Lukaq 13

Myìt A Lhîng Jáng Shi Htên Byùq Râ

1Haú hkûn, haú má nyi é byù ra-am gi, mau zau Pilat èq Galile byù ra-am lé sat mù yhángmòq é sui eq yhángmòq sôdûn é hkungga lé nyhô pyâm é hkyô, Yesuq lé lé taî kyô akô. 2Yesuq gi, “Galile byù haú bang haû su kut hui zo kô é yánmai, yhángmòq gi, gótû Galile byu pé bànshoq htoq má, yubàk je myô akô nghû, núngmòq myìt ngam akô lhú? 3Haû su a nghut! Ngò, núngmòq lé taí kôlé, núngmòq le, myìt a lhîng kô é nghut le gi, bànshoq bang haû eq rajung za shi htên byùq kôrâ nghut lhê. 4Hau htoq agó, Silo-am wà mâ é mâchya gyòp gyó luî, nhê sat huî é byù raxe shit yùq gi, Yerusalem wà mó mâ é byù bànshoq bang htoq má mara je kô akô nghû, núngmòq myìt ngam nyi akô lhú? 5Haû su a nghut! Ngò, núngmòq lé taí kôlé, núngmòq le, myìt a lhîng kô é nghut le gi, bànshoq bang haû eq rajung za shi htên byùq kôrâ nghut lhê.” ga taî ri.

6Yesuq dangtú dông dum taî é gi, “Byù rayùq gi, yhâng é tsibyiq hkyâm má, hkohúm gâm ragàm hô tô ri. Yhang agàm haú má, ashi ê ho wú le, zuî tô é a myàng nghut ri. 7Haú hkûn, yhang gi, ‘Wú aq, ngò sum zân yhang hkohúm gâm haú má ashi ê ho wú le, a myàng nghut ri; haú lé htuq pyám aq. Haî mù, maumyî aha agó kut yùq nhang tô lhê lhú?’ ga luî, tsibyiq hkyâm zúng sû lé taî ri.

8Hkyâm zúng sû gi, ‘Yhûmsîng ê, hkûzân za gi, yùq tô wú shi sháng gàq, shigâm hau é lhînghkyùq má ngò dû lhîng to mù, myìhpún kat luî bóm byî wú shirâ. 9Htang zàn má ashi zuî é nghut le gi, yùq to sháng gàq, ashi a zuî é nghut le kúm gi, htuq pyám râ nghut lhê.’ ga luî, hkyâm yhûmsîng lé tû taî ri.” gâ ri.

Bánno Buìnyì Má Gùng Lòq Hten Sû Lé, Lhoqgê Byî É Hkyô

10Bánno Buìnyì lé, Yesuq gi, târâjong ralhum má, mhoqshit nyi ri. 11Haú hkûn, haú má raxe shit zân yhang nàt dàp luî, gùng lòq lhoqhten huî é myiwe rayùq le nyi tô ri. Yhang gi, dàng ngóm luî, gùngdu ra-tsuí lháng a wó lhoqnyhâng lô é sû nghut ri. 12Yesuq gi, myiwe haû lé myàng jáng, yhâng chyáng wùt yù mù, “Myiwe myhí ê, nàng, nòhpyo mai gè berâ.” ga luî, 13yhâng é ahtoq má lòq ke byî ri. Haú hkûn jáng, myiwe haû gi, nyàng za dum wó yàp luî, Garai Gasang lé hkya-ôn nyi ri.

14Haû mù, Bánno Buìnyì lé, Yesuq nòhpyo lhoqgê byî é yánmai, târâjong má ùp sû gi, wú nhik-yo luî, “Mú wó zuî é buìnyì hkyuq nyí jòq tô le, buìnyì haú pé má, lé wó lhoqge yu lhê. Haû mù, Bánno Buìnyì má gi, hkâkut kó.” ga luî, shiwa byu pé lé taî kat ri.

15Haú hkûn, Yhûmsîng Yesuq gi, “Gègùn labyoq kut bang ê, núngmòq yùq hkangmó gi, Bánno Buìnyì lé, yhûmsing é no, loze pé lé, hkup mai hpông htoq yû mù ûchyam byi huq huq kut akô a nghut lhú? 16Haû nghut le gi, raxe shit zân gón Tsádán èq tuî to huî é, Abraham é yhang zo yhang shu myiwe zo shî lé, Bánno Buìnyì má Tsádán lòq mai, hkyut byi a gíng râ lhú?” ga tû taî ri.

17Haû su ga taí jáng, Yhang eq i‑myìt shai lhûm é bang bànshoq gi, hoq hpû byùq bum akô. Shiwa byù bànshoq bang kúm gi, Yhang kut é maúhpo amû bànshoq é yánmai, gabú nyi bùm bekô nghut ri.

Angshi Cham Eq Múnchi Dangké

Mht 13:31-33; Mrk 4:30-32

18Haú hkûn, Yesuq taî é gi, “Garai Gasâng é mîngdán gi, haî eq wuí lhê lhú? Ngò hai eq taî kê wú râ lhú? 19Haû gi, byù rayùq mai, yhâng é hkyâm má hô tô é angshi cham eq wuí ri. Angshi cham haû gi, yùq kô lò mù agàm mó dùt lò jáng, hau é akoq pé má, maulat nghoq zô pé wó zung nô yu akô.” gâ ri.

20Yhang dum xoq taî é gi, “Garai Gasâng é mîngdán lé, ngò hai eq taî kê wú râ lhú? 21Haû gi, myiwe zo rayùq èq súngsô mún sum bûng má yu nyhó luî, haú pé bànshoq lé wó lhoqdau nhang é múnchi eq wuí ri.” gâ ri.

Chyap É Hkúmdong

Mht 7:13-14, 21-23

22Hau htâng, Yesuq gi, Yerusalem wà mó shut laî e ló uchyang, rawà htâng rawà wàng mù, mhoqshit byî ri. 23Haú hkûn, byù rayùq gi, “Yhûmsîng ê, hkyi yu é hui râ bang gi, shau za nghut râ lhú?” ga luî, Yesuq lé myî ri.

24Yesuq gi, “Chyap é hkúmdong mai, Garai Gasâng é mîngdán má wó wâng shoq shi-kùt keq. Hkâsu mù gâ le, ngò, núngmòq lé taí kôlé, byù myo myo gi, wó wâng shoq ga shi-kùt wú kôrâ. Nghut kôlhang, a wó wâng kôrâ nghut lhê. 25Yhûmsîng hpó,#13:25 Yhûmsîng hpó gi, Garai nghut lhê. Yhûm gi, Garaî é mîngdán lé taî é nghut lhê. hkum toq myhî pyâm é htâng má shèq, núngmòq gi, hkúmdong hí má yàp to mù, hkum lé kòk uchyang, ‘Yhûmsîng ê, ngá-mòq lé hkum hpóng byi laq ô!’ ga luî, wùt dung jáng, haú yùq gi, ‘Núngmòq ó nghut é lé le, hkârâ é bang nghut é lé le, ngò a sé.’ ga tû taî râ nghut lhê.

26Haû jáng, núngmòq gi, ‘Ngá-mòq gi, nàng eq rahá zô wú shuq wú bê bang nghut lhê; ngá-mòq é wà hkyô pé má le, nàng mhoqshit byî wú bê nghut lhê.’ ga taí bekô râ.

27Nghut kôlhang, yhûmsîng hpó kúm gi, ‘Núngmòq ó nghut é lé le, hkârâ é bang nghut é lé le, ngò a sé. Agè ashop é dông kut é bang bànshoq ê, ngá chyáng mai gâng ló byùq keq.’ ga tû taî kat râ nghut lhê.

28Garai Gasâng é mîngdán má, Abraham, Isak, Yakup pé eq myìqhtoî pé bànshoq bang nyi to kô é lé, núngmòq wó myâng kôlhang, núngmòq gi, shinggan shut hkat pyâm é hui luî, haú jowò má ngaùbyi ngaùnhap eq zuì kyik kyik shoq hpuzô nyi bùm bekô râ nghut lhê. 29Haú hkûn, buìhtoq, buìwàng, maupyî, mautsûng mâ é mîngdán myo myo mai byu pé lé luî, Garai Gasâng é mîngdán zoshuq poî má myang zùng kôrâ nghut lhê. 30Haú hkûn, ahkuî htâng gyó nyî bang gi, hí bekô râ; ahkuî hî to bang gi, htâng gyó bekô râ.” ga luî, yhángmòq lé taî ri.

Yerusalem Wà Mó Eq Séng Luî, Yesuq Taî É Hkyô

31Haú u lé, Hparishe pé ra-am gi, Yesuq chyáng lé luî, “Shí jowò mai htoq ló byùq àq. Hkâsu mù gâ le, Herot gi, nang lé sat râ hen nyi ri.” ga luî, Yhang lé taî akô.

32Haû jáng, Yesuq gi, “‘Hkû-nyí, nàpmá,#13:32 Hkû-nyí, nàpmá gâ é gi, Yesuq mingkan htoq má mú zui râ ahkyíng lé taî é nghut lhê. ngò nàt gang hkat pyám luî, nò zo hpyo zo lhoqgê byi râ nghut lhê; sum nyí nghû râ buìnyì#13:32 Sum nyí nghû râ buìnyì gâ é gi, Yesuq mingkan htoq má mû ban zuî é buìnyì lé taî é nghut lhê. má shèq, ngá mû bàn râ nghut lhê.’ nghû luî, agè ashop é wàmhkui haû lé ló taî kyo keq. 33Haî wá dùt kôlhang, hkû-nyí, nàpmá, sânghpe-nyí, ngò gi, e ló râ dùt ashî. Hkâsu mù gâ le, myìqhtoî pé gi, Yerusalem wà mó mai lai luî gótû jowò má a shi wú kó nghut ri.

34Yerusalem ê, Yerusalem ê, myìqhtoî pé lé sat pyám pyám kut mù, náng chyáng nhang kat é bang lé, lùqgòk èq dú sat sat kut é wà mó nàng ê, wòqzìng gi, yhang zô pé lé, yhâng é dùng hkaû má tsîng lhûng yu é su, nungzô pé lé, Ngò hkâ-myhó dâm shuî tsîng yù naù kôlhang, nàng a dóng nghut ri. 35Wú keq, núngmòq é yhûm gi, núngmòq é matú chamchyuîyuì dùt pyâm to berâ nghut lhê; Ngò, núngmòq lé taí kôlé, ‘Yhûmsing é myìng mai jé lé lo é Sû gi, hkungsô wó nyî sháng gàq.’#Hkya-on 118:26 nghû, núngmòq a taí taí gi, Ngo lé wó myâng kôrâ a nghut lo.” ga luî, yhángmòq lé taî ri.

Currently Selected:

Lukaq 13: znot

Highlight

Copy