Hebre 6

1Haû mù luî, ngá-nhúng gi, Hkrisidùq eq sêng é mhoqshit hkyô awang lé tô to mù, myìt kô ding é hkyô shut xoq sô ê sháng. Ngá-nhúng gi, shî‑nò hkyô shut shuî jé é múzó mai myìt lhing é hkyô eq sêng é le, Garai Gasang lé lùmjíng hkyô eq sêng é le, 2wuìmyhup hkám hkyô pé, lòq ke byi hkyô, shi é mai dum dui toq hkyô eq ahtum abyùq jéyáng hkyô lé mhoqshit hkyô eq sêng é le nghut é, a-pûn awang dum hî nó a ra lô é nghut lhê. 3Garai Gasang gyô é nghut jáng, ngá-nhúng gi, myìt kô dìng hkyô shut xoq so râ nghut lhê.

4Myòq lhoqbóng é radàm hui bê bang, mauhkûng chyûnghuq lé myang hàp yù bê bang, haû Chyoiyúng Sô lé chôm hkam yù bê bang, 5Garai Gasâng é mungdâng é gè hkyô eq jé lo nyi é i-pyàt é a-tsam pé lé myang chyam wú bê bang, 6yhángmòq hpuq lhik ló byùq é nghut le gi, hká dông le myìt lhîng dum ge wó râ a nghut lo; haî mù gâ le, yhángmòq gi, Garai Gasâng é Yhangzo lé dum jén sat pyâm é dùt mù, Yhang lé de de rhoi pyám kô é nghut lhê.

7Yhâng ahtoq má wo gyûn é mau wuî lé shuq yû mù, yò mû saí bâng é matú a-kyû bo é hôwa nùqhpyí lhoqhtoq byî é maumyî gi, Garai Gasâng é shimân jeju myang hàp yu é nghut ri. 8Nghut kôlhang, zu gâm eq myòq gàm yùq htoq nhang é maumyî gi, a-kyû a bò mù, nhîng pyâm é hui zo râ lé chiq râ ri. Haû gi, ló htáng má nyhê hkyô pyâm é hui râ nghut lhê.

9Nghut kôlhang, chyitdàp é gu-mang wuì ê, ngá-mòq gi, haû su nghû taî é nghut kôlhang, núngmòq é hkyi yù hkyô eq sêng é je ge é jung pé, núngmòq wó bekô râ nghû hkyak myìt lum tô lhê. 10Garai Gasang gi, a târa é sû a nghut. Yhang gi, núngmòq é múzó lé le, Yhâng é byu pé lé núngmòq garúm bê eq xoq luî garúm nyi é dông, Yhang lé núngmòq chyitdàp é myìt shit kô é hkyô lé le, a tô-myhí râ nghut lhê. 11Ngá-mòq gi, núngmòq é i‑myìt myòqbyù hkyô wó byíng jùp râ matú, núngmòq yùq hkangmó i-pyàt htum shoq xoq shi-kùt nyì kôrâ lé gyai ô nau ri. 12Ngá-mòq gi, núngmòq lagon bang dùt byùq râ lé a ô nau é za, Garai danghtum htûm to bê é lé, lùmjíng myìt eq myìt hîng hkyô dông mai hkam yu é bang su châng kut kôrâ lé ô nau é ru nghut lhê.

Garai Gasang Htûm Tô É Danghtum Gîng Nyi É Hkyô

13Garai Gasang gi, Abraham lé danghtum htûm tô é hkûn, Yhâng htoq gyaú é dakâm myìng lang râ rayùq lháng a nyi é nghut mù, Yhânggùng lé Yhang lang luî dâkam é gi, 14“Ngò gi, nang lé teng za shimân byi mù, nang lé awùt ashín myo myo byi râ nghut lhê.”#A-pûn 22:17 gâ ri. 15Haû mù, Abraham gi, myìt hîng hîng láng yu é htâng má, danghtum htûm tô é lé wó yû bê nghut ri.

16Byu pé gi, yhángmòq htoq gyaú su é myìng lé lang luî, dakâm kô é eq, yhángmòq dâkam é dang lé sàksé kut mù, dangnyhin nyhîn é hkyô pé bànshoq lé lhoqpân pyâm akô nghut ri. 17Garai Gasang gi, Yhang myìt hpyit tô é hkâ-nhám le a htaî lhik é hkyô lé, danghtum htûm tô é lé hkam yù râ bâng chyáng san za shit nau ri; haû mù luî, dakâm dâng èq lhoqgîng to bê nghut ri. 18Garai Gasang gi, mhaú a ge é yánmai, hkâ-nhám le a htaî lhik é hkyô í hkat nghut é, danghtum htûm é eq dâkam é dang jòq é nghut mù, Yhang haû su kut é gi, ngá-nhûng hí má tô to byî é myìt myòqbyù hkyô lé myhik zîng râ matú gaû é jowò shut hpang wàng bê bang ngá-nhúng lé wum mó byî é dùt râ matú nghut lhê. 19Ngá-nhúng gi, myìt nhiklhûm é shâmtoq gòknghe dông myìt myòqbyù hkyô haû lé wó é nghut mù, haû gi, gingtîng é eq gaû é hkyô nghut ri. Myìt myòqbyù hkyô haû gi, mauhkûng noqkuq yhûm mâ é pán-gyang ahtê pyâm sân-yúng jowò má jé wang é nghut ri. 20Jowò haû gi, ngá-nhûng é a-kyu é matú, ngá-nhûng é hí má wàng byî é sû Yesuq wang jé é jowò nghut ri. Yhang gi, Melahkizedek wó é hkyangjong ayá hkyô dông mai, ahtum abyùq é hkyangjong mó dùt bê nghut ri.

Currently Selected:

Hebre 6: znot

Highlight

Copy

Compare