Hose-a 9
9
Isira-elaq É Matú Mara Dam Byi Hkyô
1Isira-elaq ê, hkâ gabú,
gótû byù myû wuì su hkâ gabú byam chyu.
Hkâsu mù gâ le, nàng gi, náng é Garai Gasang lé a jujúm kut pyám luî,
gùq chyârâng hkangmó má,
shiwa myhí kut é ahpau wó râ lé chyitdàp é nghut ri.
2Gùq chyârâng pé eq tsibyiq wing pyik jang pé gi, byu pé lé baú râ a nghut;
tsibyiq wing asik le, yhángmòq lùq shuq râ a nghut.
3Yhángmòq gi, haû Yhûmsîng Garaî é mîngdán má myang nyì kôrâ a nghut;
Ehprim gi, Egutuq ming má taû ló râ nghut mù,
Asuri ming má, htûngli dông a sansêng é zoshuq zo kôrâ nghut lhê.
4Yhángmòq gi, haû Yhûmsîng Garaî é matú,
tsibyiq wing hkungga pé hut hkyó byi râ a nghut é htoq agó,
yhángmòq é shigu hkungga pé le, Yhang lé wó gabú nhâng râ a nghut.
Haû sû é hkungga pé gi, ngaùhkyang sâng bâng é zoshuq su dùt mù,
haú lé zô é bang bànshoq gi, agòt a-û dùt byùq râ nghut lhê.
Zoshuq haû gi, yhángmòq é matú dùt râ nghut mù,
haû Yhûmsîng Garaî é noqkuq yhûm má ge yu háng râ a nghut.
5Haû tû tô é núngmòq é poî buìnyì pé eq,
haû Yhûmsîng Garaî é poî buìnyì pé má,
núngmòq haî kut kôrâ lhú?
6Yhángmòq gi, htên byòq hkyô mai wó hpang lùt kôle,
Egutuq ming gi, yhángmòq lé shuî tsîng yù râ nghut mù,
Memhpi wà má myhup pyâm é hui kôrâ nghut lhê.
Yhángmòq é ngùnhtung sùtdò pé gi, hpépat èq yùq nghop pyám râ nghut mù,
yhángmòq é zúm pé gi, zû èq yùq hup pyám râ nghut lhê.
7Mara dam byi râ buìnyì pé jé bê nghut mù,
lató hpuq râ buìnyì pé chyáng bê nghut ri.
Isira-elaq a-myû gi, haú hkyô lé sé sháng gàq.
Núngmòq é myô dik é mara pé eq,
núngmòq é ladu laî é a naù a wom hkyo pê é yánmai,
myìqhtoi hpó gi, byù ngòk tsuq pyám hui zo mù,
sô wang júng sû gi, ashop é byù wui mó dông sôn pyâm é hui zo bê nghut ri.
8Ngá é Garai Gasang eq rahá nghut sû myìqhtoi gi,
Ehprim lé wú zúng sû nghut ri;
nghut kôlhang, yhâng é hkyô pé bànshoq má,
yhang lé lhaí htung tô é chyat nghut mù,
yhâng é Garai Gasâng é yhûm má a naù a wom hkyô byíng tô ri.
9Yhángmòq gi, Gibe-a wà mâ é buìnyì pé má kut é su,
ashop é hkyô má nòp zùq wang ló bekô nghut ri.
Garai Gasang gi, yhángmòq é agè ashop hkyô lé myìtbun râ nghut mù,
yhángmòq é yubàk marâ é matú, yhángmòq lé mara dam byi râ nghut lhê.
10Haû Yhûmsîng Garai gi, “Ngò gi, dánpyut yòso má tsibyiq shi lé myang é su,
Isira-elaq lé myang é nghut lhê;
Ngò gi, hkohúm gâm má sânghi zuî é myhîng é ashi lé myang é su,
náng é îchyí îwâ pé lé myang é nghut lhê.
Nghut kôlhang, yhángmòq gi, Balaq Pe-ora jowò má jé kô é hkûn,
yhûmsing gùng lé ahoq ahi é hparà lhô lé àp pyám kômù,
yhûmsîng chyitdàp é hparà su agòt a-û dùt byùq bekô nghut ri.
11Ehprim é xânghpoq nge wó hkyô gi, nghoq su dâng byùq râ nghut mù,
zô hku é hkyô a jòq, zogûng wun é hkyô a bò, zo a dàp dùt byùq kôrâ nghut lhê.
12Yhángmòq gi, zoshâng wuì lé hku baú kôle,
Ngò gi, haú bang lé wùp yu pyám byi râ nghut lhê.
Yhángmòq lé Ngò tô pyâm tô é hkûn,
yhángmòq gi, dingnyé hui zo kó sháng gàq.
13Ehprim gi, Turuq su, nguì ngón é jowò má xuq tô é lé,
Ngò myàng kôlhang,
yhang gi, yhâng é zodù wuì lé,
byù sat su é lòq má lé àp byi râ nghut lhê.” ga taî ri.
14Yhûmsîng Garai ê, yhángmòq lé byi aq;
Nàng, yhángmòq lé haî byi râ lhú?
Yhángmòq lé, zo a dàp é zoyhûm eq,
naú a htoq é naú byi aq.
15“Giligala wà mâ é yhángmòq é agè ashop hkyô bànshoq é yánmai,
Ngò gi, haú má yhángmòq lé a nguì kut pyâm é nghut lhê.
Yhángmòq kut é ashop é múzó pê é yánmai,
Ngò gi, yhángmòq lé Ngá é yhûm mai hkat htoq pyám râ nghut lhê.
Ngò gi, yhángmòq lé chyitdàp râ a nghut lo;
yhángmòq é zau wuî bànshoq gi, gumlau toq bang nghut bum akô nghut ri.
16Ehprim gi, htûng hkyop é hui mù,
yhâng é a-myìt kyuq byùq luî,
ashi a wó zui lo nghut ri.
Yhang gi, zoshâng hkû kôle,
Ngò gi, yhâng é chyitdàp dik é zoshâng lé sat pyám râ nghut lhê.” ga le taî ri.
17Ngá é Garai Gasâng é jì-no lé yhángmòq a gyo kô é yánmai,
Yhang gi, yhángmòq lé he-ngìk pyám râ nghut lhê;
yhángmòq gi, gótû byù myû wui chyáng htòt yông wún é bang dùt byùq kôrâ nghut lhê.
Currently Selected:
Hose-a 9: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
