé lháng, Garai Gasang gi, tô-myhî pyâm é a nghut. 7Garai Gasang gi, núngmòq é ulhum mâ é xâm bànshoq lé lháng, nghap to gù nghut lhê. Haû mù, hkâgyùq kó; núngmòq gi, haû jòhkyáng myo myô htoq má lháng gù je bo é bang nghut lhê.

8Ngò, núngmòq lé taí kôlé, byu pê hí má Ngo lé lhom yín yu é sû ó yùq nghut kôle, Garai Gasâng é maumang lagyô pê é hí má, haû Byu Yhangzo gi, haú yùq lé lhom yín yû râ nghut lhê. 9Nghut kôlhang, byu pê é hí má Ngo lé he-ngìk pyâm é sû lé kúm gi, Garai Gasâng é maumang lagyô pê é hí má, he-ngìk pyám râ nghut lhê. 10Haû Byu Yhangzo lé dang dông shut é sû gi, mara hkyut byî é wó hui ra nghut lhê; nghut kôlhang, haû Chyoiyúng Sô lé rhoî dang taí pyâm é sû gi, mara hkyut byî é hui râ a nghut.

11Byu pé núngmòq lé jéyáng râ matú târâjong pé má le, agyì sûwún wuî eq ahkáng ayá wó bâng é hí má le, shuî e ló kô é hkûn, hkâsu kut râ lé le, hkâsu nghû tû taí râ lé le, hkâ-myìt chiq kó. 12Hkâsu mù gâ le, haú u lé yhang, Chyoiyúng Sô gi, núngmòq hkâsu taí râ hkyô lé mhoqshit byi râ nghut lhê.” ga taî ri.

Hpàqchyî A Bo É Sahtê Hpó Lé Dangtú Yu É Hkyô

13Haú hkûn, shiwa hpúng hkaû mai, byù rayùq gi, “Sará ê, ngá-nhik tâng wó é muìzè pé lé chôm gam lhum râ matú, ngá mang lé bo taí byi laq.” ga luî, Yesuq lé taî ri.

14Yesuq gi, “Byù nàng ê, núngnhik tang é ahtoq má târâ agyì kut luî, i-kun zè gàm byi râ gi, ngo lé ó hkyin tô é lhú?” ga luî, yhang lé tû taî ri. 15Yesuq yhángmòq lé taî é gi, “Myòqnòq é hkyô bànshoq mai, núngmòq é i‑myìt lé hkûm zìng luî, koi sidìq nyì keq. Hkâsu mù gâ le, byu é chyungxe gi, agùn agó é sùtzè má bo é a nghut.” gâ ri.

16Dangtú ralhum dông mai le, yhángmòq lé Yesuq taî é gi, “Sahtê rayùq gi, yhâng é yò pé má gùqzò muilhum gyai já ri. 17Haû mù luî, yhâng é ûnghkaû má myìt é gi, ‘Ngò hkâsu kut wú râ lhí? Ngá é gùqzò muilhum pé lé kat to râ jowò a wó lo dùt to bê.’ gâ ri.

18Dum nghut jáng, yhang gi, ‘Ngò îsu kut wú râ âbe, ngá é chyî xau pé lé hpyoq pyám luî, je kô é chyî pé lé saí râ nghut lhê. Chyî haú pé má ngá é gùqzò muilhum pé eq sùtzè bànshoq lé, tsîng kat to luî, 19ngá é i‑myìt lé îsu nghû taí râ, “I-myìt ê, zànwut myáng myáng é matú, zè gè myo myo ngò tsîng to bê. I‑myìt nàng zim za kut nyì àq hkoi. Zo mù, shuq mù, ngón ngón nyì àq.” ga’ gâ ri.

20Nghut kôlhang, Garai Gasang gi, ‘Byù gò ê, náng é chyungxe lé, hkû-myîn yhang, wùp yu pyám byî é nghut jáng, nàng tsing hkong tô é zè pé gi, ó yùq é matú dùt râ lhú?’ ga luî, yhang lé taî ri.

21Haû eq rajung za, yhûmsing é matú sùtzè hkong to mù luî, Garai Gasâng é hí má myung nyì sû gi, haú yùq su nghut râ nghut lhê.” gâ ri.

Myìt A Chiq É Za Garai Lé Lùmjíng Râ Hkyô

Mht 6:25-34

22Yesuq, Yhâng é chángzô pé lé dum taî é gi, “Haû mù luî, Ngò, núngmòq lé taí kôlé, núngmòq é chyungxê é matú haî zo haî shuq râ eq núngmòq é gùngdû matú haî wùt haî tsang râ lé, hkâ-myìt chiq kó. 23Chyungxe gi, zoshuq htoq má, gùngdu gi, mèbû htoq má, je ahkyàk lhê. 24Nghoqnòq pê é hkyô lé myìt wú keq; yhángmòq gi, kyô hkyó kyô shu a kut kó; gùqchyî eq sùtdò le a wó kó, nghut kôlhang, Garai Gasang gi, yhángmòq lé, byi tso byi huq nyi lhê. Núngmòq gi, nghoq haú pê htoq má je riyhang hpaudap nyi lhê a nghut kó lhú? 25Núngmòq má, ó yùq wá, myìt chiq é èq, yhûmsing é chyungxe lé radúng kô wó jàt yù kôrâ lhú? 26Haû su mù luî, tiq dik é hkyô lé lháng, núngmòq a wó kut kô é nhîng, haî mù luî gótû hkyô pé lé, myìt myô nyi akô lhú?

27Htutbó ban#12:27 Htutbó ban gi, yúng dik é yòsô ban nghut lhê. pé hkâsu kut kô lo é lé, myìt wú keq. Haú pé gi, mû le a zui, hkyîng le a duì kó nghut ri. Nghut kôlhang, Ngò, núngmòq lé taî kyo kôlé, Hkóhkâm Sholumon hpung kô dik u lé wùt é mèbu lháng, ban haû rabó lé a hkyit nghut ri. 28Lùmjíng myìt tiq é bang ê, hkû-nyí jòq mù, nàpmá myihkyóm má dú kat pyám hui râ nghut é yòsô mhan pé lé za lháng, Garai Gasang haû su kut hut é nghut le gi, núngmòq lé, je riyhang hut râ a nghut kó lhú? 29Núngmòq gi, haî zo haî shuq râ lé hkâho nyì kó; haû eq séng luî lé hkâ-myìt chiq nyî kó. 30Hkâsu mù gâ le, Garai Gasang lé a sé bang gi, haú hkyô bànshoq lé châng hkat ho nyi akô; nghut kôlhang, núngmòq é Îwa Garai Gasang gi, haú pé lé núngmòq râ é hkyô, sé byî nyi lhê. 31Núngmòq kúm gi, Yhâng é mîngdán lé ho nyì keq, haû jáng, haú pé, núngmòq lé puq byi râ nghut lhê.

32Sau hpúng zô pé ê, hkâgyùq kó, hkâsu mù gâ le, núngmòq é Îwa Garai Gasang gi, Yhâng é mîngdán núngmòq lé byí nau nyi ri. 33Núngmòq wó é zè pé lé ûng pyám luî, myùng bang lé byi keq, yhûmsing é matú a dàt xau a dàt wôm é ngùnhtûng saí luî, hkau sû le a jé, manòt èq le a wó zô é sùtzè lé mauhkûng htoq má hkong to keq. 34Hkâsu mù gâ le, náng é sùtzè jòq jang má, náng é i‑myìt le jé nyî râ nghut lhê.

Yesuq Dum Jé Lé Lô Râ Hkyíng Lé Machyâ Nyî Râ Hkyô

Mht 24:45-51

35Núngmòq gi, hpyihit hit luî (mú zui râ matú rì rì kut to keq), núngmòq é myibung lé tuq to mù, 36myiháng poî mai dum taû lò luî, hkúm lo kòk é, yhûmsîng hpó lé radá dâm hkum lhom wó hpông hâng yù shoq, láng tô é duìnhâng zoshâng wuì su kut nyî keq. 37Haû yhûmsîng jé lo le, machyâ nyì láng é duìnhâng zoshâng wuì gi, hkungsô wó nyi râ. Hkâsu mù gâ le, ngò, núngmòq lé teng za taí kôlé, haû yhûmsîng hpó gi, yhángmòq lé yùq zung to nhâng luî, yhang gi, duìnhâng zoshâng su hpyihit hit mù, saí tso saí huq râ nghut lhê. 38Gùnggàm yòq lé nghut kôlhang, wòq tûn hkûn lé nghut kôlhang, haû su kut machyâ nyi é lé, yhûmsîng hpó lo myang é nghut le gi, duìnhâng zoshâng haú bang hkungsô wó nyi ri. 39Yhûmsîng hpó rayùq, hká u má hkau sû lé lô râ lé, sê tô é ru nghut le gi, yhang machyâ nyì luî, yhâng yhûm lé a wó hput htong nhâng râ nghut é lé, bûn sê nyì keq. 40Haû mù, núngmòq le rì rì nghut nyî keq; hkâsu mù gâ le, haû Byu Yhangzo gi, a bûn nùng má jé lé lô râ nghut lhê.” gâ ri.

41Haú hkûn, Petiruq gi, “Yhûmsîng ê, dangtú shî gi, ngá-mòq lé za, taî é nghut lhê lhú? Haû a nghut jáng, lhúnglhâng bang lé taî é dông nghut lhê lhú?” ga myî ri.

42Haû jáng, Yesuq gi, “Lùm gíng é eq hpàqchyî bo é sùt zum sû gi, hká yùq nghut lhê lhú? Haú yùq gi, yhâng yhûmsing é duìnhâng zoshâng wuì lé ahkyíng jé jáng zoshuq gàm byi râ matú, yhûmsîng hpô èq hkyin to sû dùt râ nghut lhê. 43Yhûmsîng hpó dum taû lo é hkûn, haû su kut nyî láng é duìnhâng zoshâng gi, hkungsô wó nyi ri. 44Ngò, núngmòq lé teng za taí kôlé, yhûmsîng hpó haû gi, yhâng é sùtzè bànshoq, duìnhâng zoshâng haú yùq lé àp to râ nghut lhê. 45Nghut kôlhang, duìnhâng zoshâng haû gi, yhâng é i‑myìt ûnghkaû má, ‘Ngá é yhûmsîng hpó jé lô râ gyai myáng ashî.’ ga myìt pyám mù, duìnhâng zoshâng luzúm wuî myiwe, yùqgè lé nhuq bàt é eq, zo yê shuq yê î shuq wùt nyi é nghut jáng, 46duìnhâng zoshâng hau é yhûmsîng hpó gi, yhang a myòqbyu tô é buìnyì eq yhang a sê tô é ahkyíng má jé lô mù, yhang lé jàp pyám luî a lùmjíng bang eq rahá nyhi pyám râ nghut lhê.

47Yhûmsîng hpô é i‑myìt lé sê to kôlhang, yhang ô nau é dông a cháng, rì rì le a hen tô é duìnhâng zoshâng gi, yhâng yhûmsing èq nhuq bàt é lé, myo myo hui zo râ nghut lhê. 48Nghut kôlhang, a sé mù kut shut sû kúm gi, shau za bàt é hui râ nghut lhê. Haû eq rajung za, Garai Gasang gi, myo shoq wó yû su chyáng mai, myo shoq dûng yù râ nghut lhê. Myo myo àp byî tô é hui su chyáng mai, je myo shoq dum dûng yù râ nghut lhê.

Nguì ngón Nhâng Râ A Nghut, Lhoqkang Nhâng Râ Ru Nghut Lhê

Mht 10:34-36

49Ngò jé lé é gi, myigùng htoq má, myi nyé nhâng râ matú nghut lhê. Myi haû dàp to láng é nghut le gi, ngò ô nau é hkyô byíng jùp bê. 50Nghut kôlhang, ngò hkam yù râ é baptisima#12:50 Shî mâ é baptisima gi, Yesuq, ajung jung hpuzo mù shî hkâm é hkyô lé taî é nghut lhê. rajung jòq ashî, haû a hkam yù yù gi, ngò gyai yhang hkâm zo wuî nyi ri. 51Ngò jé lé é gi, myìdàm htoq má nguì ngón yùqyò hkyô byi râ matú nghut nhô ngam akô lhú? Haú dông a nghut, Ngò, núngmòq lé taí kôlé, byu pé lé lhoqpyô lhoqkang râ matú shèq ru nghut lhê. 52Haú su mù, ahkuî mai rayhûm za mâ é byù ngo yùq gi, rayùq eq rayùq yhángmòq yhangchang byòq gâng lhum mù, sum yuq ragàng, í yùq ragàng, í yùq ragàng, sum yuq ragàng dùt lo bùm bekô râ nghut lhê. 53Yhâng wa gi, yhâng é yùqzo eq, yùqzo gi, yhâng wa eq, yhâng nu gi, yhâng é byìzo eq, byìzo gi, yhâng nu eq, yhâng mhoí gi, yhâng dùmó eq, yhâng dùmó gi, yhâng mhoí eq kut, ngá é yánmai, rayùq eq rayùq byòq gâng lhûm bùm bekô râ nghut lhê.” ga taî ri.

Dùt Lò Râ Hkyo É Alhô Agàn Lé Sê Gam Hkoq Râ Lhê

Mht 16:2-3, 5:25-26

54Hau htâng shiwa byu pé lé, Yhang taî é gi, “Núngmòq gi, buìwàng hkyam shut mhut htup é lé myàng jáng, ‘Maú wo lò berâ.’ ga radá dâm lhaq taí taí mu akô, haû eq rajung za le, dùt lò lò mu ri. 55Dum nghut jáng, maupyî shut mâ é laì lo le, ‘Buì htân berâ.’ ga lhaq taí taí mu akô, haû eq rajung za le dùt lò lò mu ri. 56Gègùn labyoq kut bang ê, núngmòq gi, myigùng eq maúhkung é alhô agàn lé, sê gam hkoq yu nyi akô. Haû su nghut kô le nhîng, haî mù luî, shí i-pyàt mâ é alhô agàn lé gi, a sê gam hkoq dùt tô akô lhú?

57Haû eq rajung za, haî mù haû díngmán é hkyô lé yhûmsîng yhang yhang a wó dòqdân yù kô é lhú? 58Dangké, nang lé yui tsuq sû eq rahá, târâ agyì hpô chyáng e ló le, hkyô má yhang eq ngón shoq byìn hpyé huî yù àq. Haû a nghut jáng, yui yhûmsîng gi, nang lé târâ agyi chyáng ê dé pyám luî, târâ agyì gi, htóng hkyó su chyáng, nang lé àp pyám luî, yhang gi, nang lé htóng má lhûng pyám râ nghut lhê. 59Ngò, nang lé taí lé, yuichyîn haû a ban xap xap gi, htóng haû mai nàng wó htoq ló râ a nghut.” ga taî ri.

Currently Selected:

Lukaq 12: znot

Highlight

Copy