Hose-a 7
7
1Isira-elaq byu pé lé Ngò lhoqgê lhoqyô byi naû hkangmó,
Ehprim é yubàk mara eq
Samariq é agè ashop hkyô htoq ze lò lò dùt ri;
hkâsu mù gâ le, yhángmòq gi, mhaú zo mhaú shuq hkyô kut mù,
hkau bang gi, yhúmhkaû má wàng luî,
da-myàq pé gi, wà hkyô pé má lú zo lú shuq bum akô nghut ri;
2nghut kôlhang, Ngò, yhángmòq kut é agè ashop hkyô bànshoq xûm tô é hkyô lé,
yhángmòq a sê gyo kó nghut ri.
Yhángmòq é yubàk mara gi, yhángmòq é lhînghkyùq má byíng to bê nghut ri;
haú dông, haú pé gi, Ngá é myòq hí má ayang nghut nyi bum akô nghut ri.
3Yhángmòq gi, yhángmòq é agè ashop hkyo èq hkóhkâm lé,
yhángmòq é mhaú hkyo èq zau wuî lé,
myìt lhoqngón byî akô nghut ri.
4Yhángmòq bànshoq gi, myi shut làng shut bang chyat nghut bûm mù,
dûn rhîn tô é múnhtung daû lò shoq,
myî lhu tap a râ é, mùk bung su é myi bunghkyûng su,
myìt nyé bum akô nghut ri.
5Hkóhkâm hpô é poî buìnyì má,
zau wuî gi, hpat shoq tsibyiq wing shuq wùt kômù,
hkóhkâm hpó gi, haû byù rhoî bang eq lòqxoq xoq bê nghut ri.
6Yhángmòq gi, haq gyám wú nyî mù,
yhûmsing é i-myìt gi, myi bunghkyûng su nyé nyi bum akô;
yhángmòq myìt nyé é gi, myi bunghkyûng su ra-myin mau nyé nyî kôlhang,
nàpsûn lé gi, myishâm su dùq nyi bum akô nghut ri.
7Yhángmòq bànshoq bang gi, myi bunghkyûng su myìt nyé nyi bum akô;
yhángmòq gi, yhángmòq é zau wuî lé myui pyám bekô nghut ri.
Yhángmòq é hkóhkam pé bànshoq gi, lèq gyòp byùq bê nghut mù,
yhángmòq chyáng mâ é rayùq lháng, Ngo lé a wùt kó nghut ri.
8Ehprim gi, gótû byù myû wuì eq nyhô nyi tô ri;
Ehprim gi, rahkyam shut za bung mù, a lhik shî é mùk nghut ri.
9Byù bíng pé gi, yhâng é wum-o lé myui pyám byi kôlhang,
yhang gi, haú lé a sê gyo nghut ri.
Yhâng é ulhum má xâm hpyû yùq bùm kôlhang,
yhang a sé nghut ri.
10Isira-elaq myìt myhâng nghutbûn é hkyô gi,
yhûmsîng lé taû htuqhtîng é sàksé dùt bê nghut ri;
yhang gi, haú í hui zo kôle, yhâng é Garai Gasang nghut é, haû Yhûmsîng Garaî chyáng
a lhing taû lo é htoq agó, Yhang lé a hô nghut ri.
11Ehprim gi, myìt ngha é, ngòk é hpûngkyui eq dù mù,
Egutuq ming lé garúm wùt dung luî,
Asuri ming shut lhing ló ri.
12Yhángmòq e ló kô é hkûn, Ngò gi, yhángmòq lé ngá é gùn dú nghop râ nghut lhê;
Ngò gi, yhángmòq lé, maulat nghoqzô pé lé su lâng hpyit hkyó râ nghut lhê.
Ngò gi, yhángmòq zùp zîng é jang mai wó gyô é eq rajung za,
yhángmòq lé mara dam byi râ nghut lhê.
13Yhángmòq gi, Ngá chyáng mai sô nghoq ló byùq bekô nghut é yánmai,
dingnyé wó ri!
Yhángmòq gi, Ngo lé gumlau toq bekô nghut é yánmai,
htên byòq é hui kó sháng gàq!
Ngò gi, yhángmòq lé hkyi xe yù naù kôlhang,
yhángmòq gi, Ngò eq séng luî mhaû é dang taî akô nghut ri.
14Yhángmòq gi, yhûmsing é yhuphpyang má wùt ngau garu kôlhang,
yhûmsing é myìt hkaû mai Ngo lé a wùt dung kó nghut ri.
Yhángmòq gi, gùqzò muilhum eq tsibyiq wing asik wó râ matú,
yhûmsing gùng lé yam mù, yhángmòq é hparà pê chyáng ê dung kôlhang,
Ngá chyáng mai gi, lhing taû ló byùq akô nghut ri.
15Ngò gi, yhángmòq lé mhoq kyo luî,
yhángmòq é lòq wum lhoqkíng byi kôlhang,
yhángmòq gi, Ngo lé htuqhtíng râ matú agè ashop é hkyô haq htung akô nghut ri.
16Yhángmòq gi, Myhang Htáng Su chyáng a lhing taû lò kó nghut ri;
yhángmòq gi, a díng é lai su dùt akô nghut ri.
Yhángmòq é zau wuî gi, gyáng dang taí kô é yánmai,
sham èq shi byùq kôrâ nghut lhê.
Hau é yánmai, Egutuq ming má yhángmòq rhoî jihkyoî kut é hui zo râ dùt é nghut ri.
Currently Selected:
Hose-a 7: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
