Lukaq 11

Yesuq Mhoqshit É Kyûdung Dang

Mht 6:9-13, 7:7-11

1Ra-nyí lé, Yesuq gi, jowò rawò má kyûdûng nyi ri. Yhang kyû ban dung jáng, Yhâng é chángzo rayùq gi, “Yhûmsîng ê, Yohan gi, yhâng é chángzô pé lé kyûdung râ hkyô mhoq byî é su, ngá-mòq lé le mhoq byi laq.” ga Yhang lé taî ri.

2Haú hkûn, Yhang gi, “Núngmòq kyûdûng le,

‘Mauhkûng htoq tsáng myhâng mâ é ngá-mòq é Âwa ê,

Náng é myìng gi, chyoiyúng nyî sháng gàq.

Náng é mîngdán jé lô sháng gàq.

3Ngá-mòq nyí wuî râ é zoshuq lé, ngá-mòq lé nyí wuî byi laq.

4Ngá-mòq lé shut é byù bànshoq bâng é mara lé, ngá-mòq hkyut pyám byî é yánmai, ngá-mòq é mara lé le hkyut pyám byi laq.

Ngá-mòq lé, agúng alaú hkyô má hkâwâng nhâng.’

nghû keq.” ga luî, yhángmòq lé mhoqshit ri.

5Yesuq yhángmòq lé dum taî é gi, “Dangké, núngmòq chyáng mâ é rayùq sû gi, buìnùm wó é nghû sháng, yhang gi, gùnggàm yòq má haú yùq chyáng ê luî, ‘Buìnùm hpó ê, ngo lé mùk sûm long byam chyi byî kat làq, 6haî mù gâ le, ngá buìnùm rayùq byìn we mai ngá chyáng jé nyi tô ri. Ngò gi, yhang lé byi tso râ haî le a jòq byam dùt tô ri.’ ga taî é hkûn, 7yhúmhkaû shut mâ é sû gi, ‘Ngo lé, hkâlé lhoqhkyik lo, hkum le myhî pyám bê, ngá zoshâng wuì le ngò eq rahá yhupjang má yhup to bekô. Ngò, nang lé haî le a wó toq yû byi lo.’ ga tû kat ri. 8Ngò, núngmòq lé taí kôlé, buìnùm nghut é yánmai za gi, mùk a kâm toq byi lo kôlhang, zùq zùq dûng nyi é yánmai, haú yùq lé, yhang ra châ é bànshoq toq yû byi râ nghut lhê.

9Haû mù, ngò, núngmòq lé dum taí kôlé, dung keq, haû jáng, núngmòq lé byi râ nghut lhê; hô keq, haû jáng, núngmòq myàng kôrâ nghut lhê; hkum má kòk keq, haû jáng, núngmòq lé hpóng byi râ nghut lhê. 10Hkâsu mù gâ le, ó yùq nghut kôle, dung sû wó râ; hô sû myàng râ; hkum kòk sû lé gi, hpóng byi râ nghut lhê.

11Núngmòq îwâ pé má, ó yùq wá, yhûmsing yhang zo mùk dûng le, lùqgòk byi kôrâ lhú? Ngozo dûng le, lhângmuì byi kôrâ lhú? 12Wòq‑ú dûng le, gogok byi kôrâ lhú? 13Agè ashop é bang núngmòq lháng gi, núngmòq é zo wuî lé, ge é chyûnghuq dàt byi kô le nhîng, mauhkûng htoq tsáng myhâng mâ é núngmòq é Îwa gi, Yhang lé dûng é bang lé, je riyhang haû Chyoiyúng Sô byi râ nghut lhê.” ga taî ri.

Mara Hun É Dang Lé Yesuq Tû Taî É Hkyô

Mht 12:22-30, 43-45; Mrk 3:20-27

14Radàm lé, Yesuq gi, byù rayùq lé dang a wó nyô shoq kut tô é nàt gang lé, haú yùq chyáng mai hkat htoq pyâm ri. Nàt haû htoq ló byùq é htâng má, dang a wó nyô sû gi, dang wó nyo nyi é yánmai, byù mòqmó gi, chôm maú byùq bum akô. 15Nghut kôlhang, yhángmòq chyáng mâ é ra-am gi, “Yhang gi, nàt gâng pê é zau Bezebulaq é wum-o a-tsâm èq za, nàt gâng pé lé wó hkat pyâm é nghut ri.” ga taî bum akô nghut ri. 16Ra-am le, Yhang lé, mauhkûng mâ é alhô agàn tûn shit wú laq ga dûng chyam wú akô.#11:16 Byu pé gi, Yesuq lé Garai Gasang nhang kat é hkyô lé sàksé myàng naù luî, maúhpo alhô agàn dûng nyi akô.

17Yesuq kúm yhángmòq myìt nyi é hkyô lé sé mù taî é gi, “I-kun byòq é mîngdán hká lhum nghut kôle, htên byùq râ za nghut lhê; haû eq rajung za, i-kun byù yhangchang rayùq eq rayùq byòq lhûm é yhûm htu gi, byòq gâng lhum râ za nghut lhê. 18Nàt pé le yhángmòq yhangchang byòq gâng lhûm nyì kô é nghut le gi, Tsádán é mîngdán gi, hkâsu kut wó gîng to râ lhú? Ngò îsu nghû taî é gi, núngmòq ngo lé Bezebulaq é wum-o a-tsâm èq za, nàt gâng pé lé hkat pyâm rí ga kô é yánmai nghut lhê. 19Ngò gi, Bezebulaq é wum-ô èq za, nàt gâng pé lé hkat htoq é nghut jáng, núngmòq é chángzô pé gi, ó yùq é wum-o a-tsâm èq za, nàt gâng pé lé hkat pyám kô é nghut lhê lhú? Haû mù luî, yhángmòq gi, núngmòq lé jéyáng é bang dùt bekô râ nghut lhê. 20Nghut kôlhang, Ngò gi, Garai Gasâng é wum-ô èq nàt gâng pé lé hkat htoq pyâm é nghut jáng, Garai Gasâng é mîngdán#11:20 Garai Gasâng é mîngdán gâ é gi, byù htoq má le, nàt htoq má le, Garai Gasang yhang ùphkang é lé gâ é nghut lhê. gi, núngmòq chyáng jé bê nghut ri.

21Wum-o bo é sû rayùq gi, yhâng é yhûm lé, shâm, lhâm chûng luî zúng tô é nghut jáng, yhâng é sùtzè pé gi, rago za wó jòq to râ nghut lhê. 22Nghut kôlhang, yhâng htoq wum je bo é sû lé luî, haú yùq lé, lé zân ung pyâm é nghut le gi, yhang lum tô é shâm, lhâm lé, hkyom yu pyám byi luî, yhâng é sùtzè pé lé, gam yu pyám byi râ nghut lhê.#11:22 Haû eq rajung za, Yesuq gi, Tsádán lé zân ûng bê nghut é yánmai, agè ashop é nàt pé lé byu pê chyáng mai, wó hkat pyám bê nghut ri.

23Ngá hkyam shut a dàp sû gi, Ngo lé gyè kut sû nghut lhê. Ngò eq rahá a shuî tsing sû gi, lhoqpyo pyâm é sû nghut nyi ri.

24Haû agè ashop é nàt gi, byù rayùq chyáng mai htoq ló mù, kyuq huî é jowò pé má sô yông e ló luî, no râ jowò hkat ho wú le, a myang hô nghut ri. Haú hkûn, yhang gi, ‘Ngò nyi laî lo é yhûm má dum taû ló wú râ.’ ga taî ri. 25Yhang dum taû jé ló wú le, yhûm haû gi, shûm pyám mù san za rago dùt to láng é lé ló myang ri. 26Haû jáng, yhang gi, dum taû ê mù, yhâng htoq je wuî é nàt nyhit nàt lé shuî lò luî, haú má lo wang nyi to bekô. Haû mù, haú yùq é nyì yàp sâmlai gi, hí lhê htoq má je wuî lò bê nghut ri.” ga taî ri.

27Haû su ga, Yesuq taî nyi é hkûn, haû shiwa hpong mâ é, myiwe zo rayùq htê mó o mó èq Yhang lé taî é gi, “Nang lé wun é ûng wam eq nàng shuq é naúwang gi, hkungsô wó nyi ri ô!” gâ ri.

28Yesuq gi, “Garai Gasâng é mungdang gyô yù luî châng kut é bang gi, je riyhang hkungsô wó kôrâ nghut lhê.” ga taî ri.

Maúhpo Alhô Agàn Lé Dung Kô É Hkyô

Mht 12:38-42; Mrk 8:12

29Shiwa byu pé jàt myô zùp zîng lo é hkûn lé, Yesuq taî é gi, “Shí i-pyàt lhê é byu pé gi, agè ashop é bang nghut akô. Yhángmòq gi, maúhpo alhô agàn dûng nyi bùm kôlhang, Yonaq é alhô agàn mai lai luî, gótû haî le tûn shit râ a nghut. 30Yonaq gi, Ninewe wà byu pê hí má alhô agàn#11:30 Alhô Agàn gi, Yonaq, ngozô wamdau má sum nyí lúng é su, Yesuq le, shî bê mai sum nyí nghû râ nyí má, dum dui toq lô râ hkyô lé taí nau é nghut ri. dùt é su, haû Byu Yhangzo gi, shí pyàt lhê é byu pê hí má, alhô agàn dùt râ nghut lhê. 31Maupyî mâ é hkóhkâm myhí gi, maumyî ló htâng é mai lé lô mù, Sholumon é hpàqchyî dang lé, lé gyô yù bê nghut mù, haû târâ jéyáng é buìnyì má, shí i-pyàt mâ é byu pé eq rahá toq lô luî, yhángmòq lé mara hûn râ nghut lhê. Wú keq, Sholumon htoq ko sû gi, ahkuî shî má jé nyi to bê. 32Ninewe wà byu pé gi, Yonaq, mungdang hko kyô é hkûn myìt lhîng kô é nghut mù, târâ jéyáng é buìnyì má, shí i-pyàt eq rahá toq lô luî, yhángmòq lé mara hûn kôrâ nghut lhê. Wú keq, Yonaq htoq ko sû gi, ahkuî shí má jé nyi to bê.

Myibung Su Dùq Bó Râ Hkyô

Mht 5:15, 6:22-23

33Myibung lé tuq mù go pyâm é jowò má tô tô é le, mûng eq nghop tô é le, ó a kut wú kó. Nghut kôlhang, wang lé lô bang myòq wó myâng râ matú kúm gi, tsûngjang má tsung to to chyat kut akô. 34Náng é myòqjí gi, náng gùngdû é myibung#11:34 Myibung gâ é gi, tengmán é mungdang lé wó sê yu é a-tsam lé taî é nghut ri. nghut nyi ri. Náng é myòqjí ge é nghut le gi, náng é gùngdu gón má maubó byíng mui to râ nghut lhê. Nghut kôlhang, náng myòq a ge é nghut le gi, náng é gùngdu gón gi, mauchut tuq dùt nyì râ nghut lhê. 35Haû mù, náng chyáng bo é maubó gi, mauchut byùq é, a chut byùq é lé wú nyî àq. Nàng lùmjíng é hkyô eq nàng myìt é hkyô gi, mauchut tuq a dùt sháng gàq, sidìq nyì àq. 36Náng é ragùngdu gón má dùq bó é nghut le gi, rawò má le mauchut é jowò a jòq é za, myibung nang lé dùq bó byî nyi é su, náng gùngdu gón má dùq bó nyî râ nghut lhê.” ga taî ri.

Hparishe Pé Eq Târâ Sará Pé Lé, Yesuq Mara Hun É Hkyô

Mht 23:1-36; Mrk 12:38-40; Luk 20:45-47

37Yesuq haû su ga ban taî é htâng má, Hparishe rayùq gi, yhang eq zang rahá zo râ matú, Yesuq lé ji ri. Haû mù, Yesuq gi, haú yhûm má wang ê mù zang zo râ ga zanggyap nàm má zung tô ri. 38Nghut kôlhang, Hparishe hpó gi, zang zo râ hí má Yesuq lòq a chî é lé, myàng luî maú nyi ri.#11:38 Yudaq htûng târâ má gi, zang a zo shi má lòq chi râ lhê.

39Haû mù luî, Yhûmsîng Yesuq yhang lé taî é gi, “Núngmòq Hparishe pé gi, góm eq zanghkoq lé ahtoq shut za chî yúng nyî kômù, núngmòq é ûnghkaû má gi, lú zo lú shuq é eq agè ashop é hkyô pé byíng zan tô ri. 40Byù bâm pé ê, ahte#11:40 Ahte gâ é gi, i‑myìt ûnghkaû lé taî ri. lé le, ahtoq#11:40 Ahtoq gâ é gi, gùngdu lé taî ri. lé le, saí sû gi, Garai Gasang rayùq za nghut é lé, a sé kó lhú? 41Nghut kôlhang, ahte má bo é zè pé lé, ra châ é bang lé byî pyám keq; haú hkûn, núngmòq é matú bànshoq gi, sân-yúng lô râ nghut lhê.

42Hparishe pé ê, núngmòq gi, dingnyé wó ri, hkâsu mù gâ le, núngmòq gi, gau-tsáng, shíngtón pé eq zangxun mhan-haq ajà jà mâ é, xê gàmbùm ragàmbùm lé gi, Garai Gasang lé byî nyì kômù, târâ díngmán é hkyô eq Garai Gasang chyitdàp é hkyô lé gi, lhaî pyâm tô akô. Xê gàmbùm ragàmbùm byî é lé le cháng luî, târâ díngmán é hkyô eq Garai Gasang lé chyitdàp é hkyô lé le, kut nyî râ lhê.

43Hparishe pé ê, núngmòq gi, dingnyé wó ri, hkâsu mù gâ le, târâjong pé mâ é ahkyàk dik é zùng jang pé lé le, gaì pé má hkúnggâ é èq dù nyo lo é dang lé le, núngmòq ô nau nyi bum akô.

44Núngmòq gi, dingnyé wó ri, hkâsu mù gâ le, núngmòq gi, ahkô a dong lo mù, byu pé a sé luî, ahtoq mai sô laî é lùpdùng eq du akô.” ga taî ri.

45Haú hkûn, târâ sará rayùq gi, “Sará ê, nàng haû su gâ é gi, ngá-mòq lé le rhoi lhôm nyi é nghut bê.” ga Yhang lé tû taî ri.

46Haû su ga jáng, Yesuq gi, “Núngmòq târâ sará pé le, dingnyé wó ri. Hkâsu mù gâ le, núngmòq gi, byu pé lé, wùn wàq râ wuî é noqkuq htûng târâ wòlai lé wùn nhâng luî, yhûmsîng yhang gi, wò haú lé lòqnyhuî èq lháng, a bo záng wú kó nghut ri.

47Núngmòq gi, dingnyé wó ri, hkâsu mù gâ le, núngmòq gi, núngmòq é îchyí îwâ pé sat pyâm é myìqhtoî pê é lùp lé lùptsuq tsuq akô. 48Haû mù luî, núngmòq gi, núngmòq é îchyí îwa pê é múzó lé, myìt bo huî é bang nghut nyi akô. Hkâsu mù gâ le, yhángmòq gi, myìqhtoî pé lé sat pyám mù, núngmòq gi, lùp haú pé lé lùptsuq tsuq akô. 49Haû mù luî, Garai Gasang, Yhâng é hpàqchyî byéng-yá mai taî é gi, ‘Myìqhtoî pé eq lagyô pé lé, ngò yhángmòq chyáng nhang kat râ nghut lhê; haú bang mâ é ra-am lé gi, yhángmòq lhom sat pyám mù, ra-am lé gi, zing-ri kôrâ nghut lhê.’ gâ ri. 50Haû su mù luî, mau htoq xâng hkun lhê é, Abelaq é sui mai, hkungga gyàp eq noqkuq yhûm gyoro má sat pyám huî é Zehkariq é sui jé shoq, shun pyâm é myìqhtoî pê é sui bànshoq bâng é manglàt gi, shí pyàt mâ é byu pé lé hûn râ nghut lhê. 51Ngò, núngmòq lé taí kôlé, manglàt haú pé lé gi, shí pyàt mâ é byu pé lé, gè gè yhang hûn râ nghut lhê.

52Târâ sará pé ê, núngmòq gi, dingnyé wó ri, hkâsu mù gâ le, núngmòq gi, byu pé Garai Gasang lé sé râ zòqshi lé yu pyám byi kômù, yhûmsîng yhang le a sé, sé naû bang lé le, hkûm zing tô akô nghut ri.” ga taî ri.

53-54Yesuq haû mai htoq ló é hkûn, târâ sará pé eq Hparishe pé gi, Yhang lé gyè kut mù, Yhâng é dang má mara wó myâng shoq ga, wuî é dangmyi myo myo myi luî, gyám wú nyi akô nghut ri.

Currently Selected:

Lukaq 11: znot

Highlight

Copy