Lukaq 10

Yesuq, Chángzô Pé Nyhit Xê Yùq Lé, Nhang Htoq Kat É Hkyô

1Hau htâng má, Yhûmsîng gi, gótû chángzô pé nyhit xê yùq#10:1 Chyúmdang ra-am má gi, chángzo nyhit xe í yùq ga le kâ tô ri. lé hkyin yù mù, Yhang e ló râ wà eq jowò hkangmó shut í yùq razúm zúm kut luî, Yhâng é hí má ê nhang kat ri. 2Yesuq gi, yhángmòq lé, “Kyô#10:2 Kyô nghû é gi, Yesuq lé lùmjíng naù kôlhang taî kyo râ bang a nyì luî láng tô é bang nghut ri.shû yù râ myo shoq jòq kôlhang, mû zui râ byù gi, shaû nyi ri. Haû mù, haû kyô Yhûmsîng lé, Yhâng é kyô yò má, kyô shu byù#10:2 Kyô shu byù nghu é gi, Yesuq é hkyô gabú danglù lé taî kyo bang nghut ri. myo myo nhâng byi râ matú, dung keq. 3Núngmòq e ló keq! Wàmhkui hpúng má nhang hâng kat é sau zô pé lé su, Ngò, núngmòq lé nhang kat é nghut lhê. 4Ngùn htûng eq, e-tap, hkyî-tsung pé hkâyu chûng kó, hkyô má ó lé le dù nyo é hkyô hkâkut kûn nyì kó.

5Núngmòq gi, hká yhûm má wàng e ló kô le, ‘Shí yhûm nguì ngón nyî sháng gàq.’ nghû luî, hí taí keq. 6Haú yhûm má nguì ngón hkyô eq gíngdán sû nyi é nghut le gi, nguì ngón hkyô haû gi, haú yùq é ahtoq má jòq to râ nghut lhê. Haû a nghut jáng, nguì ngón hkyô haû gi, núngmòq chyáng dum taû lo byùq râ nghut lhê. 7Haú yhûm má nyi to mù, yhángmòq haî byî le haî zo haî shuq keq; hkâsu mù gâ le, mû zui sû gi, zuihpau wó yû gíng lhê; haû mù, núngmòq rayhûm htâng rayhûm hkâhtòt nyi wún kó.

8Núngmòq hká wà má wang ló kôlhang, yhángmòq lhom hàp yù kô é nghut le gi, núngmòq é hí má yhángmòq htung to byî é zoshuq lé, zo keq, shuq keq. 9Haú mâ é nò bang lé lhoqgê byi mù, ‘Garai Gasâng é mîngdán gi, núngmòq eq chyâng lò bê nghut ri.’ nghû luî, yhángmòq lé taî kyo keq. 10Nghut kôlhang, núngmòq hká wà má wang ló kô le, yhángmòq a lhom hàp yu é nghut le gi, haú wâ mâ é hkyô mó má htoq ê mù, 11‘Ngá-mòq é hkyî má dàp tô é núngmòq wà mâ é hpuílhaû lháng, núngmòq lé hkyang pû tsô nyì râ matú ngá-mòq ko hkyô pyâm to byi bê. Nghut kôlhang, Garai Gasâng é mîngdán gi, chyâng lò bê hkyô lé, sê to keq.’ nghû luî taí keq. 12Ngò, núngmòq lé taí kôlé, haú buìnyì#10:12 Haû buìnyì gâ é gi, Garai Gasâng é târâ jéyáng é buìnyì lé gâ lhê. lé, haú wâ gi, Sodom wà htoq má je hpuzo râ nghut lhê.

13Kurazin wà mó ê! Nàng dingnyé wó ri! Bet‑saida wà mó ê! Nàng dingnyé wó ri! Núngmòq chyáng lé kut shit é làklaí alhô agàn pé lé, Turuq wà mó eq Sidon wà mó má kut shit é ru nghut le gi, yhángmòq, noq noq mai myìt lhîng mù, jimê tû wùt lhê, myiwap kyaq gyûn lhê kut zung ngûng to bekô râ nghut lhê. 14Haû mù, târâ jéyáng é nyí jé jáng, núngnhik gi, Turuq wà mó eq Sidon wà mó htoq má je hpuzo#10:14 Núngnhik je hpuzô é hkyô gi, maúhpo alhô agàn myo myo myang é nghut kôlhang, myìt a lhîng kô é yánmai nghut ri. kôrâ nghut lhê. 15Dum mù, Kaperina‑um wà nàng ê, nàng gi, mauhkûng jé shoq wàq toq é hui râ lhú? A nghut, mosumhkung má shèq gyó râ nghut lhê.” ga taî ri.

16Hau htâng má, chángzô pé lé dum xoq taî é gi, “Núngmòq é dang gyo sû gi, ngá é dang gyo sû le nghut bê; núngmòq lé he-ngìk é sû gi, ngo lé le he-ngìk é sû nghut bê; ngo lé he-ngìk é sû gi, ngo lé nhang kat sû lé le, he-ngìk é sû nghut bê.” gâ ri.

Nyhit Xê Yùq Dum Taû Jé Lo É Hkyô

17Hau htâng, haû chángzo nyhit xê yùq gi, gabú myìt èq dum taû lò mù, “Yhûmsîng ê, náng é myìng lé lang jáng, nàt gâng pé lháng ngá-mòq é dang lé gyô bum akô.” ga taî akô.

18Haû su ga taí kôjáng, Yesuq tû taî é gi, “Tsádán gi, mauhkûng htoq mai lhap hpyat é su byìt gyó lo é lé ngò myang kat bê. 19Wú keq! Ngò gi, núngmòq lé, lhângmuì eq gogok pé lé wó nang râ eq gumlau gyè pê é wum-o a-tsam bànshoq lé wó ûng râ ahko ahkáng lé byi bê nghut mù luî, hai èq le núngmòq lé wó lhoqhten râ a nghut lo. 20Nghut kôlhang, nàt pé núngmòq é dang gyô é lé za hkâ gabú nyî kó, mauhkûng htoq má núngmòq é myìng bo to bê lé shèq gabú nyî keq.” ga taî ri.

21Haú u lé, Yesuq gi, Chyoiyúng Sô má gabú é myìt byíng lô mù, “Mauhkûng eq myigung é Yhûmsîng, Âwa ê, Nàng gi, haú pé lé, hpàqchyî byéng-yá bò bang eq myìt hpàqchyî sé bâng é hí mai haq nghop to luî, zoshâng wuì lé tûn shit bê nghut é yánmai, Ngò, Nang lé hkya-ôn lhê ô. Nghut bê, Âwa ê, haû gi, Nàng ô nau é hkyô nghut ri.

22Ngá wa gi, lhúnglháng lé Ngá é lòq má àp byî to bê. Garai Gasang Yhang zo ó nghut é gi, Âwa Garai Gasang mai lai luî ó le a sé; Âwa ó nghut é lé le, haû Zo eq haû Zo mai sé nhâng râ matú hkyin yu é bang mai lai luî, ó a sé.” ga taî ri.

23Hau htâng má, Yhâng é chángzô pê shut lhing wú luî, yhángmòq lé baú za haq taî kat é gi, “Núngmòq byu-myang é hkyô pé lé, myang é myòq pé gi, hkungsô wó nyi ri. 24Hkâsu mù gâ le, Ngò, núngmòq lé taí kôlé, núngmòq wó myâng, wó gyô é pé lé, myìqhtoî pé eq hkóhkam pé myo myo gi, myàng naù gyo naù kôlhang, a wó myâng, a wó gyo kó nghut ri.” ga taî ri.

Ge É Samariq Byù

25Haú hkûn, wú keq, târâ sará rayùq gi, toq luî, Yesuq lé, “Sará ê, ahtum abyùq é chyungxe lé wó yû shoq, ngò hkâsu kut ra râ lhê lhú?” ga luî, Yhang lé myî chyam wú ri.

26Yesuq gi, “Mosheq é târâ má hkâsu ga kâ tô ri lhú? Nàng haû lé hkâsu nghap yu nyi lhê lhú?” ga luî, yhang lé myî ri.

27Haú yùq gi, “‘Náng é Garai Gasang nghut é, haû Yhûmsîng Garai lé náng é i-myìt nhiklhum bànshoq, náng é i-myìt sô lhum gón, náng é wum-o bànshoq, nàng myìt é hkyô bànshoq èq, chyitdàp râ lhê.’#Târâ Pun 6:5 ga le, ‘Náng gûng lé nàng chyitdàp é su, náng é chyáng nâm mâ é bang lé le chyitdàp àq.’#Nhông 19:18 ga le bo tô ri.” ga tû taî ri.

28Yesuq gi, “Nàng tû taî é dang jô ri; haû su yhang kut àq, haû jáng nàng gi, chyungxe duì râ nghut lhê.” ga yhang lé taî ri.

29Nghut kôlhang, haú yùq gi, yhâng gùngdu díngmán é lé, tûn shit naû luî, “Ngá é chyáng nâm mâ é sû gi, ó yùq nghut lhê lhú?” ga luî, Yesuq lé myî ri.

30Yesuq gi, “Byù rayùq, Yerusalem wà mó mai Yerihko wà shut gyó ló le, da-myàq eq htûng huî ri. Da-myàq haú bang gi, yhâng é mèbu pé lé hkyut shang pyám byi kôluî, rayúm gyùt shoq bàt nha mù, alùq shoî shî jáng shèq tô pyâm to kôluî ló byùq bekô. 31Haú u lé, hkyangjong rayùq gi, haú hkyô mai laî âng ló le, haû da-myàq hui sû lé myàng jáng, koi laî ló byùq ri. 32Haû eq rajung za, Lewiq rayùq le, haû mai laî ló é hkûn, haú yùq lé myàng jáng, koi laî ló byùq ri. 33Nghut kôlhang, Samariq byù rayùq le, haû mai laî ló é hkûn, haú yùq lèq tô é lé myàng jáng, wú shogyo luî yhâng chyáng huî ê mù, 34yhâng é dàm má, xû eq tsibyiq wing shoq gyun luî, rago za htup byi mù, yhâng é loze má, haú yùq lé bún ke luî, bíng-yhûm ralhum má jé shoq shuî ló mù, gôn lajang byî ri. 35Htang nyí lé, yhang gi, haû bíng-yhûm yhûmsîng lé ngùn Denari í chap shê byi mù, taî é gi, ‘Shí yùq lé wú lajang byi laq, yhâng gùng má nàng myô chung záng é bànshoq lé ngò dum taû lò jáng, lo xap râ.’ gâ ri.” ga tû taî ri.

36Hau htâng, târâ sará lé, “Nàng gi, byù haú bang sum yuq má da-myàq huí su é chyáng nâm mâ é dông nghut sû gi, hká yùq nghut râ su ngam ri lhú?” ga luî, Yesuq myî ri.

37Haû târâ sará gi, “Haú yùq lé shogyo sû nghut ri.” ga taî ri.

Yesuq gi, “Nàng le haú dông ló kut àq.” ga luî, yhang lé taî kat ri.

Mariq Eq Mahtaq Nhik Chyáng Yesuq Ê Jé É Hkyô

38Ahkuî, Yesuq eq Yhâng é chángzô pé hkyô xoq sô e ló kô le, wà rawà má jé wang ló é hkûn, Mahtaq gâ é myiwe rayùq gi, Yesuq lé yhâng yhûm má lhom te yu ri. 39Mahtaq gi, Mariq gâ é yhang gu myiwe zo rayùq wó ri. Mariq haû gi, Yhûmsîng Yesuq é hkyîwang má zung to mù, Yhang mhoqshit é dang lé gyô nyi ri. 40Mahtaq kúm gi, saí tso saí huq é amû myo luî, gyin bûn nyi ri. Haû mù luî, yhang huî ê mù, “Yhûmsîng ê, ngá gu gi, saí tso saí huq é amû má, ngo lé baú za rap kut tô é lé, nàng a bo myàng byi lhú? Ngo lé, lé garúm sháng gàq, yhang lé taí byi laq.” ga luî, Yesuq lé taî ri.

41Haú hkûn, Yhûmsîng gi, “Mahtaq, Mahtaq, nàng gi, múzó lé za ma nyì mù, myìt myo myìt chiq é huî nyi ri. 42Nghut kôlhang, je ahkyàk é hkyô gi, rahkat za nghut lhê. Mariq kúm gi, haû je ge é hkyô lé hkyin yù bê nghut ri. Haú lé yhâng chyáng mai wó yu pyám byi râ a nghut.” ga luî, yhang lé tû taî ri.

Currently Selected:

Lukaq 10: znot

Highlight

Copy